MWAKORO TEBWI MA TEUANA
E Aera Ngkai E a Korakora te Rawawata?
1, 2. Tera aia titiraki aomata aika bati?
E A URUAKI te kaawa n te tunami. E kakatii temanna te aomata n te umwantabu ni kaikoakiia ma n tiringia aomata aika bati. E mate te tina temanna man te kaentia ike e a kitania iai natina aika niman.
2 N rikini kabuanibwai aika karina n aron akanne ao a bati aomata aika titiraki bwa “Bukin tera?” A bati aika a titiraki bwa bukin tera ngkai e a rangi ni bati te riribai ao te rawawata n te aonnaba. Ko a tia naba n iaiangoa aei?
3, 4. (a) Baikara ana titiraki Abakuka? (b) E kangaa Iehova ni kaekaa teuaei?
3 Ti reiakinna n te Baibara bwa a tabeki naba aeka n titiraki akanne mwaane aika rangi n onimakina te Atua. N te katoto, e titirakina Iehova te burabeti ae Abakuka ni kangai: “Bukin tera bwa ko karaoai bwa N na nora karaoan ae bure? Ao bukin tera bwa ko taona nanom nakon te karawawataaki? Bukin tera ngkai a mena i matau te urubwai ma te iowawa? Ao bukin tera ngkai e a bati te kauntaeka ma te itabarara?”—Abakuka 1:3.
4 N Abakuka 2:2, 3, ao ti wareka iai ana kaeka te Atua nakon ana titiraki Abakuka aikai ao Ana berita bwa e na boni kanakoraoa te kangaanga. E rangi n tangiriia aomata Iehova. E taku te Baibara: “E mumutiakiningkami.” (1 Betero 5:7) E bon rangi n ribaa riki norakin te buakaka te Atua, nakon ribaakina iroura. (Itaia 55:8, 9) Ti na maroroakina ngkai te titiraki ae kangai: E aera ngkai e a korakora te rawawata n te aonnaba?
E AERA NGKAI E A KORAKORA TE RAWAWATA?
5. Tera ae a taekinna taan reirei n te Aro aika bati ibukin te rawawata? Tera ana reirei iai te Baibara?
5 A aki toki n taekinna mitinare, mataniwi n Aaro, ao taan reirei n te Aro bwa bon ana babaire te Atua bwa a na rawawata aomata. A taku tabeman bwa baika riki nakon te aomata n ikotaki ma kabuanibwai aika karina n riki, a a kamani katauaki rikia iroun te Atua ao ti aki kona n ota iai. A kona naba n taku tabemwaang bwa a mate aomata, n ikotaki ma ataei, bwa a aonga ni mena i rarikin te Atua i karawa. Ma bon akea koauan anne. E bon aki karikii baika bubuaka Iehova. E kangai te Baibara: “E bon aki kona te Atua ae koaua n iangoa karaoan ae buakaka, ao Teuare Moan te Mwaaka bwa e na karaoa ae kairua!”—Iobi 34:10.
6. Bukin tera ngkai a bati aomata aika bukina te Atua n rikin te rawawata n te aonnaba?
6 A bati aika a bukina te Atua n rikin te rawawata n te aonnaba aei, ibukina bwa a iangoia ae bon te Atua ae tautaekanna. Ma n aron ae ti reiakinna ni Mwakoro 3, bon Tatan te Riaboro ae tautaekana te aonnaba.
7, 8. E aera ngkai e a korakora te rawawata n te aonnaba?
7 Ti tuangaki n te Baibara bwa “a bane kaain te aonnaba ni mena i aani mwaakan teuare buakaka.” (1 Ioane 5:19) Te tia tautaekana te aonnaba aei bon Tatan ae iowawa ao e tiritiri. E “burebureiia kaain te aonnaba ni kabutaa.” (Te Kaotioti 12:9) Ao a bati aomata aika kakairi irouna. Ao anne bukina teuana ae e taabangaki iai te kewe, te riribai, ao te iowawa n te aonnaba aei.
8 Iai riki bukina tabeua ngkai e a korakora te rawawata n te aonnaba. Imwin aia karitei Atam ma Ewa ao a ituaki naba n te bure natiia. Ao ibukin te bure, a a kona aomata ni manga karawawataia tabeman riki. A tatangiria bwa a na kakawaki riki nakoia ake tabeman. A boo n un, a buaka, ao a kakani maiubuaka nakoia ake tabemwaang. (Te Minita 4:1; 8:9) A rawawata naba aomata n tabetai ibukin “te tai are a riki iai baika aki kantaningaaki.” (Te Minita 9:11) A kona naba n riki kabuanibwai ao baika bubuaka nakoia, ni menaia n te tabo ao n te tai are a riki iai baika aki kantaningaaki.
