E reke ana anga n uarongorongo Iesu n te tai ae aki baireaki nakon ainen Tamaria, ibukina bwa e moana te maroro ma ngaia. Ti na kangaa ni karikirakei rabakaura ni moana te maroro ma aomata aika ti aki kinaia?

• Bwaina te momoaaomata ao maroro ma aomata. E ngae ngke e kua Iesu, ma e reke moanakin ana maroro tii man arona ni bubutii nimana te ran. Ngaia are ko kona ni moana am maroro n te kamauri ao tao imwina taekina kanoan te bong ke te bwai ae riki n te tai anne. Uringnga bwa tiara ae kakawaki boni moanakin te maroro, ngaia are maroroakina te bwai ae kona n anaaki iai nanon te aomata. Ngkana e aki kan ongora, tai kabwaraa nanom. Manga kataia nakon temanna. Butiia Iehova te ninikoria.—Ne 2:4; Mwa 4:29.

• Tauraoi n taekina te rongorongo ae raoiroi n te tai ae angaraoi, ma tai ienikuri. Kariaia bwa e na waakinako te maroro n iraorao. Ngkana ko karina ni bita te maroro, e na bae n aki kan ongora te aomata ao ane e na katoka te maroro. Tai kabwaraa nanom ngkana e a moti naba ami maroro ao ko tuai n taekina te rongorongo. Ngkana e kangaanga iroum moan tabekan am uarongorongo, kataneiako moa n tii moana te maroro ma aomata ao ko aki uarongorongo. [Kaota taamnei 1 ao maroroakinna.]

• Kataia ni karekea angam n uarongorongo n arom n taekina am onimaki, ae kona ni kauekea nanon te tia ongora bwa e na titiraki. E kabonganai Iesu taeka aika anainano are e a anaaki iai nanon neierei bwa e na titiraki. Ni kaekaekaan ana titiraki neierei, e a bon taekina iai te rongorongo ae raoiroi Iesu. [Kaota taamnei 2 ao maroroakinna, imwina taamnei 3 ao maroroakinna.]