E riai te tia takaakaro n teimatoa ni kataneia ana mwatireti bwa e aonga n teimatoa ni mwaatai. N aron naba anne, ti riai n teimatoa ni kataneia ao ni karikirakea ara atatai. (Ebr 5:14) E ngae ngke ti kona ni kakairi n aia motinnano tabemwaang, ma ti bon riai ni kataneiai ara konabwai n iaiango ao ni karaoi oin ara motinnano. Bukin tera? Ti na bane n anga taekan arora n tatabemanira nako ni kaineti ma oin ara motinnano.​—Ro 14:12.

Ti aki riai n iangoia bwa ti na kakaraoi motinnano aika raraoi ibukina bwa ti a tia ni bwabetitoaki i nanon ririki aika bati. Ngkana ti na karaoi motinnano ma te wanawana, ti riai n onimakina raoi Iehova, ana Taeka, ao ana botaki.​—Iot 1:7, 8; TNR 3:5, 6; Mt 24:45.

MATAKU N TE TAAMNEI AE “KATEIMATOA RAOIROINI MATANIWIN NANOM,” AO KAEKAI TITIRAKI AIKAI:

• Tera te motinnano are kaaitara ma ngaia Emma?

• E aera bwa ti riai n rarawa ni kaotii oin ara iango ni kaineti ma baika irekereke ma te mataniwin n nano?

• Tera te reirei ni kairiri ae manena are a tibwaia te taanga teuana nakon Emma?

• E karekei ia rongorongo aika ibuobuoki Emma ni kaineti ma te baere e rinanona?