MWAKORO 1
“Ko Riai n Taromauria Iehova ae Atuam”
TE BOTO N IANGO: Riaini kaokan te taromauri ae itiaki
1, 2. E kangaa Iesu n roko n rereuan Iutaia n tain te abue n 29 C.E., ao tera ae riki nakoina ikanne? (Nora te taamnei ni moan te mwakoro aei.)
N 29 C.E. n tain te abue, ao e mena Iesu n rereuan Iutaia, i meangin Taari ae Mate. E kairaki n te taamnei ae raoiroi nako ikai, imwini bwabetitoana ao kabirana n te taamnei. Bon te rereua ae riribwa ao ni mwaruarua te tabo aei, are e a kabanea iai 40 te bong n tiku n tii ngaia n aki mamatam, n tataro, ao ni kananoa ana iango. Tao e a reitaki ngkai Iehova ma Natina ao ni katauraoia imwaini baika a nang riki.
2 E a mamaara ngkai Iesu bwa e a bora ni baki ao e a kawaria Tatan. Te bae riki imwina e kaota te bwai ae rangi ni kakawaki ae a irekereke iai aomata nako aika tangira te taromauri ae itiaki, n ikotaki naba ma ngkoe.
“Ngkana Ngkoe Temanna Natin te Atua . . . ”
3, 4. (a) Tera ana taeka Tatan ake e taekin n ana moani kariri ake uoua, ao tao tera ae e kataia ni kananououaa iai Iesu? (b) E kangaa Tatan ni kabonganai naba ngkai aanga akanne?
3 Wareka Mataio 4:1-7. E taekin ana moani kariri Tatan ake uoua n taeka aika karariki aikai, “Ngkana ngkoe temanna natin te Atua.” E nanououa Tatan bwa Iesu bon Natin te Atua? E aki. Te anera ae natin te Atua aei are karenakoaki mai karawa, e ataia raoi ae Iesu bon Natin te Atua ae ana moanibung. (IKoro. 1:) E bon atai naba Tatan taeka ake e taekin Iehova mai karawa ni bwabetitoan Iesu, ae kangai: “Bon Natiu ae I tangiria teuaei, ae I kakatonga irouna.” ( 15Mat. 3:17) Tao e kani kananououaa Iesu bwa e boni kona n onimakinaki Tamana ao n tabeakinna raoi ke e aki. N ana moani kariri are e na bitii atibu nakon te amwarake, ai aron ae e kangai Tatan: ‘Ngkana Natin te Atua ngkoe, e aera Tamam ngkai e aki katauraoa kanam n te rereua aei?’ N ana kauoua ni kariri, are e na ewenako man oon te tembora, ai aron ae e kangai Tatan: ‘Ngkana Natin te Atua ngkoe, ko onimakina raoi Tamam bwa e na kamanoko?’
4 E kabonganai naba ngkai aanga akanne Tatan. (2Kor. 2:11) E tataninga te tia Kariri n uaa are a a mamaara ke ni bwarannano taan taromauri ni koaua, ao e a ekiianako naba, ao e kakaraoia n te aro ae raba. (2Kor. 11:14) E kataia ni mwamwanaira bwa ti na kakoauaa ae e aki tangirira Iehova ke n akoira. E kataia naba te tia Kariri aei ni kairira bwa ti na kakoauaa ae e aki tau n onimakinaki Iehova, ao e na aki karaoi baike e beritan n ana Taeka. Ma boni keewe aika iowawa baikai. (Ioa. 8:44) Ti na kangaa n rarawa nako iai?
5. E kangaa Iesu ni kaekai moani kaririana ake uoua?
5 Iangoa aron Iesu ni kaekai moani kaririana ake uoua. E aki nanououa n tangirana iroun Tamana ao e onimakinna raoi. E aki tabwara Iesu ma e a tuka naba Tatan n arona ni mwanewei ana Taeka Tamana aika kairaki koreaia n te taamnei. E bon eti aron Iesu ni mwanewei kiibu ake a kaota aran te Atua ae Iehova. (TuaKau. 6:16; 8:3) E kaotia Iesu bwa e onimakina Tamana n arona ni kabongana Arana. E okoro aran te Atua ao e kamatoaaki iai ae E na kakororaoi ana berita nako. *
6, 7. Ti na kangaa n rarawa nakon ana kakaaitara aika raba Tatan?
