E tataekinaki ngkoa n ara boki bwa kaain Ierutarem ake taan tannako man te koaua boni bannan te botaki n Aro ake aongkoa Kristian. Aroia n aki kakaonimaki kaain Ierutarem, n ikotaki ma taromauriani bouannanti ao taabangakin te babakanikawai, ti a kauringaki raoi iai baika e kakaraoi te botaki n Aro aei. Ma n ririki aika tibwa nako, ao a a tia ara boki n ikotaki naba ma ae ko warekia aei, ni katoka kamanenaan te banna n taian taetae ni burabeti, ma tii ngkana e bon teretere n te Baibara. Iai te kakoaua man te Baibara ae kaotia bwa Ierutarem boni bannan te botaki n Aro ake aongkoa Kristian? Akea.

Iangoi baikai: E riki ngkoa Ierutarem bwa nibwan te taromauri ae itiaki, ma imwina a a manga tannako man te koaua kaaina. Ni kaitaraan anne, e tuai mani kakaraoa te taromauri ae itiaki te botaki n Aro ake aongkoa Kristian. Ni moa man teia n te kaaua n tienture C.E. ao e aki toki te botaki n Aro aei n tataekin reirei aika kewe.

Irarikina, imwini kamaunaan Ierutarem irouni Baburon, e a manga akoa te kaawa anne Iehova ao e a manga riki bwa nibwan te taromauri ae itiaki. Ma te botaki n Aro ake aongkoa Kristian, a bon tuai man akoaki iroun te Atua, ao ngkana a kamaunaaki n tain te rawawata ae korakora, a na bon aki manga noraki.

N iaiangoani baika a a tia n taekinaki aikai, tera ae ti kona n taekinna? Ngkana ti neneri taetae ni burabeti ake a kakororaoaki irouia kaain Ierutarem ake a aki kakaonimaki, ti kona ni kangai, ‘Ti a kauringaki n te baei ke n te baenne baika ti a nori ngkai iroun te botaki n Aro ake aongkoa Kristian.’ Ma n taraana ao bon akea te kakoaua man te Baibara ae taekinaki iai bwa Ierutarem boni bannan te botaki n Aro ake aongkoa Kristian.