N te Orimbiki ae karaoaki n 2024 ao e katautauaki bwa nimaua te birion mwaitiia aomata ake a na matakuakinia taan takaakaro man aaba aika 206, ake a ira buakon te kauaaba aio. E taku Thomas Bach ae te beretitenti ni Kometen te Orimbiki ni Katobibia te Aonnaba: “Ti kaaina te kauaaba ae katiteuanaia aomata n te rau. Ti riai ni kaburaa i eta te nano ni Kauaaba aei, bwa e karekea te rau ao te katiteuanaaki, e ngae ngke ti roko man aaba aika kakaokoro.”

 E kona te Orimbiki ni karekea te rau ma te katiteuanaaki? Ti boni kona ni karekea te rau ni koaua ao te katiteuanaaki?

 E a tia te Orimbiki n te ririki aei ni kauekea i nanoia aomata, tiaki tii iangoan te takaakaro. Takaakaro ake iai a karioi kangaanga aika a rotaki iai aomata ma te tautaeka, ao e a karika te bwenaua. A irekereke kangaanga aikai ma inaomataia aomata i aan te tua, kakaokoroaia aomata ibukin aia reeti, aia Aaro ao kaubwaia ma aroaroia.

 A kakamataku irouia aomata aekani bobotaki n takaakaro n te aonnaba n aron te Orimbiki. Ma a oti naba iai aroaro ma mwakuri aika kauekea te bwenaua, n oneani mwini karekean te rau ni koaua ao te katiteuanaaki.

 E a kaman taekinaki n te Baibara anuaia aomata, ae a na kaangabuakaa reken te katiteuanaaki ni boong aikai. (2 Timoteo 3:​1-5) Ngkana ko na reiakina riki taekan te taetae ni burabeti aei man te Baibara, wareka te kaongora ae “Did the Bible Predict the Way People Think and Act Today?”

 Iai n te Baibara te kantaninga ni koaua ibukin reken te rau ao te katiteuanaaki n te aonnaba. E beritanna bwa a na bane aomata ni katiteuanaaki i aan te tautaeka mai karawa ae “ana Tautaeka n Uea te Atua.”​—Ruka 4:43; Mataio 6:10.

 Te Uea n te Tautaeka n Uea anne bon Iesu Kristo, are e na karekea te rau ae taabangaki n te aonnaba. E taku te Baibara:

•   “A na maiureirei akana raoiroi . . . ao e na bati te raoi.”​—Taian Areru 72:7.

•   “E na kamaiuia akana maiu ni kainnano aika tang ni kani buokaki . . . E na kamaiuia man te karawawataaki ao man te iowawa.”​—Taian Areru 72:​12, 14.

 E noraki naba ni boong aikai bwa e a tia ana angareirei Iesu ni katiteuanaia mirion ma mirion aomata n aaba aika 239 mwaitiia. A a tia Ana Tia Kakoaua Iehova ni katobibia te aonnaba n reireinia aroia ni maeka ma te rau, ibukina ngkai Kristian ngaiia. Ngkana ko kan ota riki iai, wareka te kaongora n te Taua n Tantani ae atuna “Katokani Butanakon te Riribai.”