6 Ti kona n rarawa nakon ana kakaaitara aika raba Tatan, ni kabonganaan Ana Taeka Iehova ao ni kananoan ara iango i aon nanon arana. Ngkana ti kakairi ni kiibu aika kabwarabwaraa ana tangira Iehova ao arona n tabeakinia taan taromauria, n ikotaki ma akana mamaara, ti kona n ekaanako iai ana kewe Tatan ae aongkoa e aki kona n tangirira Iehova ao n akoira. (TaiAre. 34:18; 1Bet. 5:8) Ao ngkana ti ururingnga ae e kakakoroa nanon arana Iehova, ti na kakoauaa ae e bon tau n onimakinaki iroura te tia Kakororaoi ana berita.—TaeRab. 3:5, 6.
7 Ma tera raoi ae e moanibwaia Tatan? Tera raoi ae e tangiria mairoura? E a mataata te kaeka ngke e a tabeka ana katenua ni kariri Tatan nakon Iesu.
“Katorobubua ni Bobaraaki n Taromauriai n Tii Teuana te Tai”
8. E kangaa Tatan ni kaota raoi te bae e tangiria n ana katenua ni kariri?
8 Wareka Mataio 4:8-11. N ana katenua ni kariri Tatan ao e a kaota raoi te bae tangiria. E kaotii nakon Iesu (tao n te miitara) “tautaeka n uea nako n te aonnaba ma tamaroaia,” ao e aki kaotii buakakaia nakoina. Ao e taku nakon Iesu: “N na anganiko baikai ni kabane ngkana ko katorobubua ni bobaraaki n taromauriai n tii teuana te tai.” * Te taromauriaki—bon te bae tangiria Tatan! E tangiria Tatan bwa e na kitana Tamana Iesu ao n atuana te tia Kariri. E angan Iesu te rinerine ae taraa ni bebete. E kaotia bwa a kona n reke iroun Iesu taiani mwaaka ni kabane ma kaubwain te aonnaba, ao n aki karawawataaki moa n te bau ae kateketeke, n te rekenikai, ao n te kai ni kammaraki. E korakora te kariri aei. E aki nanououa Iesu n ae tautaeka n te aonnaba aei bon ana bwai Tatan! (Ioa. 12:31; 1Ioa. 5:19) E boni bae Tatan ni kan angan Iesu bwaai nako bwa e aonga ni katannakoa man te taromauri ae itiaki ibukin Tamana.
9. (a) Tera raoi ae e tangiria Tatan mairouia taan taromauri ni koaua, ao e kangaa ni kataia ni karirira? (b) Tera ae irekereke ma ara taromauri? (Nora te bwaoki ae “Tera te Taromauri?”)
9 E bon tangiria naba ngkai Tatan bwa ti na taromauria ke n ekaanako nanon Iehova. Ngkai ngaia “atuan te waaki ae ngkai i aon te aba” nanona bwa taromauri aika kairua ake a karaoaki irouia ana Aro Baburon ae Kakannato, e a neboaki iai. (2Kor. 4:4) Ma e aki rauaki irouia taan taromauri ni kewe aika birion ma birion, ma e kani kariria naba taan taromauri ni koaua bwa a na ekaanako nanon te Atua. E kataia ni katikira nakon ukeran te kaubwai ma te kakannato n te aonnaba aei, n oneani mwin ae ti na ukera te maiu ni Kristian ae kona n irianaki n te kammarakaki “ibukin te raoiroi.” (1Bet. 3:14) Ngkana ti kariaia kaririakira ni kitana te taromauri ae itiaki ao n irekereke ma ana aonnaba Tatan, ai aron ae ti a bobaraaki iai n taromauria Tatan n tii teuana te tai ao n atuanna. Ti na kangaa n rarawa nakon te kariri anne?
