A a mwaiti rikini mwakuri n iowawa ni kaineti ma te waaki n tautaeka, ao aei are e a karika tabeaiangaia aomata ni kabutaa te aonnaba.

•   Tiringaia taani kan rineaki aika 39 i Mexico, ae te mwaiti ae raka riki nakon taai ake mai mwaina, n ikotaki ma karaoani mwakuri n iowawa ni kaineti ma te waaki n tautaeka, e a kakubaia aomata ao ni kakerikaaka nanoia nakon te rinerine i Mexico n 2023-2024.

•   E noraki n taai aika tibwa nako n te aono n Eurobe bwa e a rikirake karaoani mwakuri n iowawa ni kaineti ma te waaki n tautaeka, n ikotaki naba ma kan tiringakin te buraim minitita i Slovakia ni Mei 15, 2024.

•   E korakora kubanakoia aomata i Amerika imwini kan tiringakin te beretitenti ngkoa ae Donald Trump n Turai 13, 2024.

 Bukin tera bwa e a korakora rikini mwakuri n iowawa ni kaineti ma te waaki n tautaeka? Iai tokina? Tera ae e taekinna te Baibara?

 E a kaman taekinna te Baibara bwa n taai aikai, ae nanonaki iai “kabaneani boong” ao a na mwaiti aomata aika a na kauekea rikin te iowawa ma te aki katiteuanaaki, man anuaia.

•   “A na roko taai aika okoro aika karuanikai, ni kabaneani boong. Bwa ane a nang riki aomata bwa . . . taani bangaomata, taan aki kakaonimaki nakoia raoia, . . . taani kakanneti, . . . taan iowawa, . . . taani kamwamwane, taan aki kani bwerengaki, taani kainikatonga.”​—2 Timoteo 3:​1-4.

 E a kaman taekinna naba te Baibara bwa waaki ni kakeru n aroni kamangaongaoan ma kakaitaraan ana waaki te tautaeka, boni kanikinaean taai aikai. (Ruka 21:​9, te kabwarabwara mai nano) Ma e na aki teimatoa ni waakinako te bwenaua ao kakaraoan te mwakuri n iowawa ni kaineti ma te waaki n tautaeka.

 E kabwarabwaraa te Baibara bwa e na onei mwin aia tautaeka aomata nako te Atua n ana tautaeka ae tei i karawa.

•   “E na katea te tautaeka n uea teuana Atuani karawa ae e na . . . urui tautaeka n uea aikai ni kabane ma ni kamaunai, ao tii te tautaeka aei ae e na teimatoa n aki toki.”​—Taniera 2:44.

 E na boni katiteuanaia aomata nako Ana Tautaeka n Uea te Atua ao ni karekea te rau ni kabutaa te aonnaba.

•   Te tia Kairiri iai ae Iesu Kristo, e aranaki bwa “te Natinuea ae Karekea te Rau” ao e na taraia raoi bwa “e na akea tokin . . . te rau.”​—Itaia 9:​6, 7.

•   Ti kona n noria naba n taai aikai bwa te koraki ake a mena i aan te Tautaeka n Uea aio, a a reiakina aron te maiu ae rau. Ibukin anne, e taku te Baibara: “A na ororei aia kabaang ni bitii bwa bwaai ni kamarautano, ao aia kainiwai naba ni bitii bwa bwaai ni koromwaanga. Ane e na aki manga tabeka te kabaang te natannaomata teuana n ekaanako te natannaomata teuana, ao a na aki naba manga reireinia te buaka.”​—Itaia 2:​3, 4.

 Ngkana ko kan reiakinna riki, wareka te kaongora ae “Tera ae E na Kakororaoia Ana Tautaeka n Uea te Atua?” ao mataku n te taamnei ae Tera Ana Tautaeka n Uea te Atua?