N te Kauabong, n Eberi 11, a bati taari ake a katoka reitakia ma te ekaretia aika a na ira te Kauring. A a tia ni moanna ni biri n te kabobirimwaaka ibukin te maiu ma a a manga kekerikaaki i aani bukina aika kakaokoro, ake tabeua mai iai a taekinaki n te boroutia ae Okira Iehova. (Ebr 12:1) E ngae n anne, a teimatoa taari aikai ni kakawaki i matan Iehova, bwa e kabooia n raraan Natina. (Mwa 20:28; 1Be 1:18, 19) Ti na kangaa ni buokiia bwa a na okira te ekaretia?

A ukeriia ao ni buokiia Kristian ake a katoka reitakia ma te ekaretia unimwaane, n aron te tia kawakintiibu ae taningamarau n ukeriia ana tiibu ake a tiotionako man te nanai. (Rk 15:4-7) E kaotaki n aei ana mwamwannano Iehova. (Ier 23:3, 4) Ti bane ni kona ni kaungaia nakanne ao tiaki tii unimwaane. E kukurei Iehova ngkana ti kaotiota te akoi ao tangiraia tarira ao e kona n rangi n uaana ara kakorakora iai. (TNR 19:17; Mwa 20:35) Ngaia are iangoa temanna ae ko na kaungaa, ao waekoa ni karaoia!

MATAKU N TE TAAMNEI AE KAUNGAIA NAAKE A KATOKA REITAKIA MA TE EKARETIA, AO IMWINA RINANOI TITIRAKI AIKAI:

• Tera are e biririmoa ni karaoia Abbey ngke e kaitiboo ma te tia Kakoaua temanna are e aki kinaa?

• E aera bwa ti riai ni kawariia unimwaane ngkana ti iangoa buokan temanna ae e a katoka reitakina ma te ekaretia?

• Tera aron Abbey ni katauraoi ibukini kawaran Laura n te kauoua n tai?

• E kangaa Abbey ni kaota te nanomwaaka, te taotaonakinnano, ao te tangira ngke e kataia ni kaungaa Laura?

• Tera reireiara man ana kaikonaki Iesu n Ruka 15:8-10?

• Baikara kakabwaia imwin taiani kakorakora ibukini buokan Laura?