1-3. (a) Tera aia namakin aomata aika bati n aia mwakuri ni kareketianti? (b) Baikara titiraki aika ti na rinanoi n te mwakoro aei?

A MWAKURI korakora aomata nako aika n te aonnaba ibukini boutokaaia ma aia utu. A bati aika aki nano n aia mwakuri ni kareketianti, ao tabeman a a kuri n rawa n nako ni mwakuri ni katoabong. Ngkana anne am namakin, tera ae ko kona ni karaoia bwa e na kakimwareirei riki am mwakuri? Ko na kangaa ni kukurei n am mwakuri?

² E tuangira aei Iehova: “A riai . . . aomata nako n amwarake ao ni moi ao ni karekea kimwareireia ibukin aia mwakuri korakora ni kabane. Bon te bwaintangira mairoun te Atua.” (Te Minita 3:13) E karikira Iehova ma kainnanoan ao tangiran te mwakuri. E tangiria bwa ti na kukurei ni baika ti karaoi.​—Wareka Te Minita 2:24; 5:18.

³ Mangaia ae tera ae kona ni buokira ni kimwareirei n ara mwakuri? Aekakira mwakuri aika a riai n rawa nako iai Kristian? Ti na kangaa ni kabaeranta ara mwakuri ma taromaurian Iehova? Ao tera te mwakuri ae moan te kakawaki ae ti kona ni karaoia?

4, 5. Tera ana iango Iehova ibukin te mwakuri?

⁴ E kani mwamwakuri Iehova. E kangai Karikani Bwaai 1:1: “N te moantai ao e karika karawa ma te aonnaba  te Atua.” Ngke e a tia ni karika te aonnaba te Atua ma bwaina nako, ao e taku bwa e “rangi n raoiroi” ana karikibwai. (Karikani Bwaai 1:31) E rau nanon ara tia Karikiriki ni mwin ana mwakuri.​—1 Timoteo 1:11.

⁵ E a boni mwamwakuri nako naba Iehova. E taku Iesu: “E teimatoa ni mwakuri Tamau ni karokoa ngkai.” (Ioane 5:17) E ngae ngke ti aki atai baika kamimi ni kabane ake e karaoi Iehova, ma bon iai tabeua aika ti atai. E a tia n rineiia taan tautaeka ma Natina ae Iesu Kristo, ake a na kaaina te Tautaeka n Uea. (2 I-Korinto 5:17) E teimatoa naba Iehova ni kairiia ao n tabeakinia aomata. Ao imwin te mwakuri n uarongorongo ae kabutaa te aonnaba, mirion ma mirion ake a ataa Iehova ao ni karekea te kantaninga ae te maiu n aki toki n te aonnaba ae bwaretaiti.​—Ioane 6:44; I-Rom 6:23.

6, 7. Te aeka n tia mwakuri raa Iesu?

⁶ E kani mwamwakuri naba Iesu n aron Tamana. Imwain rokona i aon te aba ao boni ngaia ana “tia mwakuri ae mwaatai” te Atua, ni karikani bwaai ni kabane i karawa ao i aon te aba. (Taeka N Rabakau 8:​22-31; I-Korote 1:​15-17) E mwamwakuri korakora naba Iesu ni menana n te aonnaba. Ngke e rorobuaka n ataei ao e kataneia bwa te kabentaa ae mwaatai, ae tao e kakaraoi bwain te auti ao ai taian auti. E rangi n rabakau Iesu n ana mwakuri ike e a kinaaki iai bwa te “kabentaa.”​—Mareko 6:3.

⁷ Ma ana mwakuri Iesu ae moan te kakawaki n te aonnaba, bon tataekinan te rongorongo ae raoiroi ao reiakinaia aomata taekan Iehova. Tenua ao te iterana te ririki ae e na katiaa iai ana mwakuri ni minita, ao e mwakuri korakora man te moaningabong n uaa bwakanakon te  tai. (Ruka 21:​37, 38; Ioane 3:2) E ririanna Iesu bubua  ma bubua te kiromita rinanoni kawai aika bubu, n tibwaa te rongorongo ae raoiroi nakoia aomata aika bati.​—Ruka 8:1.

