TEIMATOA N TANTANI!
E Rinnakoa Ukraine Rutia
Ni karangainan Beberuare 24, 2022, ao e a rinnakoaki Ukraine irouia ana taanga ni buaka Rutia, e ngae ngke a kataia n totokoa rikin te buaka taan tautaeka man aaba aika bati. E na tera aron rotakin te aonnaba man te boo ni buaka aei? Tabebong n nako ao e taekina aei te tia koroboki n te United Nations, ae António Guterres: “Ti aikoa kona raoi n ota ni korakoran te karawawata ma te urubwai are e na karikia te boo ni buaka aei nakoni mweraoin aban nako Eurobe ma te aonnaba ae bwanin.”
Tera kakawakini baika riki aikai ni kaineti ma te Baibara?
E a kaman taekinna Iesu Kristo bwa e na roko te tai are “e na teirake te natannaomata teuana ni buakana te natannaomata teuana, ao te tautaeka n uea teuana ni buakana te tautaeka n uea teuana.” (Mataio 24:7) Wareka te kaongora ae “What Is the Sign of ‘the Last Days,’ or ‘End Times’” n nora aron te Baibara ni katerea ae taiani buaka ni boong aikai, a a kakoroa nanon ana taetae ni burabeti Iesu.
E kabwarabwaraaki te buaka ni bokin te Baibara ae Te Kaotioti bwa ai aron te tia toka i aon “te aoti temanna ae uraura” are “e na uotaanako te rau man te aonnaba.” (Te Kaotioti 6:4) Wareka te kaongora ae “Taan Toka i Aoia Aoti Aika Aman—Antai Ngaiia?” n nora irekereken te taetae ni burabeti aei ma taiani buaka ni boong aikai.
E a kaman taekinna te boki ae Taniera bwa e na riki te ikakaiwi i marenaia “ueani meang” ao “ueani maiaki.” (Taniera 11:25-45) Mataku n te taamnei ae Fulfilled Prophecy—Daniel Chapter 11 n nora bukina ngkai e kona n aranaki Rutia ma taani boutokaia bwa ueani meang. a
E kabwarabwaraaki naba n Te Kaotioti taekan “te buaka n te bong ae kakannato ae ana bong te Atua ae Moan te Mwaaka.” (Te Kaotioti 16:14, 16) Ma e aki nanonaki iai te buaka i marenaia natannaomata n aron ae ti a noria ngkai. Wareka te kaongora ae “What Is the Battle of Armageddon?” ni kaotako riki n rongorongon te bwai ane e na riki anne.
E aera ngkai ko kona n onimakin taai aika imwaira?
E taekinaki n te Baibara bwa e na “katoki buaka ni kabutaa te aonnaba” te Atua. (Taian Areru 46:9) Wareka te kaongora ae “A Real Hope for a Better Tomorrow” n reiakina riki iai taekan ana berita te Atua ibukin taai aika imwaira.
E reiakinia taan rimwina Iesu bwa a na tataro ibukin rokon Ana Tautaeka n Uea te Atua. (Mataio 6:9, 10) Bon anne te tautaeka ae e mena i karawa ao e na kakororaoa nanon te Atua ibukin te aonnaba, are e nanonaki naba iai reken te raoi ni kabutaa. Ngkana ko kani kakabwaiaaki man te Tautaeka n Uea aei ao taiaoka ni mataku n te taamnei ae Tera Ana Tautaeka n Uea te Atua?
E raka i aon 129,000 mwaitiia Ana Tia Kakoaua ake a maeka i Ukraine. Titeboo aroia ma taani Kakoaua n aaba nako, ae a kakairi iroun Iesu n tei i nuka ni kaineti ma ana waaki te tautaeka ao n rawa n ira te buaka. (Ioane 18:36) A teimatoa Ana Tia Kakoaua Iehova ni katobibia te aonnaba n tibwaa nako te rongorongo ae raoiroi “ae taekan te Tautaeka n Uea” bwa boni ngaia katokan aia kangaanga nako aomata, ae nanonaki naba iai tokin te buaka. (Mataio 24:14) Ti kaoko bwa ko na reitaki ma ngaira ibukini karekean riki ana rongorongo ae raoiroi te Baibara.
a Ibukini kabwaninan rongorongon te taetae ni burabeti aei, nori kaongora aika “‘Ueani Meang’ n Tain te Toki” ao “Antai ‘Ueani Meang’ ni boong aikai?”
Ko Bae Naba n Tangira
TEIMATOA N TANTANI!
Te Kangaanga Nakoia Ake a Birinako Mai Abaia—Tera ae E Taekinna te Baibara
E kaota bukin rikin te kangaanga anne te Baibara ao n taekina naba te anga ae teimaan, are e na katoki kangaanga aikai.
TITIRAKI AIKA KAEKAAKI MAN TE BAIBARA
Tera ae E na Kakororaoia Ana Tautaeka n Uea te Atua?
Reiakina te bae ko na kariaa ngkana e a kairiri ana tautaeka te Atua n te aonnaba ni kabutaa.
REIREI AIKA RANGI NI KAKAWAKI N TE BAIBARA
Tera Ana Tautaeka n Uea te Atua?
N ana mwakuri ni minita Iesu ao e bati riki ana tai n angareirei i aon taekan Ana Tautaeka n Uea te Atua. I nanon tienture aika bati, a a tia taan rimwina n tataroa rokon te Tautaeka n Uea anne.
