A bon aki kona ni karekea te rau ae taabangaki taani kairiri ma botaki nako n te aonnaba. E a korakora riki norakini mwakuri n itabarara ni boong aikai, nakon ake a nonoraki man te tai are e waaki iai te Kauoua ni Buaka are Kabutaa Aonnaba . E kaania uoua te birion mwaitiia aomata—ae kaamwakoron mwaitiia kaain te aonnaba—aika maeka n taabo ake a rotakibuaka n itabarara aikai.

 E aera ngkai a aki kona aomata ni karekea te rau? Tera ae e taekinna te Baibara?

1.  1. A bwaini anua aomata aika e na kaangabuakaa karekean te rau. E a kaman taekinna te Baibara ae ni boong aikai, “a nang riki aomata bwa taan tangiriia i bon irouia, taani bakimwane, taani kamoamoa, taan nanorieta,... taan aki kakaonimaki nakoia raoia,... taani kakanneti,... taan aki taubaang, taan iowawa,... taan aki kani bwerengaki, taani kainikatonga.”—2 Timoteo 3:2-4.

2.  2. Akea irouia aomata n tatabemania nako ke iroura ni kabane, te konabwai ni kaetii ara kangaanga n akean ana ibuobuoki te tia Karikiriki ae Iehova a ae te Atua. E katerea te Baibara bwa “tiaki naba ana bwai te aomata kairani maiuna.”—Ieremia 10:23.

3.  3. E tauaki aron te aonnaba iroun te tia kairiri ae korakora ao ni buakaka, ae Tatan te Riaboro, ae “e burebureiia kaain te aonnaba ni kabutaa.” (Te Kaotioti 12:9) E na teimatoa waakinakon te buaka ma te itabarara ngkai a teimatoa ni “bane kaain te aonnaba ni mena i aani mwaakan teuare buakaka.”—1 Ioane 5:19.

 E karaui nanora te Baibara n taekinna bwa e na reke te rau tiaki man aia kakorakora aomata, ma boni mairoun te Atua

•   “‘Bwa I ataa te bwai ae N na karaoia nakoimi,’ bon ana taeka Iehova, ‘N na anganingkami te rau ao tiaki te kabuanibwai, bwa e aonga n reke iroumi te bwai ae raoiroi nakon taai aika a na roko, ao te kantaninga.’”—Ieremia 29:11.

 E na kangaa te Atua ni kakororaoa te berita anne? “Te Atua are anganga te rau [e na] … kamanatuaa Tatan.” (I-Rom 16:20) E na kabongana te tautaeka mai karawa te Atua are aranaki n te Baibara bwa “Ana Tautaeka n Uea te Atua,” ni karekea iai te rau ni kabutaa te aonnaba. (Ruka 4:43) A nangi bane aomata n reiakinaki aroia ni maeka ma te rau, i aan ana kairiri Iesu Kristo are ngaia te Uea n te Tautaeka anne.—Itaia 9:6, 7.

•   Ngkana ko kan ataa riki rongorongona, wareka te kaongora ae “Tera ae E na Kakororaoia Ana Tautaeka n Uea te Atua?”