9. E aera bwa ti kakoauaa raoi ae iai bukina ae riai ngkai e tuai ni katoka te rawawata Iehova?
9 E aki karika te rawawata Iehova. E aki riai ni bukinaki n rikin te buaka, te kakeru, ao ai te bwainikirinaki. E aki naba karikii kabuanibwai aika karina n aron te mwaeiei, te angibuaka, ao te ieka. Ma ko kona n iango ni kangai: ‘Ngkana ngaia bwa te kabanea ni mwaaka Iehova n te iuniweeti, e aera ngkai e aikoa katoki baika rangi ni bubuaka aikai?’ Ti ataia ae e rangi n tabeakinira te Atua, mangaia are bon iai bukina ae riai irouna ngkai e tuai ni katoka te rawawata.—1 Ioane 4:8.
BUKINA NGKAI E TUAI NI KATOKA TE RAWAWATA TE ATUA
10. E kangaa Tatan ni kabuakakaa Iehova?
10 E burebureiia Atam ao Ewa te Riaboro n te onnaroka are Eten. E bukina te Atua Tatan bwa te tia Tautaeka ae buakaka. E taekinna naba bwa e taui baika raraoi te Atua mairouia Atam ao Ewa. E tangiriia Tatan bwa a na kakoauaa ae e raoiroi riki ana kairiri nakon Iehova ao a aki kainnanoa te Atua.—Karikani Bwaai 3:2-5; nora Kabwarabwaraana 27.
11. Tera te titiraki ae ti riai ni kaekaa?
11 A aki ongeaba Atam ao Ewa iroun Iehova ao a karitei nakoina. A iangoia bwa iai riaia ni bairea ae raoiroi ao ae buakaka i bon ibukia. E kangaa Iehova ni kaotia bwa a kairua taani karitei, ao ngaia e ataa ae te kabanea n raoiroi ibukira?
12, 13. (a) E aera Iehova ngke e aki kamaunaia taani karitei n te tai naba arei? (b) E aera Iehova ngkai e kariaia Tatan bwa e na tautaekana te aonnaba aei, ao aomata bwa a na tautaekania i bon irouia?
12 E aki kamaunaia Atam ao Ewa n te tai naba arei Iehova. Ma e kariaia bwa a na karikiia natiia. Imwina e a manga kariaia natin Atam bwa a na rinea te tia tautaekania. Ana kantaninga Iehova bwa e na kaonaki te aonnaba aei irouia aomata aika kororaoi, ao bon anne te bwai ae e na riki n aki ongei baike e kataia ni karaoi te Riaboro.—Karikani Bwaai 1:28; Itaia 55:10, 11.
13 E kabuakakaa naba Iehova Tatan i mataia anera aika mirion ma mirion mwaitiia. (Iobi 38:7; Taniera 7:10) Ngaia are Iehova e a angan Tatan ana tai ni kaota koauan ana bukibuki. E angania naba aia tai aomata ni katei oin aia tautaeka i aan ana kairiri Tatan bwa a na kaotia ae a kona n nakoraoi aroia n akean ana ibuobuoki te Atua ke e aki.
14. Tera ae oti man anganakia aomata aia tai n tautaekania i bon irouia?
14 A a tia aomata ni kataia n tautaekania i bon irouia i nanoni nga ma nga te ririki, ma a boni kabwaka. E a kaotaraeaki iai ae bon te tia kewe Tatan. A boni kainnanoa ana ibuobuoki te Atua aomata. E eti are e taekinna te burabeti are Ieremia ngke e kangai: “Iehova, I ataia raoi bwa tiaki ana bwai te aomata bairean arona, ao tiaki naba ana bwai te aomata kairani maiuna.”— Ieremia 10:23.
E AERA NGKAI E A RANGI NI MAAN N TATANINGA IEHOVA?
15, 16. (a) E aera Iehova ngkai e a kamaana rikin te rawawata? (b) Bukin tera ngkai e tuai ni katoki kangaanga Iehova ake e karikii Tatan?
