N aron ae e taku te World Health Organization (WHO) ni Mei 23, 2022, ao a a tia aomata aika 6.27 te mirion mwaitia ni mate man te COVID-19. Ma, n te kareke-rongorongo teuana are e kanakoaki ni Mei 5, 2022, ao e katautaua te WHO bwa e bae ni mwaiti riki nakon te ware anne, mwaitia aika a mate man te COVID. E taekinna bwa n 2020 ao n 2021, “e katautauaki bwa 14.9 te mirion ake a mate iai . . . ao te mwaiti aei, a irekereke iai aomata ake a boni mate man te COVID-19 ao aomata ake a mate man aorakin rabwataia riki tabeua, ake a rotakibuaka iai imwin reken te COVID-19 irouia.” Iai ana taeka te Baibara ibukin baika a kananokawaki aikai?

•    E a kaman taekinna Iesu bwa a na kaoti “aoraki aika kamamate” ni “kabaneani boong.”—Ruka 21:11, 2 Timoteo 3:1.

 E a tabe ni kakoroaki bukin ana taetae ni burabeti Iesu ni boong aikai. Ngkana ko kani mataata riki, wareka te kaongora ae “What Is the Sign of ‘the Last Days,’ or ‘End Times’?”

•    “Te Atua ae anga te kabebetenano n aekana nako . . . E kabebeteira ni kataakira nako.”—2 I-Korinto 1:3, 4.

 A a tia te koraki ake a mate raoia aika tangiraki irouia, ni kabebeteaki man ana taeka te Baibara. Kamataatako riki ni kaongora aikai: “Te Kekeiaki ma te Rawawatannano-Te Bwai ae Ko Kona ni Karaoia Ngkai” ao “Buokaia ae te Kabanea n Tamaroa Akana Rawawata Nanoia.”

•    “E bia roko am Tautaeka n Uea. E na kakororaoaki nanom i karawa ao n te aonnaba naba.”—Mataio 6:10.

 E na waekoa te “Tautaeka n Uea” ni kanakoraoi bwaai i aon te aba bwa e aonga n “akea te tia maeka iai ae e na kangai: ‘I aoraki.’” (Mareko 1:14, 15; Itaia 33:24) Mataku n te taamnei ae Tera Ana Tautaeka n Uea te Atua? bwa ko aonga n ataa te tautaeka ae tei i karawa aei ao n ataia bwa tera ae e na karaoia.

 Ti kaoko ma am utu bwa kam na reiakina riki ana taeka te Baibara bwa kam aonga ni kakabwaiaaki man ana kauring aika raraoi ao man ana berita nako aika kaingaingaa te nano.