N te tai ae rangi ni waekoa ao e nang toki ana taotaonakinnano Iehova ibukin te waaki ae ngkai. A na kamaunaaki Aaro aika kewe, a na buakania ana aomata te Atua natannaomata aika ikotaki, ao Iehova e na boni kamaunaia aika buakaka n Aremaketon. A ingainga Kristian nakoni bwaai aika a na riki aika rangi ni kakawaki aikai.

Ti bon aki atai bwaai ni kabane ni kaineti ma te rawawata ae korakora. N te katoto, ti aki ataia bwa e na moanaki n ningai anne. Ti aki ataia bwa tera ae a kairaki iai tautaeka bwa a na buakania Aaro. Ti aki ataia bwa e na maanra buakanaia ana aomata te Atua irouia natannaomata ke tera riki ae a na karaoia. Ti aki naba ataia raoi bwa tera ae e na kamanena Iehova ni kamaunaia iai aika buakaka n Aremaketon.

Ma e kaotii rongorongo ni kabane te Baibara ake ti riai n atai bwa ti aonga ni kaaitarai baika a na riki n taai aika imwaira ma te aki maaku ao te ninikoria. N te katoto, ti a ataia ae ti a maeka n raatokini “kabaneani boong.” (2Ti 3:1) Ti ataia ae e na “kakimototoaki” buakanakia Aaro bwa e aonga n aki kamaunaaki te Aro ae koaua. (Mt 24:22) Ti ataia ae Iehova e na boni kamaiuia ana aomata. (2Be 2:9) Ao ti ataia naba ae e raoiroi ao ni mwaaka Teuare e rineia Iehova bwa e na kamaunaia aika buakaka ao ni kamanoia te koraki ae uanao n Aremaketon.—Kao 19:11, 15, 16.

A na boni “kuri n tong aomata ibukini kororakeni maakuia” ni baika a na riki n taai aika imwaira. Ma ngkana ti wawareki ao ni kananoi ara iango i aon ana mwakuri ni kakamaiu Iehova ake rimoa ao i aoni baike e a tia ni kaotii ibukin taai aika imwaira, ti na kona n ‘teirake ni kaetiira raoi ma n euti atura,’ ma te aki maaku ngkai e a kaan roko kamaiuara.—Rk 21:26, 28.