Ana ribooti te United Nation ae Aia Botaki te Botannaomata:

•   I marenan Okitobwa 7 nakon Okitobwa 23, 2023, ao a mate aomata aika raka i aon 6,400 mwaitiia man te buaka are riki n aononi Gaza ao Iteraera, ao mwaitiia aika ikoaki bon 15,200, ake angiina mai iai bon tiaki tautia. Irarikin anne, a kairoroaki bubua ma bubua tenga bwa a na kitani mwengaia.

•   N Tebetembwa 24, 2023, ao a mate 9,701 kaain te aba ake tiaki tautia man te buaka are i marenan Rutia ao Ukraine, ao a ikoaki 17,748 i Ukraine.

 Tera te kantaninga ae e anga te Baibara ibukia naake a karawawataaki n te buaka?

 E taetae ni burabetinaki n te Baibara bwa e na “katoki buaka ni kabutaa te aonnaba” te Atua. (Taian Areru 46:9) E na kamanena te tautaeka i karawa ke te tautaeka n uea, n onei iai mwin aia tautaeka aomata. (Taniera 2:44) E na kabebeteia aomata nako Ana Tautaeka n Uea te Atua.

 Te bae e na karaoia Iesu Kristo ae te Uea n Ana Tautaeka n Uea te Atua:

•   “E na kamaiuia akana maiu ni kainnano aika tang ni kani buokaki, ao ane e mangori naba ma ane akea te tia buokia. E na nanoangaiia akana mangori ma akana maiu ni kainnano, ao e na kamaiuia akana maiu ni kainnano. E na kamaiuia man te karawawataaki ao man te iowawa.”​—Taian Areru 72:​12-14.

 E na boni katoka te rawawata te Atua ae reke man te buaka ao te iowawa, rinanon Ana Tautaeka n Uea.

•   “E na kaoa te rannimata ni kabane mai mataia, ao e nang akea riki te mate, ke te nanokawaki ke te tang ke te maraki. A a mauna bwaai rimoa.”​—Te Kaotioti 21:4.

 E nang boni karokoa te bitaki ae korakora Ana Tautaeka n Uea te Atua nakon te aonnaba. A a kaman taetae ni burabetinaki n te Baibara “buaka ao rongorongoni buaka” aika ti a nori ngkai. (Mataio 24:6) Bwaai aika riki aikai ao tabeua riki, a kaotia bwa ti a maeka “ni kabaneani boong” i aan aia kairiri aomata.​—2 Timoteo 3:1.