Bon Tiaki te Rao ni Koaua

Iai “raoraom” ae ko kaitiboo ma ngaia ngke ko kairake. Ko moantaai ni bwaati aroia ikawai mairouna ao ko a kai tatangiraki riki iai irouia tabonrorom. Ko okiokiria ibukini “kabebeteam” ngkana ko rawawata. Ni koauana, ko a karikia bwa te tia buokiko n taai aika bati.

Ma ni waakinakon te tai, ko a nori aroarona aika karuanikai. E taumatoa ni kan iririko n taai nako, e ngae ngkana ko aikoa butimwaeaki n taabo tabeua ibukina. Ao e koaua bwa ko moantaai ni bwaati aroia ikawai mairouna, ma e a rotaki iai marurungim. Tiaki tii ngaia ma e a tia naba n iraei am bwakabwai tabeua.

Ko a kataia ni katoka am itoman ma ngaia, ma e rawa ni kariaia anne. N taraana, e a mataniwi i aom. Ko a uringaaba ngke ko karenaa tabona n te moantai.

ANNE boni kabwarabwaraan aia itoman taani moko aika bati ma aia tikareti. E ururing rikaaki Nei Earline ibukini momokona ngkoa n te maan ae 50 te ririki, ao e taku: “E bati riki buokau ae reke man te tikareti nakon are e na buokai temanna. Tiaki tii ngaia raoraou ae I rangi ni kinaa mangkoa​—ma n tabetai kaanga bon tii ngaia raoraou.” Ma e a ataia imwina riki Earline ae te tikareti bon tiaki te rao ni koaua ao e rangi ni karuanikai iowawaana. Taeka ni kaukuki ake mai eta, e bae ni koreaki ibukin neiei, ma iai te kaokoro teuana. E kaaki te moko neiei ngke e a ataia ae ngaia bon te bwai ae buakaka i matan te Atua, bwa e kabaarekai rabwatara.​—2 I-Korinto 7:1.

E motinnanoia naba te mwaane ae Frank bwa e na kaaki te moko ibukini kakukureian nanon te Atua. Ma tao tebongina ke uabong imwini kaakana ao e a manga kawakawa i aan ana auti ni kakaaei bukinimoko, ake a a tia ni bwaka rimarenani kaini bwian ana auti nako aontano. E taku Frank: “E kaukaki au iango n te tai arei. Iangoan arou ni kawakawa ribuakon te tano ma te baareka ni kakaaei bukinimoko, bon te bwai ae I kani mumuta iai. I a aki manga moko man te tai anne.”

E aera ngkai e kangaanga kaakan te moko? A kunea tabeua bukina taan rabakau iai: (1) E korakora aia katikitiki baike a karaoaki man te baakee n aron korakoran aia katikitiki taian drug ake a aki eti kabonganaia i aan te tua. (2) E kona te nicotine are toomaki man te moko n rota te kaburoro i nanon tii 7 te tekan. (3) E a riki te moko bwa te bwai ae kakawaki ni maiun te aomata, ibukina bwa e kakabonganaaki n tain te amwarake, te moi, te mamaroro, ni katokan te rawawatannano ao a a bati riki.

Ma n aron ae a a tia ni kaotia Earline ao Frank, e boni kona ni katokaki te anua ae karuanikai aei. Ngkana ko momoko ma ko a tangiria ni kaakia, tao e na bae n reke am iango ibukini bitakin aroarom ni warekani kaongora aika imwina aikai.