1, 2. Tera ae ti na karaoia ae ti na teimatoa n tangiraki iai iroun te Atua?

TI BANE ni kani korakora ao ni marurung. Ngaia are ti kataia ni kang amwarake aika raraoi, ti kakamarurung, ao ti tararuaa rabwatara. E ngae ngke e kainnanoa te kakorakora karaoan aei, ma ti kimwareirei ni mwina, ngaia are ti aki bwarannano. Ma ti riai naba ni korakora ao ni marurung n te itera riki teuana.

² E ngae ngke ti a ataa Iehova, ma ti riai ni kateimatoa korakoran ara iraorao ma ngaia. Ngke e kaungaia Kristian Iuta ni kangai, “Kawakiningkami n te aro ae kam na teimatoa n tangiraki iai iroun te Atua,” ao e boni kabwarabwaraa naba aroia ni karaoia. E taku: “Kakorakoraa riki ami onimaki ae moan te tabu.” (Iuta 20, 21) Ngaia are ti na kangaa ni kakorakoraa ara onimaki?

3-5. (a) Tera ae e tangiria Tatan bwa ko na iangoia ibukin ana kaetieti Iehova? (b) Tera am iango ibukin ana tua Iehova ao ana boto n reirei?

³ E kakawaki bwa ko na kakoauaa ae bon taiani kabanea n raoiroi kawain Iehova. E tangiria Tatan bwa ko na iangoia bwa a rangi ni kangaanga maiuakinan ana kaetieti  te Atua, ao ko na kukurei riki ngkana ko bon rineia bwa tera ae eti ao ae kairua. E a kamani kataia Tatan ni kairiia aomata bwa a na kakoauaa aei, man te onnaroka are i Eten. (Karikani Bwaai 3:​1-6) Ao e boni kakorakoraa naba ngkai.

⁴ E koaua Tatan? A rangi n tuamatoa ana kaetieti Iehova? A aki. Ibukini kabwarabwaraana, iangoia bwa ko rianna n te tabo ni kamaangang ae tamaroa. Ao ko a nora te oo ae rietata ae tuka te tabo teuana. Tao ko iango ni kangai, ‘E aera e a tutuki te oo aei?’ Ma n te tai naba anne ao ko a ongo bekoraran te raian n iteran te oo are teuana. Tera am iango ngkai ibukin te oo aei? Ko a kakaitau ngkai e kamanoko mairoun te raian! Ana boto n reirei Iehova ai aron te oo anne, ao te Riaboro ai aron te raian. E anga te kauring Ana Taeka te Atua nakoira ni kangai: “Kam na kawanawanaingkami ao taratara raoi! E nakonako teuare kairiribai nakoimi are te Riaboro ni bekorara n ai aron te raian, n ukoukora ae e na ongnga.”​—1 Betero 5:8.

⁵ E tangiria Iehova bwa e na rangi n nakoraoi maiura. E aki tangiria bwa ti na mwamwanaaki iroun Tatan. Anne bukina ngkai e anganira tuua ao booto n reirei bwa ti na kamanoaki ao ni kukurei iai. (I-Ebeto 6:11) E korea aei Iakobo: “Ane e tirotiroa te tua are kororaoi are karekea te inaomata ao n teimatoa iai, . . . e na kukurei n te bwai ae e karaoia.”​—Iakobo 1:25.

6. Ti na kangaa ni kakoauaa bwa bon taiani kabanea n raoiroi kawain te Atua?

⁶ Ngkana ti ira ana kairiri Iehova, e na nakoraoi maiura ao e na ririkirake ni korakora ara iraorao ma ngaia. N te katoto, ti kakabwaiaaki ni butimwaean ana kakao ae te tatataro nakoina. (Mataio 6: 5-8;  1 I-Tetaronike 5:17) Ti kukurei ngkana ti ongeaba n ana kairiri, ae te bobotaki n taromauria ao n ikaungaunga i marenara ao n uataboan te uarongorongo ao te mwakuri n angareirei. (Mataio 28:​19, 20; I-Karatia 6:2; Ebera 10:​24, 25) Ngkai ti iaiangoi aroni baikai n tia ni buokira ni kateimatoa korakoran ara onimaki, ti a ririkirake riki ni kakoauaa ae bon taiani kabanea n raoiroi kawain Iehova.