10. E kangaa Iesu ni kaekaa kaririana are te katenua, ao bukin tera?
10 Nora aron Iesu ni kaekaa kaririana are te katenua. E kaota ana kakaonimaki ni koaua ae aki kaingingaki nakon Iehova, ngke e waekoa ni kanakoa te tia Kariri ni kangai: “An naako Tatan!” N aron are e karaoia ni moani kaririana ake uoua, e a manga mwanewea naba kanoan Te Tua-Kaua are e oti iai aran te Atua, ni kangai: “E koreaki ae kangai: ‘Ko riai n taromauria Iehova ae Atuam, ao ko riai n toro irouna n tii ngaia.’” (Mat. 4:10; TuaKau. 6:13) Mangaia are e rawa Iesu nakon tamaroan te nakoa ae bubura n te waaki ae kai mauna aei, ao nakon te maiu ae bebete ae aki karawawata. E ataia ae tii Tamana ae tau n taromauriaki, ao e ngae ngkana e ‘taromauria’ Tatan tii teuana te tai, ma e boni kaotia iai bwa e aantaeka nakoina. E teimatoa Iesu n rawa n atuana te tia Kariri ae buakaka aei. Ao e a “kitanna te Riaboro” ibukina bwa e teimatoa n rawa n ongo irouna. *
11. Ti na kangaa n rarawa nakon Tatan ma ana kariri?
11 Ti kona n rawa nakon Tatan ao nakoni kariri man ana aonnaba ae buakaka aei, bwa n aron Iesu, ti kona naba ngaira n rinea te bae ti na karaoia. E a tia Iehova n anganira te bwaintangira ae kakawaki ae inaomatara. Ngaia are akea ae e kona n taumatoaira bwa ti na kitana te taromauri ae itiaki, e aki naba konaa teuare mwaaka ae te tia Kariri ae buakaka. Ngkana ti kakaonimaki ni koaua ‘n tei ni kaitaraa Tatan, ao ni kaneneira n te onimaki’ ai aron ae ti kangai: “An naako Tatan!” (1Bet. 5:9) Uringnga are e kitana Iesu Tatan ngke e teimatoa n rawa nakoina. N aron anne, e karaui nanora te Baibara ni kangai: “Rarawa nakon te Riaboro, ao ane e na birinako mairoumi.”—Iak. 4:7.
Te Tia Kairiribai Nakon te Taromauri ae Itiaki
12. E kangaa Tatan ni kaotia i Eten, bwa bon te tia kairiribai ngaia nakon te taromauri ae itiaki?
12 N ana kabanea ni kariri Tatan, e a katerea iai bwa boni ngaia are moani kairiribai nakon te taromauri ae itiaki. Nga ma nga te ririki n nako n te onnaroka are Eten, ao e moani kaota iai Tatan ribaakin taromaurian Iehova. Ngke e mwamwanaa Ewa, ao Ewa e a manga kariria Atam bwa e na aki ongeaba n ana tua Iehova, e a kairiia iai naakai Tatan nako aan ana kairiri ao mwaakana. (Wareka Karikani Bwaai 3:1-5; 2Kor. 11:3; TeKao. 12:9) E bon riki bwa atuaia ao ngaiia a riki bwa taan taromauria, e ngae ngke a aki ataia bwa antai raoi are e burebureiia. Irarikina, ngke e kauekea te karitei are i Eten Tatan, e aki tii kananououaa iai mwaakan Iehova n tautaeka, ke riaina n tautaeka, ma e a ekaanako naba iai te taromauri ae itiaki. N te aro raa?
13. E kangaa n irekereke te taromauri ae itiaki ma kananououaan te mwaaka n tautaeka?
13 Iai irekerekeni kananououaan te mwaaka n tautaeka ao te taromauri ae itiaki. E bon tau n taromauriaki n tii ngaia te tia TeKao. 4:11) Ngke e karika Atam ma Ewa aika kororaoi Iehova ao e kamenaia n te onnaroka ae Eten, ao e kantaningaia bwa teutana imwin teutana ao e na buta te aonnaba irouia aomata aika kororaoi aika kukurei n taromauria, n te taromauri ae itiaki ae nako man nanoia aika itiaki. (KBwaai 1:28) E kananououaa mwaakan Iehova n tautaeka Tatan, ibukina bwa e mataaiakina te kan taromauriaki, ae te bwai ae riai n reke tii iroun te Uea ae Moan te Rietata ae Iehova.—Iak. 1:14, 15.
Tautaeka ni koaua, are Teuare “karikii bwaai ni kabane.” (14. E tokanikai Tatan n ekaanako te taromauri ae itiaki? Kabwarabwaraa.
