Mwakorokoro n raraa. A anaaki mwakorokoro n raraa mani mwakoro n raraa aika aua aika taian red cell, white cell, platelet, ao plasma. N te katoto, iai i nanon taian red cell te protein hemoglobin. A a tia ni kabonganaaki baika karaoaki man aia hemoglobin aomata ke maan, ni bwainnaorakiaki iai aomata ake a kakaiaki akean raraaia ke e korakora tiinakon raraaia.

Te plasma ae kanoana 90 te katebubua te ran, e uouotii taian hormone, inorganic salt, enzyme, ao nutrient, aika rangi ni bati, n ikotaki naba ma taiani mineral ao te tioka. Iai naba n te plasma baika kabwanina te raraa bwa e na aki tiinako, tautian te rabwata, ao taiani protein n aron te albumin. Ngkana iai te aomata ae ituaki n te aoraki, a kona n tua taokita bwa e na itinaki n te gamma globulin, ae anaaki man aia plasma aomata ake e a reke totokoan te aoraki anne irouia. A anaaki taian interferon ao interleukin man taiani white blood cell, ao a kabonganaaki ibukini bwainnaorakian aoraki aika reke mani maninnaoraki tabeua ao bwainnaorakian naba taiani kaentia.

A riai Kristian ni butimwaei bwainnaoraki man taiani mwakorokoro n raraa? E aki kamataatai raoi baikai te Baibara, mangaia ae a riai Kristian ni kabonganai oini mataniwin nanoia ni motika nanoia iai i matan te Atua. A kona n rawa tabeman nakoni mwakorokoro n raraa ni kabane, bwa otaia n Ana Tua te Atua nakoia I-Iteraera e na “[kabwaroaki] i aontano” te raraa ae kanakoaki mairoun te man. (Te Tua-Kaua 12:22-24, BK ) Ma aomata tabemwaang a rawa ni karinaki irouia te raraa ae bwanin ke mwakorona ake aua, ma a kona ni kariaia bwainnaorakiaia man te mwakorokoro n raraa teuana. Tao a iangoia bwa e a rangi n uarereke te mwakorokoro n raraa are e anaaki man te raraa, ao e a aki kona n tei ibukini maiun te man ke te aomata are e anaaki te raraa mairouna.

Ngkana ko na karaoi am motinnano ni kaineti ma mwakorokoro n raraa, iangoi titiraki aikai: I ataia ae ngkana I rawa nakoni mwakorokoro n raraa ni kabane, nanona bwa N na aki naba butimwaei bwainnaoraki tabeua aika nako man te raraa, aika buakani aoraki ke aika kona ni buoka kabwaninan te raraa bwa e na aki tiinako? I kona ni kabwarabwaraa nakon te taokita bwa e aera ngkai I rawa ke I butimwaea kabonganaan teuana mwakorokoron te raraa ke e bati riki?

Waaki ni korokoro. E irekereke naba aei ma te hemodilution ao te cell salvage. N te hemodilution, ao e kabutaki te raraa man te rabwata rinanoni bwaibu aika tomaaki ma ian te rabwata ao e karinaki te ran teuana bwa oneani mwin te raraa, ao e a manga kaokaki te raraa imwina nakon rabwatan te aoraki. N tain te korokoro ao te cell salvage e anaa te raraa ao ni manga kaokia. E anaaki te raraa man rabwatan te aoraki ke man te ikoaki ao e kaitiakaki ao e a manga kaokaki nakon rabwatana. Ibukina bwa e kakaokoro nako aia aanga taokita ni karaoi waaki aikai, e riai te Kristian ni kakaaea bwa tera aroni karaoana iroun ana taokita.

 Ngkana ko karaoi am motinnano ni kaineti ma waaki aikai, titirakiniko ni kangai: ‘Ngkana e kabutaki raraau ae bon tau ni kaotinakoaki man rabwatau rinanoni bwaibu aika toma ma ian rabwatau, ao ngkana e na tiku na aki buti teutana te  tai n te bwaibu ao e a tibwa okira rabwatau, e na kariaia mataniwin nanou ngkana I iangoa te raraa aei bwa bon raraau ae aki kanakoaki man rabwatau, ao e aki riai ni “[kabwaroaki] i aontano”? (Te Tua-Kaua 12:23, 24, BK) E na tabeaianga mataniwin nanou ae kataneiaaki n te Baibara ngkana e kaotinakoaki raraau ao ni karaoaki bitaki nako iai ao imwina e a manga kaokaki nakon rabwatau? I ataia ae ngkana I rawa nakoni waaki ni bwainnaoraki ni kabane aika irekereke ma kabonganaan oin raraau, e nanonaki iai bwa N na aki butimwaea tuoan raraau, te hemodialysis, ke kabutan raraau n te mitiin ae te heart-lung bypass?’

E riai te Kristian ni karaoa ana motinnano i bon irouna bwa tera aroni karaoan raraana ae e na butimwaeia ni kaineti ma te waaki ni korokoro. E kaineti naba aei nakoni waaki n tutuo ke bwainnaoraki tabeua aika irekereke ma anaakin raraana teutana tao ibukini karaoana n aanga tabeua, ao imwina e a manga karinaki.