Nakoimi Ngkami Aika Kam Tangira Iehova:

N 1971 ao a rangi ni kukurei naake a kaea te Bwabwaro ae te “Divine Name” ae karaoaki n te ririki anne, ngke a a karekei aia boki tabeua aika boou. A taekinaki booki aikai bwa “e a riaon ae e kona n iangoia temanna.” E taku te tari te mwaane temanna ibukin teuana mai buakoni booki akana boou akana otinako akanne: “E kaotii baika nang riki nakon taai aika imwaira n te aro ae te kabanea n raoiroi!” Te boki raa ae e kananonaa teuaei? Bon te boki ae atuna, “The Nations Shall Know That I Am Jehovah”​—How? Ma e aera ngkai e kakimwareirei te boki aei? Ibukina bwa iai i nanona kabwarabwara aika kaboouaki ibukin taian taetae ni burabeti aika ni bokin te Baibara ae Etekiera, aika irekereke ma maiuia aomata nako nakon taai aika imwaira.

N ririki ake imwin otinakon te boki ae ‘Know Jehovah’ ao e a waekoa ni birirake mwaitiia ana aomata te Atua man 1.5 te mirion tabun nakon 8 tabun te mirion. (Ita. 60:22) Ana toro Iehova aika iraua te mirion mwaitiia aikai a nako man taetae aika kakaokoro aika raka i aon 900. (Tek. 8:23) A bati aika a tuai n reiakina te boki ae kabwarabwarai raoi taetae ni burabeti ake e korei te burabeti ae Etekiera ni kairana n te taamnei.

Ma i nanon tatabebwi te ririki man 1971, ao e a rarakarake otara i aoni koaua aika bati man te Baibara n aron te oota ae ririkirake otana. (TaeRab. 4:18) N 1985 ao ti a mataata raoi bwa a kangaa “tiibu tabemwaang” n taekinaki bwa a raoiroi ao n riki bwa raoraon te Atua. (Ioa. 10:16; IRom 5:18; Iak. 2:23) Ao n 1995 ti a tibwa mataata raoi ae ngaia e na waakinaki te kabanea ni motikitaeka ibukia “tiibu” ma “kooti” n tain “te rawawata ae korakora” ae imwaira. (Mat. 24:21; 25:​31, 32) Otara aikai ni kabane aika kamatataaki riki a a kaotaira n te boki ae Etekiera.

N ririki aika tibwa nako ao e a ririkirake riki te oota. Iangoi reireiara man ana kaikonaki Iesu. A bati mai buakon reirei aikai aika ti a rangi ni mataata raoi iai ngkai. Iai tabeua mani kaikonaki aikai ake a kaineti nakoni baike a nang riki n tain te rawawata ae korakora ae nang roko aei. N aron naba anne, a a tia ni kamatataaki riki otara i aon taian taetae ni burabeti ake n te boki ae Etekiera. N aron tabeua mai iai, taekani Koka mai Makoka (mwakoro 38 ao 39), ana mwakuri teuare iai irouna nnen ana ingke te tia koroboki (mwakoro 9), ao te mwarua are a mena iai taian ri aika mwau ma te kaikonaki ni kaineti ma katomaani kaai aika uaai (mwakoro 37). Kamataata aikai ni kabane, kaanga ai aron ae a kabooui baike a koreaki iraua te ririki n nako n te boki are ‘Know Jehovah.’

Maroaka ae a bati ana aomata Iehova aika a tititiraki ni kangai: “Ti na karekea n ningai te boki ae e na kabooui kabwarabwaraan ana taetae ni burabeti Etekiera?” Te boki ae Te Taromauri ae Itiaki Ibukin Iehova​—E a Kaokaki! boni ngaia te boki anne. Ngkana ko wareki mwakorona aika 22 ao ni kananoa am iango i aoni kaikonaki aika tamaroa aika taekinaki iai, ko na boni mimi n taiani kakaae ni kabane aika karauaki raoi ni karaoaki ibukini katauraoan te boki aei. E bati tataroakinan ae e aera Iehova ngkai e katauraoa bokin te Baibara ae Etekiera ae kakannongora aei. A rinanoaki raoi titiraki aika ai aron aikai: Baikara reireiaia naake a maiu n ana bong Etekiera ao ngaira naba ni boong aikai, man te boki ae Etekiera? Baikara taetae ni burabeti aika taekini baika a na riki n taai aika imwaira? Te koaua bwa ti  riai n iangoia bwa baika taekinaki n Etekiera ake a riki ngkoa boni kaikonakani baika a na riki imwina riki? Kaekaan titiraki aikai, a a karekea te ota ae te kabanea ni mataata n te boki ae ti warekia aei.

Ngkana ko wareka te boki ae Etekiera mai moana n uaa tokina, e na bon rangi n anaaki nanom n iteran ana botaki Iehova are i karawa. Ko boni mimi naba n ana kaetieti Iehova aika rangi n rietata ake e katei ibukia kaaini karawa ao kaain te aonnaba ake a kan taromauria n te aro ae E kukurei iai. E na buokiko te boki ae Te Taromauri ae Itiaki ni karikirakea am kakaitau ibukin te baere e a tia ni karaoia Iehova ibukia ana aomata ao ae e na karaoia naba ibukia n te tai ae e a kaan roko ngkai. Ko na noria bwa e okioki te boki aei ni katuruturui booto n iango aika uoua. Te moan, ibukini kakukureian Iehova, ti riai n ataia ao ni kakoauaa ae boni ngaia te tia Tautaeka i aoni Bwaai ni Kabane. Te kauoua, ti riai n taromauria Iehova n aron ae tangiria, ao ni kaboraoa maiura ma ana kaetieti aika rangi n rietata.

Bon ara kantaninga bwa e na kamatoaa am motinnano te boki aei n taromauria Iehova, n te aro ae e na karineaki iai arana ae kakannato ma n tabu. Ao e bia kaungako naba bwa ko na teimatoa ni kantaningaa te tai are a nangi bane iai natannaomata n ataia ae Iehova ngaia.​—Etek. 36:23; 38:23.

Ke e kakabwaiaa am kakorakora Tamara ae tatangira ae Iehova, bwa ko na ota n te boki ae kaira koreana rinanon te burabeti ae Etekiera.