REIREI 12
E Ninikoria ai Natini Bauro
Ti na reiakina taekan te teinimwaane are e kamaiua ai tamana. Ai taman te teinimwaane aei bon te abotoro Bauro. Ti aki ataa aran te teinimwaane aei, ma ti ataia ae e karaoa te mwakuri are kaotia iai bwa e rangi n ninikoria. Ko kan ongora rongorongon te bae e karaoia?—
E karabuutinaki Bauro i Ierutarem. E katikaki ni karabuutinaki ibukina bwa e uarongorongoa taekan Iesu. A ribaa Bauro tabeman mwaane aika buakaka, ai ngaia are a karaoa aia babaire ae rangi ni buakaka. A taku: ‘Ti na tuanga mataniwin te taanga ni buaka bwa e na kairaki Bauro irouia tautia nakon te boowi. Ti na karabaira i rarikin te kawai ao ti na tiringa Bauro ngkana e rirarikira!’
E tuanga Bauro ao mataniwin te taanga ni buaka ai natini Bauro, taekan te babaire ae rangi ni buakaka
E ongo taekan te babaire aei ai natini Bauro. Tera ae e na karaoia? E kawara Bauro n te karabuuti ao n tuangnga taekan te babaire anne. N te tai naba anne, ao e tuangaki irouni Bauro bwa e na tuanga mataniwin te taanga ni buaka taekan te babaire ae rangi ni buakaka anne. N am iango, e bebete iroun ai natini Bauro bwa e na taetae ma mataniwin te taanga ni buaka?— E bon aki, ibukina bwa te aomata ae kakannato mataniwin te taanga ni buaka. Ma e ninikoria ai natini Bauro ao e taetae ma mataniwin te taanga ni buaka.
E ataa raoi te bae e na karaoia mataniwin te taanga ni buaka. E karekeia kaain ana taanga ni buaka ae kaania 500 mwaitiia tautia bwa a na kamanoa Bauro! E tuangia n te tairiki anne bwa a na kaira Bauro nako Kaitareia. Ma e kamaiuaki Bauro?— Eng, e aki reke angaia mwaane aika buakaka n tiringnga! E aki koro bukin aia babaire ae rangi ni buakaka.
Tera ae ko kona n reiakinna man te karaki aei?— Ko kona naba n ninikoria n aron ai natini Bauro. Ti riai n ninikoria ngkana ti maroroakina taekan Iehova ma tabemwaang. Ko na ninikoria ao n teimatoa n tataekina taekan Iehova?— Ngkana ko karaoa anne, ko kona ni kamaiua iai temanna.