15 E aera ngkai e a kamaana rikin te rawawata Iehova? E aera ngkai e a aki katoki baika bubuaka? E a kaotaraeaki iai ae e kabwaka ana tautaeka Tatan. A a tia aomata ni katai aeka n tautaeka nako, ma a bon aki nakoraoi aia waaki. E ngae ngke e a rikirake te rabakau n aonnaba ma taiani kukune ma e a rikirake riki te ribuaka, te maiu ni kainnano, te kakeru, ao te buaka, nakon are mai mwaina. Ti aki kona n tautaekanira i bon iroura, kioina ngkai ti boni kainnanoa te Atua.
16 Ma e tuai ni katoki kangaanga Iehova ake e karikii Tatan. Bwa ngkana e karaoa anne ao nanona ngkanne bwa te Atua e boutokaa ana waaki n tautaeka Tatan, ao E na bon aki karaoa anne. A na kakoauaa naba iai aomata ae a kona n tautaekania i bon irouia. Ma bon te kewe anne ao e bon aki kani boutokaa anne Iehova. E aki kona ni kewe.—Ebera 6:18.
17, 18. Tera ae e na karaoia Iehova nakoni mwin ana urubwai nako Tatan?
17 E kona Iehova ni katamaroaa mwin te urubwai ae riki man aia karitei Tatan ao aomata? Eng, e konai bwaai ni kabane te Atua. E ataa Iehova te tai are a na bane iai ni kaekaaki raoi ana kabuakaka Tatan. Ao e na karika te aonnaba bwa te bwaretaiti, n aron are e moani kantaningaaki. A nangi bane aomata ake a mena i nanon “taian ruanimate” ni kautaki. (Ioane 5:28, 29) A nang aki manga aoraki ke ni mate aomata. E na kanakoraoi Iesu mwin ana urubwai nako Tatan. E na kabongana Iesu Iehova “bwa e aonga n urui ana mwakuri te Riaboro.” (1 Ioane 3:8) Ti kakaitau bwa n te tai moa aei ao e taotaona nanona Iehova nakoira, bwa ti aonga ni kona ni karekea ataakina ao ni kona ni motinnanoia bwa e na riki bwa ara tia Tautaeka. (Wareka 2 Betero 3:9, 10.) E na buokira naba n nanomwaaka ngkana ti rawawata.—Ioane 4:23; wareka 1 I-Korinto 10:13.
18 E aki kairoroira Iehova bwa ti na rineia bwa ara tia Tautaeka. E angania aomata te bwaintangira ae inaomataia ni karaoa ae a kani karaoia. Ti na neneria bwa tera manenan te bwaintangira ane rangi ni kakawaki anne nakoira.
KO NA KANGAA NI KABONGANA TE BWAINTANGIRA AE INAOMATAM?
19. Tera ana bwaintangira Iehova ae tamaroa are e anganira? Ao e aera ngkai ti riai ni kakaitau iai?
19 Ana bwaintangira Iehova ae rangi n tamaroa ae inaomatara e a karikira bwa ti na rangi ni kaokoro iai ma maan. Bwa maan a maiuakina aroia are a baireaki nako iai, ma ngaira ti kona n rineia bwa tera aroni maiura ao ni motinnanoia bwa ti kani kakukureia Iehova ke ti aki. (Taeka N Rabakau 30:24) Tiaki naba aroia mitiin ngaira ake a tii kona ni karaoi baike a katauaki nako iai. Iai inaomatara ni motinnanoia bwa tera ae ti tangiria, antai ae e na riki bwa raoraora, ao tera te bwai ae ti kani karaoia ni maiura. E tangirira Iehova bwa ti na kimwareirei ni maiura aei.
20, 21. Tera te motinnano ae te kabanea n raoiroi ae ko kona ni karaoia ngkai?
20 E tangiria Iehova bwa ti na tangiria. (Mataio 22:37, 38) Ai aron te karo ae kukurei n ongo ana taeka natina ae kangai, “I tangiriko,” ao e taekinna raoi mai nanona n aki kairoroaki. E anganira Iehova inaomatara n rineia bwa ti na beku irouna ke ti na aki. A a tia Tatan, Atam, ao Ewa n rineia bwa a na rawa nakon Iehova. Ko na kangaa ni kamanena te bwaintangira ae inaomatam?
21 Kabongana inaomatam ni beku iroun Iehova. Mirion ma mirion aomata ake a a tia ni motinnanoia bwa a na kakukureia te Atua ao n rarawa nakon Tatan. (Taeka N Rabakau 27:11) Tera ae ko kona ni karaoia ngkai bwa ko aonga ni mena n ana aonnaba ae boou te Atua, n te tai are e nang akea iai te rawawata? E na kaekaaki te titiraki anne n te mwakoro ae imwina.
