Ko a tia n tataekin taai aika raraoi ake ko iraorao iai ma ana aomata te Atua, tao te botaki teuana n te ekaretia ae kaunganano, te bwabwaro teuana ae kakukurei, te bwai ae ko karaoia ae uaana n te mwakuri ni minita ke te maroro ae kakukurei ma tarim n te onimaki? Ko bon aki mwaninga taekan Iehova ao e aki naba mwaninga taekam. E teimatoa n ururinga am beku ma te kakaonimaki. Ao e ingainga ni buokiko bwa ko na okiria.

E taku Iehova: “Boni ngai ae N na kakaaeia au tiibu ao N na tabeakinia. N na tabeakinia au tiibu n aron te tia kawakintiibu ae kuneia ana tiibu aika uamaenako ao e kaamwarakeia. N na kamaiuia man taabo nako ake a uamaenako nako iai.”—Etekiera 34:11, 12.