TE BUKINIBAA
Tokanikai i Aon Arom ni Kumekumea Am Bwai ni Kakariki
E aki kakukureia te Atua te mwaan ae kumekumean am bwai ni kakariki i bon iroum, bwa e karikirakea iroum kani kakatokan nanom iai ma ni kairiko bwa ko na iaiangoi baika bubuaka. * E kona naba te tia kumekumea ana bwai ni kakariki n iangoiia aomata tabemwaang bwa baika manena tii ibukini katokan nanona n te wene n taanga. E a iangoa te wene n taanga bwa ai tiaki kaotan te tangira i marenaia aomata aika uoman, ma ai te mwakuri ae karaoaki ngkana e roko nanom iai ae kona ni kakukureiko i nanon tabeua te tai. Ma e aki teimaan te kukurei anne. Ni koauana, kumekumean ana bwai ni kakariki te aomata i bon irouna e aki kamatei bwain rabwatana ni “kaineti ma te wene ni bure, te kamwara, bwaruan te wewene ni bure,” ma e a kauekei riki iai.—I-Korote 3:5.
E korea ae kangai te abotoro Bauro: “Ngkami aika kam tangiraki, . . . ti na kaitiakira mani kamwaraan nako te rabwata ma te nano, ma ni kororaoi n te itiaki ni maakan te Atua.” (2 I-Korinto 7:1) Ngkana e rangi ni kangaanga iroum irakin nanon taeka aikai, tai kabwaraa nanom. E ‘kani kakabwarai buure’ Iehova ao e kan ibuobuoki. (Taian Areru 86:5, BG; Ruka 11:9-13) Ni koauana, nanom ni kakorakorako ni kani katoka te mwaan aei, e ngae ngke ko a manga karaoia n tabetai, e kaota arom ae raoiroi. Ururinga naba are “e rianako riki aron te Atua nakon nanora ao e atai bwaai ni kabane.” (1 Ioane 3:20) E nori baika bati riki te Atua i rarikin norakin ara bure, bwa e nora aroaron te aomata ni kabane. Ibukin ataakin aei irouna, e a kona iai n nanoangaira n ongo ara kakorakora n tataro n onnon ibukin nanoangaara. Mangaia ae tai kabwaraa nanom ni kawara te Atua rinanon te kakorakora n tataro ma te nanorinano, n aron te teei ae kawara tamana ngkana e reke n te kangaanga. E na boni kakabwaiako Iehova ni kaitiaka mataniwin nanom. (Taian Areru 51:1-12, 17; Itaia 1:18) Ma ko bon riai naba n toui mwaneka aika raraoi ni kaboraoia ma am tataro. N te katoto, ko na kakorakorako n rawa nakon aeka ni bwaitingako ni kabane, ao ko na rawa naba n reitaki ma aomata aika buakaka. *
Ngkana e reitinako am kangaanga ni kaineti ma kumekumean am bwai ni kakariki i bon iroum, taiaoka ni maroroakinna ma am karo ae te Kristian ke raoraom ae mwamwannano ae e a ikawai n te onimaki. *—Taeka N Rabakau 1:8, 9; 1 I-Tetaronike 5:14; Tito 2:3-5.
^ bar. 1 Kumekumean am bwai ni kakariki i bon iroum boni kamwaranean ke riringan am bwai ni kakariki, n te aro ae ko na tia iai n angiin te tai.
^ bar. 2 Ibukin tararuaan raoi kabonganaan te kaombiuta, a bati utu aika kamenai aia kaombiuta n te tabo ae kai noraki irouia ni kabane. Irarikina, iai tabeman ae a kabooi bwain aia kaombiuta ake a kona n totokoi rinin baika bubuaka ake a na oti n aia kaombiuta. Ma e ngae n anne, akea bwain te kaombiuta ae kona n onimakinaki raoi bwa e na totokoi rinin baika bubuaka ni kabane.
^ bar. 1 Ibukini buokam bwa ko na kanga n tokanikai i aoni kumekumean am bwai ni kakariki i bon iroum, nora te kaongora ae “Young People Ask . . . How Can I Conquer This Habit?” n te Awake! ae bwain Nobembwa 2006, ao n te boki ae te Questions Young People Ask—Answers That Work, Volume 1, n iteraniba 178-182.
