Otara Aika Kaetaki
Ni waakinakon taian ririki ao e a tia Te Taua-n-Tantani ni kaeta otara i aon tabeua kanoan ana taetae ni burabeti Etekiera. Iai kamataata riki tabeua n te boki aei ae Te Taromauri ae Itiaki Ibukin Iehova—E a Kaokaki! Noria ngkana ko kona ni kaekai titiraki aikai.
A tei ibukin tera ubu ake aua ake ubuia baike a maiu?
Te ota rimoa: A tei ubu ake aua ake ubuia baike a maiu ke kerubim akekei, ibukin aroaron Iehova aika aua aika kakawaki riki.
Kamatataana riki: E ngae ngke a tei ubu aika aua aika kakawaki riki aika ubuia baike a maiu ibukin aroaron Iehova aika aua, ma ngkana a taraaki ni kabane ubu ake aua akekei, ao a oti iai aroaron Iehova ni kabane. E katuruturuaki naba nakoira n ubu ake aua aron rianakoni korakoran Iehova ao mimitongina.
Bukini kaetan otara: E kakabonganaaki te ware ae aua n Ana Taeka te Atua ni kaota te bae akea te bwai ae tiku mai iai ke ae tabwanin raoi. Ngaia are ngkana ko tarai ni kabane ubu ake aua akekei, e bati riki ae nanonaki iai nakon ae tii aroaro aika aua aika rianako, ma a a riki bwa aan aroaron Iehova aika kamimi ma ni kakamaaku. Ubu aikai naba bon ubun te bae karikaki ae mimitong, te korakora, ao te mwaaka. Ma e ngae n anne, baike a korakora ake aman ake a tei ibukin te karikibwai n aron ae oti n ubuia kerubim ake kaka aua, a mena i nanoaan ana kaintokanuea Iehova. E katereaki iai bwa Iehova bon te tia Tautaeka ae Moan te Rietata i aoni bwaai ni kabane.
E tei ibukin antai teuare iai irouna nnen ana ingke te tia koroboki?
Te ota rimoa: Teuare iai irouna nnen te ingke e tei ibukia nikiraia taani kabiraki. Rinanon te uarongorongo ao te mwakuri ni karekeia taan rimwini Kristo, a a waaki iai taani kabiraki ni korea te kanikina ni kaikonaki i aon ramwaia naake a a kaaina te “koraki ae uanao.”—TeKao. 7:9
Kamatataana riki: E tei ibukin Iesu Kristo teuare iai irouna nnen ana ingke te tia koroboki. E na kanikinaeia te koraki ae uanao ngkana e a motikaki taekaia bwa tiibu n tain te “rawawata ae korakora.”—Mat. 24:21
Bukini kaetan otara: E mwiokoa Natina Iehova bwa e na motikitaeka. (Ioa. 5:22, 23) Ni Mataio 25:31-33 ao bon Iesu ae e na karaoa te kabanea ni motikitaeka bwa antai “tiibu” ao antai “kooti.”
Te koaua bwa taari aika kakabooaki aika Oora ma Ooriba boni bannan te botaki n Aro ake aongkoa Kristian, ae iai te iraraure iai i marenan te onimaki ni Katorika ao ni Boretetanti?
Te ota rimoa: E tei te karimoa ae Oora (Tamaria, kautun Iteraera), ibukin te Aro ni Katorika, ao e tei te karimwi are Ooriba (Ierutarem, kautun Iuta), ibukin te Aro ni Boretetanti.
Kamatataana riki: Taari aika kakabooaki aikai bon tiaki bannan te botaki n Aro ake aongkoa Kristian. Ma e buokira taekaia n ataa ana namakin Iehova irouia naake a boni kakaonimaki ni koaua nakoina ao imwina a a manga karaoa te mwakuri ni kakabooaki ni kaineti ma te onimaki. Anne naba ana namakin ibukia Aaro nako aika kewe.
Bukini kaetan otara: E aki taekinaki n te Baibara ae Oora ma Ooriba a bon tei ibukin te botaki n Aro ake aongkoa Kristian. A riki Iteraera ao Iuta bwa kaanga buun ngkoa Iehova aika kakaonimaki, ma bon akea te aeka n reitaki anne ma Iehova iroun te botaki n Aro ake aongkoa Kristian. Irarikina, kabotauaia ana aomata te Atua aika aki kakaonimaki ma aine aika kakabooaki ni mwakoro 16 ao 23 n Etekiera, e anga te kantaninga ni kaineti ma manga ikotakia ao kaokaia nakon te raoiroi. Ma bon akea te aeka ni kantaninga anne ibukin te botaki n Aro ake aongkoa Kristian, ae kaain naba Baburon ae Kakannato.
Te koaua bwa Ierutarem rimoa are tannako man te koaua boni bannan te botaki n Aro ake aongkoa Kristian?
Te ota rimoa: Ierutarem rimoa are aki kakaonimaki e tei ibukin te botaki n Aro ake aongkoa Kristian. Ngaia are kamaunaan Ierutarem bon te taetae ni burabeti ibukini kamaunaan te botaki anne.
Kamatataana riki: Aroia n aki kakaonimaki kaain Ierutarem, n aroia n taromaurii bouannanti ao ni kataabangaka te babakanikawai, ti a kauringaki iai aron te botaki n Aro ake aongkoa Kristian, ma ti aikoa manga iangoia ae Ierutarem rimoa boni bannan te botaki anne.
Bukini kaetan otara: Akea te bwai ni kakoaua n te Baibara ae boutokaa te banna aei. E kaokoro Ierutarem rimoa ma te botaki n Aro ake aongkoa Kristian bwa e tuai ngaia mani kakaraoa te taromauri ae itiaki. Ao Ierutarem e a tia ngkoa ni karekea kabwaraan ana bure teutana te tai iroun Iehova, ma bon akea te kantaninga anne ibukin te botaki n Aro ake aongkoa Kristian.
