Ni Mei 24, 2022 ao e rotakibuaka Uvalde, ae te kaawa ae uarereke i aon Texas, i USA, n te kangaanga ae moan te kananokawaki. N aron ae e taekinaki n te nuutibeeba ae The New York Times, “a tiringaki 19 ataein te reirei ao uoman taan reirei, iroun te tia kakatii are e ninia . . . te tabo n reirei ae te Robb Elementary School.”

 E kananokawaki ngkai a a rangi n okioki rikini kangaanga n aron aikai. E ribootinaki n te nuutibeeba ae USA Today bwa n te United States, “a a tia n riki iai waaki n tiritiri ma te katii aika 249 mwaitiia n taabo n reirei, n te ririki ae nako—ae te mwaiti ae riaoni mwaitin ake a riki n te ririki koraki, ni moa man 1970.”

 E aera ngkai a a riki kangaanga aikai? Ti na kangaa ni kabebeteaki mani mwakuri aika bubuaka aikai? Iai bukina ngkai ti riai ni kakoauaa ae a na bon toki mwakuri n iowawa aikai? Iai kaekaaia n te Baibara.

•    E kabwarabwaraaki n te Baibara bwa ti a mena “ni kabaneani boong” ike a nang bati iai aomata “aika aki tatangira” ao n “iowawa,” ni karaoi mwakuri n tiritiri n akea aia nanoanga. Aomata aikai “a na ririkirake riki ni buakaka.” (2 Timoteo 3:1-5, 13) Ngkana ko kan ota riki, wareka te kaongora ae “Did the Bible Predict the Way People Think and Act Today?”

 A mwaiti aomata aika a iaiangoa ae, ‘E aera te Atua ngkai e aki tuka rikin te kangaanga n aron te waaki n tiritiri ma te katii n taabo n reirei?’ Ibukin noran ana kaeka te Baibara, wareka te kaongora ae “A Riiriki Baika Bubuaka Nakoia Aomata Aika Raoiroi Bukin Tera?”

•    “Bwa bwaai ni kabane ake a koreaki ngkoa, a koreaki ibukin reireiara, bwa ti aonga ni karekea . . . te kabebeteaki man te Koroboki ae Tabu.”—I-Rom 15:4.

 A kona ni buokiko booto n reirei aika n te Baibara, ni kabebeteko ngkai ko nori mwakuri n iowawa n riiriki n te aonnaba aei. Ibukini kabwaninan riki rongorongona, nora te maekatin ae te Awake! ae atuna “Will Violence Ever End?”

 Ibukini karekean iango n ibuobuoki ni kaineti ma aroia kaaro ni buokiia natiia bwa a na kabebeteaki nanoia, ngkai a nori ao n ongo rongorongo aika kakamaaku, wareka te kaongora ae “Disturbing News Reports and Your Children.”

•    “E na kamaiuia man te karawawataaki ao man te iowawa.”—Taian Areru 72:14.

•    “Ane a na ororei aia kabaang ni bitii bwa bwaai ni kamarautano, ao aia kainiwai naba ni bitii bwa bwaai ni koromwaanga. Ane e na aki manga tabeka te kabaang te natannaomata teuana n ekaanako te natannaomata teuana, ao a na aki naba manga reireinia te buaka.”—Mika 4:3.

 Te Atua, boni ngaia ae e na kakororaoa te bwai ae a aki kona aomata ni karaoia. Ana Tautaeka n Uea te Atua, boni ngaia are e na kamaunai bwaai ni buaka ni kabane ao ni katokii mwakuri n iowawa nako. Ibukini kabwaninan riki baika e na kakororaoi ana Tautaeka n Uea te Atua, wareka te kaongora ae “‘E na Bati te Raoi’ i Aan Ana Tautaeka n Uea te Atua.”