E kaoia aomata n aekaia nako te Atua bwa a na kaania n te tataro. (Taian Areru 65:2) Ma e aki ongoraei ke ni butimwaei tataro ni kabane. N te katoto, e kona n tutukaki ana tataro te mwaane ae iowawa nakoni buuna. (1 Betero 3:7) Ngke a teimatoa ni karaoa ae buakaka tibun Iteraera, ao e rawa te Atua n ongoraei aia tataro. E teretere bwa bon te kakabwaia nakoira ngkai ti kona n tataro. Ma e ngae n anne, e na bon ongoraei te Atua aia tataro taani bure ngkana a rairi nanoia.​—Wareka Itaia 1:15; 55:7.

Te tataro bon iteran ara taromauri, ngaia are ti riai n tataro tii nakon Iehova ae ara tia Karikiriki. (Mataio 4:10; 6:9) Kioina ngkai ti aki kororaoi, ti riai naba n tataro i nanon aran Iesu ibukina bwa e mate ibukin ara bure. (Ioane 14:6) E aki tangiria Iehova bwa ti na kaokiokii ke ni kamatenikunai ara tataro, ma e tangirira bwa ti na tataro mai nanora.​—Wareka Mataio 6:7; I-Biribi 4:6, 7. 

E kona naba ara tia Karikiriki n ongoraei tataro aika ti taekin i nanora n aki kanenei bwanaara. (1 Tamuera 1:12, 13) E kaungaira bwa ti na tataro n taai nako, ngkana ti uti n te ingabong ao imwaini matura n te tairiki, ngkana ti amwarake ao ngkana ti kaaitara ma kangaanga.​—Wareka Taian Areru 55:22; Mataio 15:36.

E aki bebete kaanian te Atua ibukina bwa ti maeka i buakoia aomata aika a aki onimakina te Atua, ao a kakanikoa ana berita ibukin te rau i aon te aba. (2 Timoteo 3:1, 4; 2 Betero 3:3, 13) Mangaia are ti riai ni bobotaki ma raora n te onimaki ibukin te ikaungaunga i marenara.​—Wareka I-Ebera 10:24, 25.

 Ti kona ni kaaniaki ma te Atua ngkana ti bobotaki ma te koraki ake a tangira te Atua. Ti kakabwaiaaki n aia botaki Ana Tia Kakoaua Iehova, bwa ti kaungaaki iai n aia onimaki tabemwaang.​—Wareka I-Rom 1:11, 12.

Ko kona ni kaaniko ma Iehova ngkana ko iaiangoa raoi te baere ko a tia n reiakinna man ana Taeka. Iaiangoi baika ko kona n reiakin man ana mwakuri, ana kairiri, ao ana berita. Ti kona ni karikirakea i nanora te kakaitau ni koaua ibukin ana tangira te Atua ao wanawanana, ngkana ti kananoi ara iango ao n tataro.​—Wareka Iotua 1:8; Taian Areru 1:1-3.

Ko kona ni kaaniko ma te Atua tii ngkana ko mwiokoia ao n onimakinna. Ma te onimaki kaanga ai aron te aroka ae riai n ribanaaki raoi. Ko riai ni wantongaa am onimaki n taai nako ni kauringi baike ko a tia n reiakin.​—Wareka Mataio 4:4; I-Ebera 11:1, 6.

A tabeakinaki iroun Iehova te koraki ake a tangiria. E kona ni kamanoia mani baika a na uruana aia onimaki ao aia kantaninga ibukin te maiu are aki toki. (Taian Areru 91:1, 2, 7-10) E anganira te kauring ni kaineti ma aroaroni maiura ake a na uruani marurungira ao kukureira. E reireinira Iehova aroaroni maiura ae te kabanea n tamaroa.​—Wareka Taian Areru 73:27, 28; Iakobo 4:4, 8.