A a rotaki aomata n taabo nako n rakan te kabuebue n ikotaki ma kabuanibwai aika karina ake a riki mani biriraken te kabuebue ni kanoan te bong. Nori ribooti aikai:

•    “Man te tai are e moanaki iai tauani kabuebueni kanoan te bong 174 te ririki n nako, ao e tebenako te namwakaina ae Tun n te ririki aei, bwa ngaia te namwakaina are e a rangi n riao iai korakoran te kabuebue.”​—National Oceanic and Atmospheric Administration, U.S. Department of Commerce, Turai 13, 2023.

•    “A a kaaitara ma korakoran te kabuebue aaba aika Itare, Tibein, Buranti, Tiaman ao Poland ao e kantaningaaki birirakena nakon 48°C [118°F] n atimwakoro aika Sicily ao Sardinia. Aei te kabuebue ae moan te korakora are e a rota aonon Eurobe.”​—European Space Agency, Turai 13, 2023.

•    “Ngkana e riki te kabuebue n te aonnaba ao ti kantaningaia bwa e na bati bwabwakan te karau ma korakoran raanga n ran ake a a kona ni karika te ieka ae urubwai n taabo tabeua.”​—Stefan Uhlenbrook, te tarekita i aon kamatebwaian te ran ma te aonnaba man te botaki ae te World Meteorological Organization, Turai 17, 2023.

 E tabeaianga nanom ni mwaitin ribooti aika a kaineti ma korakoran te kabuebue ni kanoan te bong n aron aikai? Iangoa ae e taekinna te Baibara ibukin te rongorongo ae kakawaki aei.

 Eng. Biriraken te kabuebue ni kabutaa te aonnaba bon teuana mai buakoni baika riki are e a kaman taekinna te Baibara ibukin ara bong aikai. N te katoto, e taetae ni burabetinna Iesu bwa ti na nori “baika kakamaaku” ke “kanikina aika korakora mai karawa.” (Ruka 21:11) Biriraken te kabuebue ni kabutaa te aonnaba, e a kairiia aomata bwa a na maaka are e nang aki kona ni maekanaki ara aonnaba aei n aia mwakuri aomata.

 Tiaki ngaia anne. E karika te aonnaba te Atua bwa mwengara n aki toki ao e na aki kariaia uruakakina irouia aomata. (Taian Areru 115:16; Te Minita 1:4) Ni koauana, e a tia ni berita bwa e “na kamaunaia … te koraki ake a urua te aonnaba.”​—Te Kaotioti 11:18.

 E oti n te Baibara bwa e kona te Atua ni kamanoa ara aonnaba man te kabuanibwai nakon te otabwanin ao e na boni karaoa anne.

•    “E karaua te angibuaka [te Atua] ao e a raoi naoni marawa.” (Taian Areru 107:29) Iai mwaakan te Atua i aoni baika karikaki. E kona ni kanakoraoi kangaanga aika irekereke ma ara otabwanin, ake a rotakibuaka iai aomata ibukini korakoran te kabuebue ni kanoan te bong.

•    “Ko tabeakina te aonnaba, ko karikia bwa e na karikii uaa aika bati ao e na mari.” (Taian Areru 65:9) E na riki te aonnaba bwa te bwaretaiti man ana kakabwaia te Atua.

 Ngkana ko kan ota riki n ana berita te Baibara ibukini manga kaokan raoiroin ara otabwanin, wareka te kaongora ae “Who Will Save the Earth?”