REIREI 7
Ko a Tia n Namakina te Maroaa ao te Maaku?
Nora te teei ane e oti taamneina anne. E taraa ni maroaa ao ni maaku, tiaki ngaia? Ko a tia n namakina naba aron anne?— A bati aika namakina naba anne n taai tabetai. E karakinaki n te Baibara taekaia raoraon Iehova ake a namakina naba te maroaa ao te maaku. Temanna mai buakoia bon Eria. Ti na reiakina taekana.
E tangiria Ietebera n tiringa Eria
E maeka Eria i abaia tibun Iteraera n taai ake ngkoangkoa, imwaini bungian Iesu. E aki taromauria te Atua ae koaua ae Iehova, Aaba are aia uea tibun Iteraera. A taromauria te atua ae kewe ae Baara, Aaba ma buuna ae Ietebera. Ngaia are a a moanna naba n taromauria Baara angiia aomata ake i abaia tibun Iteraera. E rangi n iowawa te ueannaine ae Ietebera ao e tangiria n tiringia aomata ni kabane ake a taromauria Iehova, ao e tangiria naba n tiringa Eria! Ko ataia bwa tera ae e karaoia Eria?—
E birinako Eria! E nakon te tabo ae raroanako n te rereua ao e karabaa n te nangananga. N am iango, bukin tera ngke e karaoa anne?— Eng, e boni maaku. Ma e aki riai ni maaku Eria. Bukin tera? Ibukina bwa e ataia ae e kona ni buokia Iehova. E a tia ngkoa Iehova ni kaota mwaakana nakon Eria. N te taina ao Iehova e kaekaa ana tataro Eria ngke e kabwakaa te ai mai karawa. Ni koauana, e kona ngkai Iehova ni buoka Eria!
E kangaa Iehova ni buoka Eria?
Ngke e mena Eria i nanon te nangananga, ao e taetae nakoina Iehova ao n titirakinna ni kangai: ‘Tera ae ko karaoia ikai?’ E kaeka Eria ni kangai: ‘Bon tii ngai ae I teimatoa n taromauriko. Akea raou n taromauriko ao I a maaku bwa N na bon tiringaki.’ E iangoia Eria bwa a a tia n tiringaki taan taromauria Iehova ake tabeman. Ma e tuangnga Iehova ni kangai: ‘Tiaki ngaia anne, e kairua am iango. Iai riki aomata aika 7,000 mwaitiia aika a teimatoa n taromauriai. Kaninikoriako. Iai riki te mwakuri ae N na mwiokoiko bwa ko na karaoia!’ N am iango, e kukurei Eria n ongo te taeka anne?—
Tera reireiam man te baere e riki nakon Eria?— Ko aki riai n namakina te maroaa ao te maaku. Iai raoraom aika a tangira Iehova ao aika a tangiriko naba. E bati naba mwaakan Iehova ao e na boni buokiko n taai nako! Ko kukurei n ataia ae ko aki kona n tiku n tii ngkoe?—