7, 8. Tera ae e na buokira n aki raraomaeakini kataakira n taai aika imwaira?

⁷ Ti kona n raraomaeakina kataakin ara onimaki n taai aika imwaira bwa tao e na rangi ni matoatoa iroura. Ngkana ko a tia n namakina naba anne ao uringi ana taeka Iehova aikai: “Bon Iehova ngai ae Atuam, are Teuare reireiniko bwa ko aonga ni kabwaia, are Teuare kaiririko n te kawai ae ko riai n nakonako iai. Ko bia kaman  irii nanon au tua! Ao e na riki raun nanom n ai aron te karaanga ao am raoiroi n ai aron naoni marawa.”​—Itaia 48:​17, 18.

⁸ Ngkana ti ongeaba iroun Iehova, e na riki raun nanora n ai aron te karaanga ae aki kona n ora, ao e na riki ara raoiroi n ai aron naoni marawa aika teimatoa ni bwaro nako aon te bike. N aki ongei baika riki ni maiura, ma ti boni kona ni kakaonimaki. E berita te Baibara ni kangai: “Kaaki rawawatam i aon Iehova ao e na kateimatoako. E aki kona ni kariaia bwa e na bwaka ane e raoiroi.”​—Taian Areru 55:22.

9, 10. Tera ae e nanonaki n te ikawai n te onimaki?

⁹ Mani kakorakoraan am iraorao ma Iehova, ko a ‘kakorakorako iai n eweka te mwaneka n ikawai.’ (Ebera 6:1) Tera ae e nanonaki n te ikawai n te onimaki?

¹⁰ Ti aki riki bwa Kristian aika ikawai n te onimaki ngkana ti a ikawai riki. Ngkana ti na ikawai n te onimaki, ti riai ni karika Iehova bwa Raoraora ni koaua, ao ni kataia n iangoi bwaai n ai arona. (Ioane 4:23) E korea aei Bauro: “Akana maiuakina kaibwabwarun te rabwata, a iaiangoi bwain te rabwata, ma akana kairaki maiuia n te taamnei, a iaiangoi bwain te taamnei.” (I-Rom 8:5) Te aomata ae ikawai n te onimaki e aki kaatuua iangoan te kakukurei ke bwaikorakin te maiu. Ma e kaatuua iangoan te beku iroun Iehova ao e karaoi rinerine ma te wanawana ni maiuna. (Taeka N Rabakau 27:11; wareka Iakobo 1:​2, 3.) E aki kan iraraang ni karaoa ae kairua. Te aomata ae ikawai n te onimaki e ataa ae eti ao e kakorakoraa ni karaoia.

11, 12. (a) Tera are e taekinna Bauro ibukin ana “atatai” te Kristian? (b) N te aro raa ae titeboo iai te ikawai n te onimaki ma te riki bwa te tia takaakaro?

 ¹¹ E kainnanoaki te kakorakora bwa ko aonga n ikawai n te onimaki. E korea aei te abotoro Bauro: “Te amwarake ae matoatoa boni kanaia aomata aika ikawai, ake te koraki ake a kakabongana aia atatai ao a kataneiaaki iai bwa a na ataa ae eti ao ae kairua.” (Ebera 5:14) Te taeka ae “kataneiaaki” ti kona n iangoa iai ana kataneiai te tia takaakaro.

¹² Ngkana ti nora te tia takaakaro ae mwaatai, ti ataia ae e a tia ni kabanea te tai ae maan ao ni kakataneiai bwa e aonga n rikirake mwaataina. E aki bungiaki ao e a riki naba bwa te tia takaakaro. Ngkana e bungiaki te teei ao e bon tuai ni bwaati ni kabonganai anganibaina ma rangana. Ma imwina riki ao e a kona n taui bwaai ao n nakonako. E a kona n riki bwa te tia takaakaro man ana kakataneiai. N aron anne, ti kainnanoa te tai ae maan ao te kakataneiai bwa ti aonga n riki bwa Kristian aika ikawai n te onimaki.