E kangaa ni kakororaoaki te miitara ae te mwarua ae a mena iai ri aika mwau?
Te ota rimoa: N 1918 ao a kataenikaiaki taani kabiraki irouni Baburon ae Kakannato, n te aro ae kaanga a a mate bwa e a kuri n toki iai aia mwakuri. E toki te kataenikaiaki ane e aki maan anne n 1919, ngke e a manga kakorakoraia Iehova ao ni mwiokoiia bwa taan tataekina te Tautaeka n Uea.
Kamatataana riki: E rangi ni maan te kataenikaiaki n te onimaki anne ao e a kamani waaki riki imwain 1918. E moa man te kauoua n tienture C.E. n uaa 1919 C.E. ao e boraoi anne ma maanin te tai n rikirake are n ana kaikonaki Iesu are taekan te uita ao te titania.
Bukini kaetan otara: A kataenikaiaki I-Iteraera rimoa i nanon te tai ae maan, ni moa man 740 B.C.E. n uaa 537 B.C.E. A kabwarabwaraaki ri aikai n ana taetae ni burabeti Etekiera bwa a “mwau” ke a “mwautakataka,” ae kaotia bwa naake a tei ibukin ri aikai kaanga a a tia ni mate i nanon te tai ae e a rangi ni maan. Ao e kabwarabwaraaki bwa manga kamaiuan ri aikai bon te bae riki teutana imwin teutana, ao e kainnanoa te tai ae maan teutana.
Tera ae nanonaki ni katomaani kaai aika uaai?
Te ota rimoa: Imwin te iraraure teutana te tai n tain te Moani Buaka Are Kabutaa Aonnaba, ao a a manga katiteuanaaki nikiraia taani kabiraki aika kakaonimaki n 1919.
Kamatataana riki: E katereaki n te taetae ni burabeti aei bwa Iehova e na katiteuanaia taan taromauria. Ma ni waakinakon te tai imwin 1919 ao a raonaki kaain te nikira aika kabiraki aikai, irouia te koraki aika ririkirake mwaitiia ake a kantaningaa te maeka n te aonnaba. A katiteuanaaki koraki aika uakoraki aikai n taromauria Iehova bwa kaanga tii te korakina.
Bukini kaetan otara: E aki kabwarabwaraaki n te taetae ni burabeti bwa e mwaoto te kai ao n riki bwa uamwakoro ao imwina e manga tomaaki. Ngaia are e aki kabwarabwaraaki n te taetae ni burabeti bwa e na bwenaua te koraki n aomata teuana ao imwina a na manga ikotaki. Ma e kabwarabwaraia koraki n aomata aika uakoraki aika kakaokoro aika a na katiteuanaaki.
Antai Koka mai Makoka?
Te ota rimoa: Koka mai Makoka bon te ara ni burabeti ibukin Tatan imwini karenakoana mai karawa.
Kamatataana riki: Koka mai Makoka e kaineti nakoia natannaomata aika ikotaki aika n te aonnaba, aika a na ekiianako taan taromauri ni koaua n tain te rawawata ae korakora.
Bukini kaetan otara: Ni kabwarabwaraani Koka n te taetae ni burabeti, bwa e na riki bwa kanaia mannikiba aika kaakang ao e na anganaki nneni kawenean te mate n te aonnaba, e oti iai bwa Koka bon tiaki te taamnei. Irarikina, titeboo taekan ana buaka Koka aei ma ae taekinaki n Taniera ao n Te Kaotioti, ae a na buakanaki ana aomata te Atua irouia natannaomata aika n te aonnaba.—Tan. 11:40, 44, 45; TeKao. 17:14; 19:19.
E nora te tembora n taamnei ae kakannato Etekiera ao n neweabaia, are e a manga kabwarabwaraa imwina riki te abotoro Bauro?
Te ota rimoa: Te tembora are n ana miitara Etekiera titeboo ma te tembora n taamnei are e kabwarabwaraa te abotoro Bauro.
Kamatataana riki: Te baere e noria Etekiera, bon tiaki te tembora n taamnei are tei n 29 C.E., ma bon te miitara ae kaota raoi aroni kaokan te taromauri ae itiaki are e taekinaki n te Tua Rinanoni Mote imwin te taenikai. E boboto ana kabwarabwara Bauro ni kaineti ma te tembora n taamnei, i aon ana mwakuri Iesu bwa te Ibonga ae Rietata ae Kakannato Riki, are e kakororaoia man 29 nakon 33 C.E. Te tembora are n ana miitara Etekiera, are akea iai taekan te ibonga ae rietata, e kaatuua taekani manga kaokan te taromauri ae itiaki are moanaki n 1919 C.E. Ibukin anne, ti aki ukeria riki bwa bannan tera bwain nako te tembora are n ana miitara Etekiera, n ikotaki ma abwaki ake iai. Ma e raoiroi riki iaiangoan reirei aika kona n reke man ana miitara Etekiera aei, ni kaineti ma ana kaetieti Iehova ibukin te taromauri ae itiaki.
Bukini kaetan otara: Iai baika kakawaki ae e kaokoro iai te tembora are n ana miitara Etekiera ma te tembora n taamnei. N te katoto, a bati taekan taian angakarea aika maan n ana tembora Etekiera, ma n te tembora n taamnei tii teuana te angakarea ae karaoaki iai “n tii te taina ma e manena n aki toki.” (Ebera 9:11, 12) N tienture ake imwain rokoni Kristo, ao e bon tuai ni boo ana tai Iehova ni kaotii koaua aika nano ni kaineti ma te tembora n taamnei.
