I nanon Tebetembwa ti na karoaa te mwakuri ae okoro ibukin tataekinan Ana Tautaeka n Uea te Atua, ni kaotia nakoia aomata bwa bon tii aei te anga ibukin tokin aia kangaanga. (Mt 24:14) Ko na kangaa n uataboa te mwakuri aei? Wareka te kibu teuana ibukin Ana Tautaeka n Uea te Atua ma aomata aika bati i nanon te namwakaina aei. Ngkana iai ae kaota te kan ongora, anganna katoton Te Taua-n-Tantani Na. 2 2020 are ibukia aomata nako. Imwina, waekoa n okira te aomata anne ao ni kataia ni moana te reirei n te Baibara ma ngaia ni kamanenaan te boroutia ae Ko Kona ni Kukurei n Aki Toki! Naake a beku bwa bwaiania aika aki katoatai n te namwakaina anne, a na karekea 15 ke 30 te aoa.

E a kaan te tai are nang roko iai Ana Tautaeka n Uea te Atua ni kamaunai tautaeka ni kabane aika kaitaraa. (Tan 2:44; 1Ko 15:24, 25) Ngaia are ti bia kaota onimakinan Iehova iroura ao Ana Tautaeka n Uea, n arora n uataboa karaoan te mwakuri ae okoro aei!