13. Tera ae e na buokira ni kona n iango n aron Iehova?

¹³ N te boki aei ao ti nenera iai arora n iango n aron Iehova ao n iaiangoi bwaai naba n arona. Ti a tia n reireinaki arora ni butimwaei ao n tangiri ana kaetieti Iehova. Ngkana ti karaoi motinnano ao ti na titirakinira aei: ‘Baikara tuua ke booto n reirei man te Baibara aika kaineti ma aei? N na kangaa ni maiuakini? Tera ae e tangiria Iehova bwa N na karaoia?’​—Wareka Taeka N Rabakau 3:​5, 6; Iakobo 1:5.

14. Tera ae ti riai ni karaoia ngkana ti na kakorakoraa ara onimaki?

¹⁴ Ti teimatoa ni kakorakoraa onimakinan Iehova iroura. N aroni kanakin amwarake aika kamarurung aika buokira ni kakorakoraa rabwatara, ti buokaki naba ni  kakorakora ara onimaki man reiakinan taekan Iehova. Ngke ti moan reiakina te Baibara, ti reiakin iai moan reirei ibukin Iehova ao kawaina nako. Ma ni waakinakon te tai ao ti a kainnanoa te ota ni baika nano riki. Anne are e nanonna Bauro ngke e kangai: “Te amwarake ae matoatoa boni kanaia aomata aika ikawai.” Ni maiuakinani baika ti reiakin, ti a karekea iai te wanawana. E tuangira te Baibara ni kangai: “Te bwai ae te kabanea ni kakawaki bon te wanawana.”​—Taeka N Rabakau 4:​5-7; 1 Betero 2:2.

15. Tera aroni kakawakin tangiran raoi Iehova ao taari iroura?

¹⁵ E kona ni korakora ao ni marurung te aomata, ma ngkana e na teimatoa arona anne, e ataia ae e riai n teimatoa n tararuaia. N aron anne, e ataia te aomata ae ikawai n te onimaki bwa e riai ni mwakuri korakora bwa e aonga n teimatoa ni korakora ana iraorao ma Iehova. E anga te kauring Bauro nakoira ni kangai: “Teimatoa n tuoingkami bwa kam mena n te onimaki ke kam aki ao teimatoa n tuoingkami bwa tera aromi.” (2 I-Korinto 13:5) Ti teimatoa ni kainnanoa ae bati riki nakon ae tii te onimaki ae korakora. E riai n ririkirake tangiran Iehova ao taari iroura. E taku Bauro: “Ngkana iai irou . . . taian atatai ni kabane, ao ngkana iai au onimaki ae korakora n te aro ae I kona iai ni kamwaingi maunga, ma ngkana akea te tangira irou, ao bon akea uaau.”​—1 I-Korinto 13:​1-3.

16. Tera ae e tangiria Tatan bwa ti na namakinna?

¹⁶ E tangiria Tatan bwa ti na iangoia ae ti aki tau ni kakukureia Iehova. E tangiria bwa a na bwara nanora ao n iangoia bwa akea katokan ara kangaanga. E aki tangiria bwa ti na onimakinia raora n te onimaki, ao e aki tangiria bwa ti na kukurei. (I-Ebeto 2:2) E ataia Tatan bwa  iango aika aki riai aikai a kona n urua arora ao ara iraorao ma te Atua. Ma e a tia Iehova n anganira te bwai teuana ae e na buokira ni buakan iango aikai. E a tia n anganira te kantaninga.

17. Tera aroni kakawakin te kantaninga?

¹⁷ N 1 I-Tetaronike 5:8 ao te Baibara e kabotaua ara kantaninga ma te bwara ni buaka ae kamanoa atun te tautia n te buaka, ao e arana te bwara ni buaka anne bwa “te kantaninga ibukin te kamaiuaki.” Kantaningaan ana berita nako Iehova e kona ni kamanoa ara iango ao ni buokira n totokoi iango aika aki riai.