14 E tokanikai Tatan n ekaanako te taromauri ae itiaki? E a tia ni katannakoa Atam ma Ewa mairoun te Atua. Ao man te tai anne are e a moana naba iai kaitaraan te taromauri ae koaua, ao ni kataia ni katannakoia aika a bati mairoun Iehova ae te Atua. E teimatoa Tatan ni kariria taan taromauria Iehova ake imwain aia tai Kristian. N te moan tienture C.E. ao e kaungaa te tannako man Mat. 13:24-30, 36-43; Mwa. 20:29, 30) Ni moan te kauoua n tienture C.E., ao taan taromauri a a taenikai ni kaineti ma aia onimaki irouni Baburon ae Kakannato, ae te botaki n Aro ae kewe ae katobibia te aonnaba. Ma e aki tokanikai Tatan n uruanakin ana kantaninga te Atua ni kaineti ma te taromauri ae itiaki. Akea ae e kona n tuka te Atua mani kakororaoan ana kantaninga. (Ita. 46:10; 55:8-11) E irekereke iai arana, ao e kakakororaoa nanon arana n taai nako. Iehova bon te tia Kakororaoi ana kantaninga ae e aki kona ni kabwaka!
te koaua, are e a kabarekaaki iai te ekaretia, ao n taraa ni maunanako iai te taromauri ae itiaki. (Te Tia Boutokaa te Taromauri ae Itiaki
15. Baikara bwaai ake e karaoi Iehova i Eten nakoia taani karitei, ao ibukini kamatoaan ae e na boni kakororaoaki ana kantaninga?
15 E waekoa Iehova ni karaoi bwaai tabeua i Eten nakoia taani karitei, ao ni kamatoaa bwa e na boni kakororaoaki ana Karikani Bwaai 3:14-19.) Ngke a boni mena naba Atam ma Ewa n te onnaroka, ao Iehova e a katuuaaeia naba taani karitei aika teniman aikai ni kaineti ma are e moani bure. E katuuaaea moa Tatan, imwina Ewa, ao te kabane Atam. Ni kaineti ma Tatan are te tia kauekea te karitei are a aki nora rabwatana Atam ma Ewa, e taetae ni burabetinna Iehova bwa e na iai te ‘kanoa’ ae e na kanakoraoa mwin te karitei anne. Te ‘kanoa’ ane beritanaki anne iai mwiokoana ae kakawaki, ni kakororaoan ana kantaninga Iehova ni kaineti ma te taromauri ae itiaki.
kantaninga. (Wareka16. E kangaa Iehova n teimatoa ni mwakuria kakororaoan ana kantaninga imwin te karitei are i Eten?
16 Imwin te karitei are i Eten, ao e teimatoa Iehova ni mwakuria kakororaoan ana kantaninga. E karaoi babaire ibukia aomata aika aki kororaoi bwa a aonga ni kona n taromauria n te aro ae boraoi ma nanona, n aron ae ti na noria n te mwakoro ae imwina. (Ebera 11:4–12:1) E kairiia naba taani korea te Baibara aika mwaiti, n ikotaki naba ma Itaia, Ieremia, ao Etekiera, bwa a na korei taetae ni burabeti aika kakaongora ibukini kaokan te taromauri ae itiaki. Te boto n iango ae kakawaki n te Baibara boni kaokan te taromauri ae itiaki. A na bane ni kakororaoaki taetae ni burabeti akanne iroun te ‘kanoa’ ae taekan Iesu Kristo. (IKar. 3:16) Iesu bon te tia Boutokaa te taromauri ae itiaki, n aron are e katerea raoi n ana kaeka nakoni kaririana are te katenua. Eng, bon Iesu are e rineia Iehova bwa e na kakororaoi taetae ni burabeti ibukini kaokan te taromauri ae itiaki. (TeKao. 19:10) E na kamaiuia ana aomata te Atua mani kataenikaiaia ni kaineti ma te onimaki, ao ni kaoka te taromauri ae itiaki nakon arona.
Tera ae Ko na Karaoia?
