MAIURA NI KRISTIAN
Karikirakean Rabakaura n te Mwakuri ni Minita—Kamanenaan Titiraki n te Aro ae Uaana
BUKINI KAKAWAKINA: Ngkana “iango ake i nanon te aomata kaanga ai aron te ran are i nano i nano,” ngkanne taian titiraki ai aron te roa ae e na itia te ran anne. (TNR 20:5) Ti buokaki n tabekan titiraki bwa ti na karinia taan ongora i buakon ara maroro. Kaekaan titiraki aika beberinoaki e kona n ibuobuoki nakon te tia reirei. E kakabonganai Iesu titiraki n te aro ae uaana. Ti na kangaa ni kakairi irouna?
ARONI KARAOANA:
-
Tabeki titiraki aika kaota te iango. E tabeki titiraki Iesu teuana imwin teuana bwa e kan atai aia iango taan rimwina. (Mt 16:13-16; be-E 238 ¶3-5) Baikara titiraki aika ko na tabeki aika kaota te iango?
-
Tabeki titiraki aika kaira te iango. Ngke e kaeta Iesu ana iango Betero, e tabeki titiraki ma kaekaaia ae e kona ni kaeta iai ana iango Betero. (Mt 17:24-26) Baikara titiraki aika kaira te iango ake ko kona n tabeki ni kaeta iai ana iango temanna?
-
Kamoamoaa ane e ongora iroum. Ngke e “kaeka ma te wanawana” te tia koroboki temanna, e a kamoamoaaki iroun Iesu. (Mrk 12:34) Ko na kangaa ni kamoamoaa temanna ae kaekaa te titiraki teuana?
MATAKU NI MOAN ITERAN TE TAAMNEI AE KARAOA TE MWAKURI ARE E KARAOIA IESU—TE ANGAREIREI, AO KAEKAI TITIRAKI AIKAI:
-
E aera bwa e aki raoiroi te katoto ibukin te angareirei aei, e ngae naba ngkana e eti te rongorongo?
-
E aera ngkai ti riai ni karaoa ae bati riki nakon tii kabwarabwaraan te rongorongo?
MATAKU NI KAUOUAN ITERAN TE TAAMNEI, AO KAEKAI TITIRAKI AIKAI:
-
E kangaa te tari te mwaane anne ni kamanenai titiraki n te aro ae uaana?
-
Baikara ana anga n angareirei riki tabeua ake ti kona ni kakairi iai?