8, 9. E aera ngke e kimwareirei Iesu n ana mwakuri?

⁸ Iroun Iesu, karaoan ana mwakuri te Atua titeboo ma te amwarake. E reke korakorana ao marurungina n te mwakuri aei. Iai boong ake e rangi ni mwakuri korakora iai Iesu, ike e a aki reke iai amwarakena. (Ioane 4:​31-38) E kamanenai taai ni kabane ni buokiia aomata n reiakinia taekan Tamana. Anne bukina ae kona iai ni kangai nakon Iehova: “I a tia n neboiko i aon te aba, ni katiaan te mwakuri are ko anganai bwa N na karaoia.”​—Ioane 17:4.

⁹ E teretere bwa a rangi ni mwakuri korakora Iehova ma Iesu ao a kimwareirei ma n rauaki n aia mwakuri. Ti kan riki “bwa taani katotonga aron te Atua” ao taan “toua raoi mwini [mwanekan Iesu].” (I-Ebeto 5:1; 1 Betero 2:21) Anne bukina ae ti kataia iai ni mwakuri korakora ao ni kabanea ara konaa n te bae ti karaoia.

10, 11. Tera ae e kona ni buokira ni bwaina te iango ae riai ibukin ara mwakuri ni kareketianti?

¹⁰ Ngkai ana aomata Iehova ngaira, ti mwakuri korakora ibukini boutokaara ma ara utu. Ti kani kukurei n ara mwakuri, ma e kona naba ni kangaanga. Tera ngkanne ae ti na karaoia ngkana ti aki kimwareirei n ara mwakuri ni kareketianti?

¹¹ Bwaina te iango ae riai. Tao ti aki kona ni bita ara tabo ni mwakuri ke mwaitin ara mwakuri, ma ti kona ni bita aroarora. E kona ni buokira ataan te bae e kantaningaia Iehova mairoura. N te katoto: E kantaningaa atun  te utu Iehova bwa e na kabanea ana konaa n tararuai kainnanoia ana utu. Ni koauana, e taku te Baibara bwa ane e kabwaka ni karekei maiuia ana utu “e buakaka riki nakon te aomata ae aki onimaki.” (1 Timoteo 5:8) Ngkana atun te utu ngkoe, mwakuri korakora ni karekei maiuia am utu. E ngae ngkana ko tangira am mwakuri ke ko aki, ma ko ataia ae ko kakukureia naba Iehova n arom ni karekei maiuia am utu.

12. Ti kangaa ni kakabwaiaaki man te mwakuri korakora ao mani bwabwainan te koaua?

¹² Mwakuri korakora ao bwabwaina te koaua. Ko na kai kimwareirei riki iai n am mwakuri. (Taeka N Rabakau 12:24; 22:29) Bukina teuana, e na kona n onimakiniko am tia kammwakuri. Taani kammwakuri a tatangiriia aia tia mwakuri aika bwabwaina te koaua bwa a aki iraeraea te mwane, bwaai, ke aoan te mwakuri. (I-Ebeto 4:28) Ma ae kakawaki riki, e nora am mwakuri korakora Iehova ao arom ni bwabwaina te koaua. E kona ‘n itiaki mataniwin nanom’ n ataan ae ko kakukureia te Atua ae ko tangiria.​—Ebera 13:18; I-Korote 3:​22-24.

13. Tera naba ae e kona n riki ngkana ti bwabwaina te koaua n ara tabo ni mwakuri?

¹³ Ataia ae aroarom n am tabo ni mwakuri e kona n neboaki iai Iehova. Aei bukina naba ae ti kona ni kukurei iai n ara mwakuri. (Tito 2:​9, 10) E kona naba ni kan reirei n te Baibara raom ni mwakuri temanna ibukin aroarom ae raoiroi.​—Wareka Taeka N Rabakau 27:11; 1 Betero 2:12.

14-16. Tera ae ti riai n iaiangoia n rinean ara mwakuri ni kareketianti?

