E boni bae Etekiera n nonori i matan taiani baareti ma tembora bouannanti aika totoa aika kaao mwaane ao raian aika iai baia ni kiba ao atuia atun te aomata. A kona n noraki aeka ni bouannanti aikai i aon Aturia ao Baburon rimoa. N aroia aomata nako, e bae naba Etekiera ni mimiakini bouannanti aikai, ngkai tabeua mai iai e nakon 6 te mita rietaia. Ma e ngae ngke a taraa n rangi ni korakora maan aikai, ma a bon aki maiu bwa bon atibu aika kaaraki.

Ma baike aman ake e nori Etekiera n te miitara boni “baika maiu.” Ai kaokorora! E bae n rangi n rotaki Etekiera n norakini baikai, bwa e mwanewea te taeka ae “baika maiu” 11 te tai ni kabwarabwaraan ana taetae ni burabeti. (Etek. 1:​5-22) E bae ni korakora rotakin Etekiera n norakin te miitara ae baika maiu aika aman ake a kaai ni kiba n te tai ae tii teuana ao n nakon te tabo ae tii teuana, i nanoaan ana kaintokanuea te Atua. E oti raoi iai ae Iehova e tautaekani ana karikibwai ni kabane. E korakora naba ngkai rotakira n te miitara anne, ibukini korakoran ao mwaakan Iehova, ao rineni mwaakana n tautaeka.​—1Rong. 29:11.