E tataekina “te rongorongo ae raoiroi ae taekan ana Tautaeka n Uea te Atua” Iesu.” (Rk 4:43) E reireinia naba aomata bwa a na tataroa te Tautaeka n Uea anne. (Mt 6:9, 10) I nanon Nobembwa, ti na karaoa te mwakuri ae okoro ibukin tataekinan Ana Tautaeka n Uea te Atua. (Mt 24:14) Bairea am tai bwa ko aonga n uataboa naba karaoan te mwakuri ae okoro aei. Naake a beku bwa bwaiania aika a aki katoatai a na karekea 30- ke 50-te aoa n te namwakaina anne.

Maroroakina te kibu ae kaineti ma Ana Tautaeka n Uea te Atua nakoia aomata aika bati n am aono n aron ae ko kona. Ngkana ko na rinea am kibu, iaiangoa aia koaua n aia Aro naake ko na maroro ma ngaiia. Ngkana iai ae kaota te kan ongora ni moani kawarana, anganna katoton Te Taua-n-Tantani Na. 2 2020 are ibukia aomata nako. Imwina, waekoa n okira te aomata anne, ao ni kataia naba ni moana te reirei n te Baibara ma ngaia ni kamanenaan teuana ara boki man Ara Bwai ni Mwakuri Ibukin te Angareirei. E a kaan te tai are e nang roko iai Ana Tautaeka n Uea te Atua ni kamaunai tautaeka ni kabane aika kaitaraa. (Tan 2:44; 1Ko 15:24, 25) Ngaia are ti bia kaota onimakinan Iehova iroura ao Ana Tautaeka n Uea n arora n uataboa karaoan te mwakuri ae okoro aei!