¹⁴ E aki karinani te Baibara mwakuri ni kareketianti  aika riai ke aika aki riai ibukin te Kristian. Ma iai booto n reirei iai aika kona ni buokira ni karaoi ara rinerine aika raraoi ibukin te mwakuri. (Taeka N Rabakau 2:6) Ni kamanenaani booto n reirei man te Baibara, ti kona n titirakinira titiraki aikai.

¹⁵ E na kairai te mwakuri ni kareketianti aei nakoni karaoan te bae e taku Iehova bwa e kairua? Ti a tia n reiakini baika e ribai Iehova n aron te iraa ao te kewe. (Te Otinako 20:4; Mwakuri 15:29; I-Ebeto 4:28; Te Kaotioti 21:8) Ngaia are ti taraia raoi bwa ti na rarawa  nakoni mwakuri aika ekinako ana kaetieti Iehova.​—Wareka 1 Ioane 5:3.

¹⁶ E boutokaa ke e kamoamoaa te bae e ribaia Iehova te mwakuri ni kareketianti aei? N te katoto, tera arom ngkana ko anganaki te mwakuri ae bubutimwaeaia aomata n te kiriniki ae tabe ma kabwakaan te teei ae tuai ni bungiaki? Akea buren te mwakuri ae bubutimwaeaia aomata. Ma ko ataa aron ana namakin Iehova ibukini kabwakaan te teei. Ngaia are e ngae ngke ko aki ibuobuoki ni kabwakaan te teei, ma tiaki ko namakinna ae ko irekereke naba n te bure anne n ana taratara Iehova?​—Te Otinako 21:​22-24.

17. Tera ae e kona ni buokira ni karaoi motinnano aika kakukureia te Atua?

¹⁷ Mani kamanenaan ana boto n reirei te Atua, ti a kona n riki iai bwa aeka n aomata ake a kabwarabwaraaki n Ebera 5:​14, “ake a kakabongana aia atatai ao a kataneiaaki iai bwa a na ataa ae eti ao ae kairua.” Titirakiniko aei: ‘Ngkana I butimwaea te mwakuri ni kareketianti aei, a na mamaara iai tabemwaang? N na kairaki iai bwa N na kitana buu ma natiu nakon te aba teuana? Tera aron rotakia iai?’

18. E aera ngkai e kona ni kangaanga kaatuuan ara iango i aon ara taromauri?

¹⁸ E kona ni kangaanga moanibwaian taromaurian Iehova iroura n “taai aika okoro aika karuanikai” aikai. (2 Timoteo 3:1) E kona n rangi ni kangaanga karekean te mwakuri ni kareketianti ao kateimatoaana. Ti riai ni karekei maiuia ara utu, ma ti ataia bwa e moanibwai moa ara taromauri. Ti aki kona ni kariaia bwaikorakin te maiu  bwa a na kakawaki riki ni maiura. (1 Timoteo 6:​9, 10) Ma ti na kangaa ni “koaua raoi bwa baikara bwaai aika kakawaki riki” ao n taraia naba bwa e na reke maiuia ara utu?​—I-Biribi 1:10.

19. E kangaa onimakinan Iehova ni buokira ni kabaeranta ara mwakuri?

¹⁹ Onimakina raoi Iehova. (Wareka Taeka N Rabakau 3:​5, 6.) Ti ataia ae te Atua e atai raoi baika ti kainnanoi ao e rangi n tabeakinira. (Taian Areru 37:25; 1 Betero 5:7) Ti tuangaki ae kangai n ana Taeka: “Kam na maiuakina te aro ae akea te bakimwane iai, ngkai a rau nanomi n ami bwai akana iroumi. Bwa e kangai ngkoa te Atua: ‘N na bon aki kaakiko ao N na bon aki kitaniko.’ ” (Ebera 13:5) E aki tangiria Iehova bwa ti na rararaoma ibukini karekeani maiuia ara utu. E okioki ni kaotia bwa e kona ni karekei kainnanoia ana aomata. (Mataio 6:​25-32) N aki ongeia bwa tera aron ara mwakuri, ma ti katoatai n reirei n Ana Taeka te Atua, n tataekina te rongorongo ae raoiroi, ao ni kaakaei ara bobotaki ni Kristian.​—Mataio 24:14; Ebera 10:​24, 25.

