A mwaiti aomata ni katobibia te aonnaba ake a rotakibuaka man taian raanga n ran aika urubwai. Nori ribooti aikai:

•    “I nanoni boong aika tibwa nako ao e rotaki atuni kaawan Tiaina ni bwakan te karau ae moan te korakora ae tuai n nonoraki rikina i nanon 140 te ririki n nako, ao e roko rietan ranini bwakan te karau aei n . . . te mwaiti ae 744.8 te mirimita (29.3  te inti) i marenan te Kaonobong ao te Katenibong.”​—Man te AP News, Aokati 2, 2023.

•    “N te kauoua ni bong ae te Kaabong ao e oreaki aononi maiakin Tiaban n te angibuaka ae arana Khanun, ao iriana te karau ae korakora ma te ang ae oromatoa ike a a mate iai uoman aomata. . . . E katautauaki bwa e na roko rietan ranini bwakan te karau aei n te mwaiti ae 0.6 te mita (2 te buuti) n aono aika maungaunga ake i nukan Taiwan.”​—Deutsche Welle, Aokati 3, 2023.

•    “E riki te raanga n ran n te wikeen [i Nova Scotia] imwini bwakan te karau, ae te kabanea ni korakora are e tuai n nonoraki rikina i nanon 50 te ririki, ao e orea te aono ae te Atlantic Canada, aika taabo aika uakaan ma taari n aononi Kanata are mai mainiku.”​—Man te BBC News, Turai 24, 2023.

 Tera ae e taekinna te Baibara ni kaineti ma baikai?

 E kaotaki n te Baibara bwa ti a maeka n te tai ae e aranaki bwa “kabaneani boong.” (2 Timoteo 3:1) E taetae ni burabetinna Iesu bwa n taai aikai, ti na nori “baika kakamaaku” ke bwaai aika riki ake a karina te maaku i nanora. (Ruka 21:11) E a tia bibitakini kanoan te bong ni kauekei rikini bongibuaka aika kakamaaku aika aki kantaningaaki rikiia, a okioki rikiia, ao e a korakora riki aia urubwai.

 Ti kaongoaki n te Baibara bwa rikini baika kakamaaku i aon te aba n taai aikai, a riai ni kauringira riaini bwainan te kantaninga. Bukin tera? E taku Iesu: “Ngkana kam nori baikai bwa a a riki, kam a ataia iai bwa e a kaan ana Tautaeka n Uea te Atua.”​—Ruka 21:31; Mataio 24:3.

 Baika ti nori rikiia ngkai, a a kaota nakoira kaanin rokon Ana Tautaeka n Uea te Atua, are e nang kanakoraoi baika riiriki ni kanoan te bong, n ikotaki naba ma kawaini butin te ran.​—Iobi 36:​27, 28; Taian Areru 107:29.

 Ngkana ko kan reiakinna riki bwa e na kangaa Ana Tautaeka n Uea te Atua ni kanakoraoi baika riiriki n ana otabwanin te aonnaba, nora te kaongora ae “Who Will Save the Earth?”