E rangi ni kakawaki te kabanea n Toa ae te Riao are e karaoia Iesu. Ibukina bwa e a uakaani matena, e baireia bwa e na katoonga amwaraken te Toa ae te Riao ma ana abotoro ao ni kaota nakoia te bae boou ae a na kakauringnga ni katoa ririki, ae Ana Katairiki te Uea. Ngaia are e a kanakoa Betero ma Ioane bwa a na katauraoa te ruu. (Rk 22:​7-13; nora te taamnei ni moan te boki n reirei aei.) Ti a kauringaki iai bwa ti riai ni katauraoi ibukin te Kauring ae ni Maati 27. A bae n tia Ekaretia nako ni bairea te tia kabwarabwara, banna, ao tabeua riki. Ma tera ae ti kona ni karaoia n tatabemanira nako bwa ti aonga n tauraoi nakon te Kauring?

Katauraoa nanom. Wareka ao kananoa am iango n te wareware n te Baibara Ibukin te Kauring. E kona n reke te kaetieti n Neneran te Baibara ni Katoabong. Iai te kaetieti ae bwarabwara riki n te Bukinibaa B12 n te Baibara ae manga rinanoaki ae Te Rairai ae te Aonnaba ae Boou. (Nora naba Te Boki n Reirei ae Maiura ao Ara Mwakuri ni Minita ae bwain Eberi 2020.) A kona utu nako ni kabongana naba te Watch Tower Publications Index ke te Research Guide for Jehovah’s Witnesses n aia taromauri n utu, n nora iai kakawakin te kaboomwi.

Kaoia aomata nakon te kauring. Uataboa karaoan te mwakuri ae kaoaia aomata. Iangoiia naake ko kona ni kaoia, n aroia naake ko okiokiriia, am reirei n te Baibara ngkoa, naake ko kinaia, ao ai am koraki. A riai n taraia raoi unimwaanen te ekaretia bwa a na kaoia taari ake a a manga tuai n uarongorongo. Uringnga ae ngkana iai ae e a aki maeka n am aono, ko kona ni kakaaea te tai ao te tabo ibukin te Kauring n te tabo are maeka iai, ngkana ko nakon jw.org ao ko kotea are mai eta ae RONGORONGORA ao imwina “Te Kauring.”

Tera riki ae ti kona ni karaoia bwa ti aonga n tauraoi?