TE BWAOKI N REIREI 19B
E a Riki te Timtim Bwa te Karaanga!
E iraanako te karaanga Etekiera are timtim man ana tabo ae tabu Iehova, ao e a riki n te kakai bwa te karaanga ae nano ae e aki koro teuana te maire raroana ao e a riki naba bwa te karaanga ae korakora! E nori kainnamwarake aika maiureirei i mataniwin te karaanga anne, aika karekea te amwarake ao te bwainnaoraki. Tera nanoni baikai ni kabane?
Te Karaanga ae Uotii Kakabwaia
TAAI AKE RIMOA: Ngke a okira abaia taenikai ao a a raanga naba kakabwaia nakoia, ngke a a uataboa kaokan te taromauri ae itiaki n te tembora
TAAI AIKAI: N 1919 ao e a kaokaki te taromauri ae itiaki, are e a kauka te kawai are a a raanga iai kakabwaia ni kaineti ma te onimaki nakoia ana toro te Atua aika kakaonimaki, n te aro ae tuai n nonoraki mai mwaina
TAAI AIKA IMWAIRA: Imwin Aremaketon ao a na raanga ana kakabwaia Iehova n te itera n rabwata ao n te onimaki naba
Te Ran ae Kakamaiu
TAAI AKE RIMOA: E rangi ni kakabwaiaia ana aomata aika ongeaba Iehova, n aki ongea rikirakeni mwaitiia ma e bon taraia bwa a na bane ni maiureirei n te onimaki
TAAI AIKAI: N te bwaretaiti n taamnei ae ririkirake aei, a ririkirake riki mwaitiia aomata ake a kakabwaiaaki man ana koaua te Baibara, ao a a reiakina taekan Iehova ao n raonia naake a taromauria n te aro ae e kukurei iai
TAAI AIKA IMWAIRA: A na raonaki naake a maiu imwin Aremaketon irouia naake a na kautaki aika mirion ma mirion, ao e na rangi ni bati ana kakabwaia Iehova ibukia ni kabane
Kaai Ibukin te Amwarake ao te Bwainnaoraki
TAAI AKE RIMOA: Ni kaineti ma te onimaki, e kaamwarakeia ana aomata aika kakaonimaki Iehova n abaia ae kaokaki. E kamarurungia naba ao ni katoki aorakia ni kaineti ma aia onimaki ake a a maan n taonaki iai
TAAI AIKAI: A buokaki aomata man amwarake n taamnei aika katauraoaki, ni kaitaraa te aoraki ma te baki ni kaineti ma te onimaki ae kabutaa te aonnaba ngkai
TAAI AIKA IMWAIRA: A na buokiia aomata aika ongeaba Kristo ma raona n tautaeka ake 144,000 bwa a na kororaoi ao ni marurung ma ni korakora n aki toki!