18, 19. E kangaa ni kakorakoraaki Iesu n te kantaninga?

¹⁸ E kakorakoraaki Iesu n ana kantaninga. N ana kabanea n tairiki ni maiuna n te aonnaba, ao e a kaaitara ma te kangaanga teuana imwin teuana. E kamwaneaki iroun raoraona ni kaan temanna. Are temanna e kakeaa ao e baka n aki kinaa. A kaaki taekana ake tabeman ao a birinako. E  ekakinako irouia kaain abana ao a tua bwa e na kamateaki ni kammarakaki. Tera are e buokia n nanomwaaka ni baika kammaraki aikai? “E nanomwaaka nakoni matena i aon te kai ni kammaraki ibukin te kimwareirei are kamenaaki imwaina, n aki mutiakina kamaamaeana, ao e a tekateka i angaatain ana kaintokanuea te Atua.”​—Ebera 12:2.

¹⁹ E ataia Iesu bwa kakaonimakina, e na neboaki iai Tamana ao ni kaotaraeaki iai Tatan ae bon te tia kewe. E reke kimwareireina ae bati n te kantaninga aei. E ataia naba ae e na boni waekoa n okira Tamana i karawa. E buokia te kantaninga aei bwa e na nanomwaaka. N aron Iesu, ti riai ni kaatuua ara iango i aon ara kantaninga. E na buokira n nanomwaaka n aki ongea te bae riki.

20. Tera ae e kona ni buokiko bwa ko na iaiangoi baika riai?

²⁰ E nora am onimaki ao nanomwaakam Iehova. (Itaia 30:18; wareka Maraki 3:10.) E berita bwa e na “anganiko baika e tangiri nanom.” (Taian Areru 37:4)  Ngaia are kaatuua am iango i aon am kantaninga. E tangiria Tatan bwa e na bua am kantaninga ao n iangoi ana berita Iehova bwa a aki kona ni koro bukia. Ma tai kariaia bwa ko na rotaki n iango aikai! Ngkana ko noria bwa ko a manga nanououa n am kantaninga, butiia Iehova te ibuobuoki. Uringi taeka ake n I-Biribi 4:​6, 7: “Tai raraomaeakina te bwai teuana, ma a na kaotaki ami bubutii ni bwaai ni kabane nakon te Atua, n te tataro ma te kakorakora n tataro ni bubutii n raonaki n te katituaraoi, ao te rau are mairoun te Atua ae riaon aia iango aomata, e na kawakin nanomi ma ami iango rinanoni Kristo Iesu.”

21, 22. (a) Tera ana kantaninga Iehova ibukin te aonnaba? (b) Tera ae ko motinnanoa karaoana?

²¹ Iaiangoa te tai ae kakukurei ae imwaira. A nangi bane aomata aika maiu n taromauria Iehova. (Te Kaotioti 7:​9, 14) Iangoa aron te maiu n te aonnaba ae boou. E na raoiroi riki nakon ae ti kantaningaia! A nang akea Tatan, ana taimonio, ao te buakaka ni kabane. Ko nang aki manga aoraki, ao ko nang aki naba manga mate. Ma ko nang uti ni katoabong ma te marurung ao te kukurei. A na bane aomata ni mwakuria te aonnaba aei bwa te bwaretaiti. A nang reke kanaia aika raraoi ao mwengaia aika mano raoi iai. A nang aki tiritiri ke n iowawa aomata, ma a nang kaotiota te akoi ni koaua i marenaia. Imwina riki ao aomata nako aika n te aonnaba, a nang karekea “te inaomata ae rianako arona ae reke irouia natin te Atua.”​—I-Rom 8:21.

²² E tangiria Iehova bwa ko na karikia bwa Raoraom ni koaua. Ngaia are kabanea am konaa n ongeaba irouna ao ni kaania riki ni katoabong. Eng, ti bia bane ni kateimatoa arora ae ti na tangiraki iai iroun te Atua n aki toki!​—Iuta 21.