Man 2018 ao ai tii teuana te kaongora n ara maekatin are ibukia aomata nako. Maekatin aikai boni kanoan naba ara Bwai ni Mwakuri Ibukin te Angareirei. Ngaia are ti kona ni kamanenai n te mwakuri ni minita. Ti kona n uouotii naba tabeua ngkana ti mwamwananga ke ti boobwai. A aki katauraoaki maekatin aikai ibukin te reirei n te Baibara ma aomata, ma a kona ni kaira temanna bwa e na kan reiakina taekan te Atua.

Imwini moanakin te maroro, wareka te kibu teuana ao maroroakina kanoan te maekatin ae e na anainano. N te katoto, ngkana iai ana utu ke tao e rinanon te rawawata ke te tabeaianga, ko kona ni kangai: “I a tibwa tia ni wareka te kaongora teuana i aon anne. I kona ni kaotia nakoim?” Ngkana ko taku bwa e kan ongora, ko kona n anganna te maekatin ke ko kona ni kanakoa katotona nakoina rinanon te intanete, e ngae naba ngkana ai tibwa moani kawarana. E ngae ngke tiaki tiara te kabuti maekatin, ma a kona maekatin aikai ni buokira ni karekeia aika kani maiuakini baike a reiakin.​—Mwa 13:48.