E rinnakoaki Ukraine irouia ana taanga ni buaka Rutia ni Beberuare 24, 2022, ike e a riki iai te mwebuaka nakoia kaaina bwa a birinako n rawei maiuia man te boo ni buaka aei. a

 “A rebwetata boom. E bon rangi ni kakamaaku ao I a aikoa kona raoi ni kabwarabwaraa taekana. Ti motinnanoia bwa ti na kitana ara tabo ngke ti ongo ae iai turein ake a katauraoaki ibukini kamwaeweaia aomata. Ti kariaiakaki n uota tii teuana te baeki ae uarereke, ai ngaia are a a bane n tiku nikiran ara bwai. Ti tii uotii beeba aika kakawaki, ara bwainnaoraki, te ran ao bwaai ni matamtam. Ti a kitani nikiran ara bwai nako ao ni kakioa te tabo n turein, ma e boni waakinako naba rebwetatan taiani boom.”—Nataliia, mai Kharkiv, Ukraine.

 “Kaanga ti aki iangoia bwa e na bon riki te aitara ni buaka. I ongo te rebwetata n aonon ara kaawa ake tabeua ao a ruru ni mwaing taiani winto. I a iangoia bwa N nang mwaewe nako, ai ngaia are I a rekenibai tii baika kakawaki. I kitana mwengau ngke e a boo 8:00 n te ingabong, n toka n te turein nako Lviv ao I a bwati mai ikekei nako Poland.”—Nadija, mai Kharkiv, Ukraine.

N te kaongora aei

•  Tera are e karika te kangaanga aei ae a birinako man abaia aomata?

•  E na reke ia buokaia ake a birinako man abaia?

•  E kona te Baibara ni buokiia ake a birinako man abaia?

 Tera are e karika te kangaanga aei ae a birinako man abaia aomata?

 E moan riki te kangaanga aei ngke e rinnakoaki Ukraine irouia ana taanga ni buaka Rutia. Ma iai riki bukina tabeua ake e taekin te Baibara ibukin rikin aekani kangaanga aikai:

•   Aia tautaeka aomata ni katobibia te aonnaba, a bon aki kona ni katauraoi baike a kainnanoi aia botannaomata. Ao a mwaiti tautaeka aika a kabonganai mwaakaia ni kairiri ni karawawataia ao ni bwainikirinia iai aomata.—Te Minita 4:1; 8:9.

•   Tatan te Riaboro, ae “te tia tautaekania kaain te aonnaba,” e a kairaraangia aomata nakon karaoan ae buakaka ao anne bukina are e a taekinna te Baibara bwa “a bane kaain te aonnaba ni wene i aani mwaakan teuare buakaka.”—Ioane 14:30; 1 Ioane 5:19.

•   Irarikin kangaanga aika a rotakibuaka iai aomata i nanon tienture aika bati, ti a maeka ngkai i nanon te tai ae e a kaman taekinna te Baibara ni kangai: “A na roko taai aika okoro aika karuanikai, ni kabaneani boong.” (2 Timoteo 3:1) Ao a na noraki ni boong aikai taiani buaka, kabuanibwai aika karina, aki taun te amwarake ao aoraki aika kamamate—aika baika karika birinakoia aomata mani mwengaia.—Ruka 21:10, 11.

 E na reke ia buokaia ake a birinako man abaia?

 E kaotaki n te Baibara bwa Iehova b ae te Atua are ngaia ara tia Karikiriki, e tangiriia ma n nanoangaiia aomata n aron aikai, ake a kitani mwengaia ibukin te mwebuaka. (Te Tua-Kaua 10:18) E berita bwa e na katoki aia kangaanga nako te koraki aei rinanon ana tautaeka i karawa, are e aranaki bwa Ana Tautaeka n Uea te Atua, ae e na onei mwin tautaeka n aomata nako. (Taniera 2:44; Mataio 6:10) E na kabongana ana Tautaeka aei ni kamauna iai Tatan te Riaboro. (I-Rom 16:20) E na kabutaa te aonnaba te Tautaeka anne ao ni kanakoi tian aaba, ake a karekea te iraraure nakoia te natannaomata. A nang katiteuanaaki iai aomata nako n ai aron te utu ae tii teuana. E nang akea ae e na manga birinako man mwengana, bwa e berita ni kangai te Baibara: “Ane a na tekateka temanna ma temanna i aan arokana ae te kureebe ao i aan arokana ae te biiku, ao akea temanna ae e na kakamaakuia, bwa e taekina anne win Iehova ae atuaia taanga ni buaka.”—Mika 4:4.

 Bon tii Ana Tautaeka n Uea te Atua ae e na kona ni karekea te mweraoi ae teimatoa nakoia te koraki ake a birinako man abaia ibukin mwebuakaia, ae ti a noria ni boong aikai. E na kabongana ana Tautaeka anne Iehova ni katoki kangaanga nako ake a a kairoroaki iai aomata bwa a na birinako man abaia ibukin mwebuakaia. Iangoi kiibu aikai:

•   Te Buaka. “[Iehova] e katoki buaka.” (Taian Areru 46:9) Ngkana ko kan ataia bwa e na kangaa te Atua ni katoki itabarara aikai, wareka te kaongora ae “Te Rau n te Aonnaba—E na Kangaa n Reke?”

•   Te karawawataaki ao te iowawa. “[Iehova] e na kamaiuia man te karawawataaki ao man te iowawa.” (Taian Areru 72:14) Ngkana ti kan ota bwa a kangaa naake a rotakibuaka n iango aika aki raraoi ni katoka aroia anne ao wareki mwakoron nako te kaongora ae “Katokani Butanakon te Riribai.”

•   Te Maiu ni Kainnano. “[Iehova] e na kamaiuia akana maiu ni kainnano aika tang ni kani buokaki.” (Taian Areru 72:12) Ngkana ko kan nora aron te Atua ni katoka oin rikin te maiu ni kainnano, ao wareka te kaongora ae “Is a Fair Economic System Possible?”

•   Aki taun te Amwarake. “E na bati te uita n te aonnaba.” (Taian Areru 72:16) Ngkana ti kan ataa aron te Atua ni kanuaira bwa ti aonga n aki manga baki, wareka te kaongora ae “A World Without Hunger?”

 E kona te Baibara ni buokiia ake a birinako man abaia?

 Eng. E aki tii katauraoa te ibuobuoki nakon taai aika imwaira te Baibara, ma e kona naba ni buoka bebeten te kangaanga ae a rotaki iai ngkai.

 Ana boto n reirei te Baibara: “Tai raraomaeakina te bwai teuana, ma a na kaotaki ami bubutii ni bwaai ni kabane nakon te Atua, n te tataro ma te kakorakora n tataro ni bubutii n raonaki n te katituaraoi, ao te rau are mairoun te Atua ae riaon aia iango aomata, e na kawakin nanomi ma ami iango.”—I-Biribi 4:6, 7.

 Nanona: Butiia te Atua bwa e na anganiko te raunnano n aki ongea te bwai are ko rinanona. Nora te kaongora ae “I-Biribi 4:6, 7—‘Do Not Be Anxious About Anything.’”