Te Maroro ae Reeanau: Tai iangoia bwa ko riai ni kabwarabwarai bwaai ni kabane. E kabonganai titiraki Iesu ni buokiia aomata bwa a na iango ao n reke otaia ae eti. (Mt 17:24-27) E kaungaa te reirei tabekan titiraki ao ko buokaki iai n ataia bwa tera otan ane ko reirei ma ngaia ao tera ae e kakoauaa. (be 253 ¶3-4) Ngkana ko tabeka te titiraki, bwaina te taotaonakinnano ao taningaa ana kaeka. Ngkana e bure ana kaeka, tai taekina rekena ma tabeki riki titiraki ake a na kairia bwa e na eti otana iai. (be 238 ¶1-2) Karaua am maroro bwa e aonga n ota raoi ane ko reirei ma ngaia n reirei aika boou.—be 230 ¶4.

Te Angareirei ae Aki Ota Raoi: Rarawa ni kan taekini bwaai ni kabane ake ko atai ni kaineti ma te reirei. (Io 16:12) Kaatuua am iango n te boto n iango ae kakawaki n te barakirabe. (be 226 ¶4-5) A kona n aki mataata raoi booto n iango aika kakawaki n te kabwarabwara ae reeanau, e ngae naba ngkana e kakaongora. (be 235 ¶3) Ngkana e a mataata raoi n te boto n iango ae kakawaki ane ko reirei ma ngaia, kibara te barakirabe are imwina.

Tii Kabwarabwaraan te Reirei: Tiara bwa ti na rota te nano, tiaki tii kabwarabwaraan te reirei. (Rk 24:32) Kabongana raoi mwaakan Ana Taeka te Atua ni kaira te iango nakoni kiibu aika kakawaki ake n te reirei. (2Ko 10:4; Ebr 4:12; be 144 ¶1-3) Kabonganai kaikonaki aika bebete. (be 245 ¶2-4) Iaiangoi ana kangaanga ma ana koaua te aomata ae ko reirei ma ngaia, ao kaangaraoa te reirei nakoina. Tabeki titiraki n aron aikai: “Tera am namakin n te bae ko reiakinna aei?” “Tera reireiara iai ibukin Iehova?” “Tera kakabwaiaam ni maiuakinan te reirei ni kairiri anne?”—be 238 ¶3-5; 259 ¶1.