“Kam riai n . . . riki bwa taan angareirei.” (Ebera 5:12) Iangoia! E kaoira Iehova ae te tia Reirei ae te kabanea n raoiroi n te iuniweeti, bwa ti na reiakinia tabemwaang taekana! Mwiokoara ae te angareirei n taekan te koaua ibukin Iehova nakoia kaain ara utu, kaain te ekaretia, ke n ara mwakuri ni minita, bon te tibwanga ae kakawaki ao e kangaanga naba. Ma ti na kangaa n tokanikai?

E reke kaekaan anne n ana taeka te abotoro Bauro are e koreia nakon Timoteo, ae kangai: “Teimatoa ni katabetabeko imwain rokou, n te wareware i mataia aomata, n te kaungaunga, ao n te angareirei.” E reitia ni kangai: “Ngkana ko karaoa aei, ko kamaiuko iai ma ake a ongo iroum.” (1Tim. 4:​13, 16) Bon te rongorongo ni kakamaiu ae ko riai n tataekinna. Ngaia are e kakawaki bwa ko na kanakoraoa am wareware ao am angareirei. E katauraoaki te boroutia aei ibukini buokam. Iangoi kanoana tabeua.

Iehova bon te “tia Reirei ae Moan te Kakannato.” (Ita. 30:20) E ngae ngke e na buokiko te boroutia aei ni katamaroaa riki rabakaum ni wareware ao n angareirei, ma tai mwaninga ae Iehova bon Nibwan te rongorongo ae ti tataekinna ao boni ngaia ae katikiia aomata. (Ioa. 6:44) Ngaia are katoatai n tataroa te taamnei ae raoiroi. Katoatai ni kamanena Ana Taeka te Atua. Kairiia aomata bwa a na kamoamoaa Iehova ao a na aki kamoamoako. Kakorakorako ni karikirakea i nanoia taan ongora, tangiran Iehova ae nene.

Ko kaoaki bwa ko na reiakinia aomata taekan te rongorongo ae te kabanea ni kakawaki. Ti kakoauaa ae ngkana ko onimakina “te korakora are reke mairoun te Atua,” ko na bon tokanikai.​—1Bet. 4:11.

Raomi n angareirei,

Te Rabwata n Tautaeka Ibukia Ana Tia Kakoaua Iehova