MWAKORO TENUA
Te Maraki n Nano
“E bukinai te tari te aine temanna n au ekaretia bwa I iraea ana mwane. A ongo tabeman n te ekaretia ao a kakaaea bwa antai ae a na iranna. N tokin te tai, e a tuangai te tari anne bwa e a manga karekei riki tabeua rongorongo, are e a itiaki iai taekau. E ngae ngke e a tia ni kabwarabure, ma I namakinna bwa I aki kona ni kabwaraa ana bure ibukin te baere I a tia n rinanona.”—Linda.
TERA am namakin iroun Nei Linda, are e rangi n rotaki n aroaron tarina n te onimaki? E kananokawaki bwa iai tabeman ake a rotaki aia babaire ni bwaai n taamnei man aroaroia tabemwaang. E a tia naba n riki aei nakoim?
E Kona Temanna ni “Karaureira ma Tangirara Iroun te Atua”?
Ni koauana, e kona n rangi ni kangaanga kabwaraan ana bure tarira n te onimaki are e a tia ni kammaraka nanora. Ngaia are, a riai Kristian n itangitangiri i marenaia. (Ioane 13:34, 35) E kona n taoniranako te un ao te maraki ngkana iai tarira n te onimaki temanna ae bure nakoira.—Taian Areru 55:12.
Ni koauana, e bon taekinaki n te Baibara bwa iai taai ake a kona Kristian n iai ‘bukini ngurengureia’ i marenaia. (I-Korote 3:13) Ma, ngkana e riki anne nakoira n tatabemanira nako, ti bae n noria bwa e kangaanga kanakoraoana. Iai te bwai ae ti kona ni buokaki iai? Iangoi tenua booto n reirei man te Baibara aikai:
E atai bwaai ni kabane Tamara are i karawa. E nori bwaai ni kabane Iehova, n ikotaki naba ma ribuaka ake ti kaaitarai ao mwia ake ti rotaki iai. (Ebera 4:13) E ngae n anne, e bon rotaki Iehova ngkana ti rawawata. (Itaia 63:9) E bon aki kariaia “te rawawata [ke] te maraki” ke te bwai riki teuana, e ngae naba ngkana mairoun ana toro temanna, bwa a na “karaureira ma tangirara iroun te Atua.” (I-Rom 8:35, 38, 39) Ngaia are, ti aki riai ni kariaia te bwai teuana ke te aomata temanna bwa e na karaureira ma Iehova.
Tai tarariaoa te bure ngkana ko na kabwaraa. Ngkana ti na kabwarai aia bure naake a bure nakoira, ti aki n ae ti kauarerekea, ti nanoraoi, ti karekei aonaia ke n tarariaoi aia mwakuri. Uringnga ae e aki kariaia te bure Iehova, ma e boni kabwarai ngkana iai bukini karaoaia. (Taian Areru 103:12, 13; Abakuka 1:13) Ngke e kaungaira bwa ti na kabwarai aia bure tabemwaang, e bon tuangira bwa ti na kakairi irouna. E aki “teimatoa n un n aki toki.”—Taian Areru 103:9; Mataio 6:14.
Ti kakabwaiaaki ngkana ti kaaki te un. N te aro raa? Iangoa te bwai ae riki aei. Ko anaa te atibu teuana ae bubura, ae tao e kaania teuana te kirokuraem tinena ao ko kaaki ni baim are ko taakinna. E na bae ni bebete tauana n te tai ae uarereke. Ma tera arona ngkana ko kataia n taua n te tai ae maan? Maanra ae ko kona n taua iai, tabeua te miniti, teuana te aoa ke e nako riki? Akea te nanokokoraki bwa e na boni kakai baim! Ni koauana, e aki kona ni bitaki tinebun te atibu anne. Ma ngkana ko teimatoa n taua, ko na namakina riki tinebuna. Ai arona naba ma te un. Ngkana ti teimatoa ni ngurengure i nanora, e ngae ngkana te bwai ae uarereke ma ti na boni maraki riki iai. Maroaka are e kaungaira Iehova bwa ti na kaaki te un. Eng, boni maurira ngkana ti kaaki.—Taeka N Rabakau 11:17.
Ti kakabwaiaaki ngkana ti kaaki te un
“I Namakinna ae Kaanga E Bon Taetae Iehova Nakoiu”
Tera ae buoka Linda bwa e na aki kaikoa unna, n te baere e a tia ni karaoia nakoina tarina n te onimaki? Mai buakoni bwaai riki tabeua, e kananoa ana iango neiei i aon te Baibara, ibukini kabwaraani buure. (Taian Areru 130:3, 4) E anaaki riki nanona n ataan ae ngkana ti kabwarai buure, e na boni kabwarai naba ara bure Iehova. (I-Ebeto 4:32–5:2) E taku neiei ni kaineti ma taeka akekei ake e rotaki iai: “I namakinna ae kaanga e bon taetae Iehova nakoiu.”
N te tai ae aki maan, e a kaaki te un Linda. E kabwaraa ana bure tarina mai nanona, ao e a riki ngkai te tari arei bwa raoraona. E teimatoa Linda ni karababaa ana beku ibukin Iehova. Ngaia are, kakoauaa raoi ae e tangiria ni buokiko Iehova bwa ko na karaoa aei naba.