17. E aera ngkai a kakawaki iroura taetae ni burabeti aika n te Baibara ibukini kaokan te taromauri ae itiaki?
17 E kaunganano ma ni kakorakoraa te onimaki neneran taetae ni burabeti ibukini kaokan te taromauri ae itiaki. A kakawaki iroura taetae ni burabeti aikai, ibukina bwa ti ingainga nakon te tai are a nangi bane iai ana karikibwai te Atua i karawa ao n te aonnaba ni katiteuanaaki n te taromauri ae itiaki, ae taromaurian te Uea ae Moan te Rietata ae Iehova. A anganira naba te kantaninga ae raoiroi taetae ni burabeti akanne, ibukina bwa iai tabeua taeka aika rangi ni karaunano iai aika n Ana Taeka te Atua. Antai i buakora ae e aki ingainga nakon norani kakororaoan ana berita nako Iehova, n ikotaki naba ma kautaia aomata aika tangiraki iroura, te aonnaba ae bwaretaiti ni kabutaa, ao ai te maiu n aki toki ae kororaoi iai te marurung?—Ita. 33:24; 35:5, 6; TeKao. 20:12, 13; 21:3, 4.
18. Baikara baika ti na neneri n te boki aei?
18 N te boki aei ao ti na neneri iai taetae ni burabeti aika kakaongora aika ni bokin te Baibara ae Etekiera. A mwaiti mai iai aika boto riki i aoni kaokan te taromauri ae itiaki. Ti na maroroakina aron irekereken ana taetae ni burabeti Etekiera ma taetae ni burabeti riki tabeua, aroni kakororaoaia rinanoni Kristo, ao irekerekera iai.—Nora te bwaoki ae “Kabwarabwaraan te Boki ae Etekiera.”
19. Tera ae ko motinnanoia bwa ko na karaoia, ao bukin tera?
19 N rereuan Iutaia n 29 C.E., ao e kabwaka Tatan ngke e kataia ni katannakoa Iesu man te taromauri ae itiaki. Ma tera arora ngaira? E a kakorakoraa riki ngkai Tatan ni kani katannakoira man te taromauri ae koaua. (TeKao. 12:12, 17) E bia buokira te boki aei ni kakorakoraa riki ara motinnano bwa ti na rarawa nakon te tia Kariri ae buakaka aei. Ao ti bia kaotia n ara taeka ao n ara mwakuri bwa ti bon nanoraoi ma taeka aikai, “Ko riai n taromauria Iehova ae Atuam.” Ao ti nang nora kakororaoan ana kantaninga Iehova ae moan te tamaroa, ike a nang katiteuanaaki iai kaaini karawa ma aonnaba n angan Iehova te baere e bon riai n reke irouna, ae taromauriana ae itiaki ma nanora aika itiaki!
^ bar. 5 E ataaki te ara ae Iehova irouia tabeman n nanona ae “E Karaoia Bwa E na Riki.” E kaineti raoi ma nakoan Iehova ae te tia Karikiriki ao te tia Kakororaoi ana kantaninga.
^ bar. 8 E koreaki ae kangai ni kaineti ma ana taeka Tatan, n te boki teuana ae kabwarabwaraa te Baibara: “E oti n rongorongon te moani kataaki, are a kabwaka iai Atam ma Ewa . . . , bwa e boboto te titiraki i aon ae antai ae e na karaoaki nanona, Tatan ke te Atua, ae nanona raoi bwa antai ae riai n taromauriaki. E kamoamoaa i bon irouna Tatan bwa te atua, ae te bwai ae katauaki ibukin te Atua ae tii temanna.”
^ bar. 10 E karinani kariri aikai ana Euangkerio Ruka n aroia aika kakaokoro, ma e teretere bwa te boki ae Mataio e karinani ni kaineti ma ae moan riki. Iangoi bukina aika tenua. (1) E moana taekinan te kauoua ni kariri Mataio n te taeka ae “ao,” ni kaotia ae te bwai ae riki imwina. (2) Kariri ake uoua ake a karariki akekei, a uaia ni moanaki n te kibuntaeka ae, “Ngkana ngkoe temanna natin te Atua,” e otara iai bwa a na bon taorimwiaki n te kariri ae teretere raoi are e na urua te moan tua. (TeOti. 20:2, 3) (3) Ana taeka Iesu ae “An naako Tatan!” e tonu raoi ma kaekaan te katenua ni kariri are ai bon te kabane naba.—Mat. 4:5, 10, 11.