E kamoamoaaki Iehova ngkana e kakukurei ana mare te Kristian, ao a boni kukurei naba iai te buumwaane ao te buuaine. (Mrk 10:9) Ibukini karekean te mare ae teimatoa ao ni kakukurei, a riai Kristian n nimti raoi ana boto n reirei te Baibara ngkana a rinea raoia.

Moana am iraorao ni karekenano ngkana e a “tia ni bwakanako [am] bongi n roro n rikirake,” ae te tai are e korakora iai te kani wene n taanga, ao e kona n uruana am motinnano ae raoiroi. (1Ko 7:36) Kabongana raoi am tai n tiku n aki iein ni kakorakoraa iai am iraorao ma te Atua ao ni karikirakei aroaro ni Kristian. Ni karaoan anne, ko na kona iai ni kanakoraoa riki am mare.

Imwain ae ko kariaia bwa ko na mare ma temanna, karekea moa te tai ae bon tau ni kinaa “te aomata ae raba are n te nano.” (1Be 3:4) Ngkana iai baika ko a moanna n nanououa iai, maroroakinna ma ngaia. I nanon te mare ao ko riai ni kaatuua riki iangoani baika ko kona ni karaoi ibukin raom nakoni baika ko kona ni karekei mairouna. (Brb 2:3, 4) Ngkana ko maiuakini booto n reirei man te Baibara imwain ae ko mare, e na bebete riki iroum kakaraoan anne imwin am mare ao e na kakukurei iai am mare.

MATAKU N TE TAAMNEI AE TE KATAURAOI MWAIN TE MARE—MWAKORO 3: “WAREBWAIA TE KABANEMWANE,” AO KAEKAI TITIRAKI AIKAI:

• Tera aron ana reitaki te tari te aine aei ma Shane?

• Tera ae e a noria neiei ngke a iraorao ni karekenano?

• A kangaa ana karo neiei ni buokia, ao tera ana motinnano ae raoiroi are e karaoia?