20. Ti na kangaa n teimatoa ni kabebetea maiura?

²⁰ Kaatuua taraan te bwai ae tii teuana. (Wareka Mataio 6:​22, 23.) E nanonaki n aei kabebeteani maium bwa ko aonga ni kaatuua iangoan te beku iroun Iehova. Ti ataia ae ti nanobaba ngkana ti kariaia te mwane, te maiuraoi, ke kukune aika boou, bwa a na kakawaki riki nakon ara iraorao ma te Atua. Ngaia are tera ae e na buokira ni moanibwai baika a riai ni moanibwaiaki? Ti riai ni kabanea ara konaa n aki taarau. Ngkana ko a kaman taarau, karaoi am babaire aika manena ibukini kauarerekeana ke kabwaraana. Ngkana ti aki taratara raoi, a kona bwaikorakin te maiu aei ni kana ara tai ma  korakorara ae bati, ao e nang aki reke ara tai n tataro, n ukeuke n reirei, ke n uarongorongo. N oneani mwin ae ti na kariaia bwaikorakin te maiu aei bwa e na kabetangaa riki maiura, ti tangiria bwa ti na rauaki ni baika ti boni kainnanoi n aroni “kanara ma kunnikaira.” (1 Timoteo 6:8) Ao n aki ongeia bwa tera arora, e raoiroi bwa ti na tutuoira bwa ti aonga ni kona ni kabatiaa riki ara tai ni beku iroun Iehova.

21. E aera bwa ti riai n iangoia bwa tera ae e moanibwai ni maiura?

²¹ Katei baika riai ni moanibwai. Ti riai ni kamanenai raoi ara tai, korakorara, ao ara bwai. Ngkana ti aki  taratara raoi, a na kona ni kana ara tai ae kakawaki baika aki rangi ni kakawaki, n aron te reirei ke te mwane. E taku Iesu: “Teimatoa n ukoukora moa ana Tautaeka n Uea te Atua.” (Mataio 6:33) A oti baika a moanibwai i nanora, mani baika ti rinei, anuara, baika ti kakaraoi ni katoabong, ao tiia aika ti uaiakin.

22, 23. (a) Tera te mwakuri ae moan te kakawaki ibukira ngaira Kristian? (b) Tera ae e na buokira ni kimwareirei n ara mwakuri?

²² Te mwakuri ae moan te kakawaki ae ti kona ni karaoia, bon te beku iroun Iehova ao tataekinan te rongorongo ae raoiroi nakoia aomata. (Mataio 24:14; 28:​19, 20) N aron Iesu, ti kani kabanea naba ara konaa n te mwakuri aei. A mwaing tabeman nakon taabo ake a kainnanoaki riki iai taan uarongorongo. Tabemwaang a reiakina te taetae ae boou bwa a aonga n uarongorongo nakoia naake aia taetae anne. Maroro ma naake a a tia ni karaoi baikai, ao titirakinia taekana. Ane a na tuangko ae e a kakukurei riki maiuia ao n uaana.​—Wareka Taeka N Rabakau 10:22.

²³ Ni boong aikai ao a bati i buakora aika kakabanea te aoa ae bati n te mwakuri ni kareketianti ae tii teuana ke ae e raka riki, ibukini karekeani kainnanoia aia utu. E ataa anne Iehova ao e kakaitau ni bwaai nako aika ti karaoi ibukin tabeakinaia ara utu. Ngaia are ti bia teimatoa ni kakairi iroun Iehova ma Iesu, n arora ni mwakuri korakora, n aki ongeia bwa tera ara mwakuri. Ao ti bia uringnga ae ara mwakuri ae moan te kakawaki bon te beku iroun Iehova, ao tataekinan te rongorongo ae raoiroi ibukin Ana Tautaeka n Uea te Atua. E na reke iai iroura te kimwareirei ni koaua.