Kakaaea Buokam

“E kona te aomata n tokanikai i aon ae tii temanna, ma a kona aika uoman n tei ni kaitaraa te aomata anne.”​—Te Minita 4:12.

NGKANA e bati boutokaara ao ti na kona riki iai n tokanikai i aoia aiara n aki ongeia bwa antai ke tera aiara anne. Ai ngaia are ngkana ko kan tokanikai i aon te moko, ao ko wanawana riki ngkana ko kakaaea buokam mairouia am utu ao raoraom ke mairoun te aomata ae e na boutokaiko raoi ma te taotaonakinnano.

Titirakinia naba te koraki ake a a tia ni kaaki te moko, kioina ngkai a aki tii ota n am kangaanga ma a na rangi ni buokiko iai. E taku Torben, ae te tari temanna mai Denmark: “E bon rangi ni kakawaki irou aia boutoka tabemwaang.” E korea ae kangai Abraham, ae maeka i Inria: “I buokaki bwa N na kaaki te moko man aia tangira ni koaua au utu ao taari n te onimaki.” Ma n tabetai, e kona n aki tau aia boutoka ara utu ao raoraora.

E taku te mwaane ae arana Bhagwandas: “I momoko i nanon 27 te ririki. Ma imwin reiakinan te bae taekinaki n te Baibara ibukin aroaro aika a aki itiaki, I a motinnanoia bwa N na kaaka te moko. I a kataia ni kauarerekea ngkanne au tai ni moko. I a katoka reitakiu ma raoraou ake ngkoa ao I a nako ni kakarekea buokau mairouia taan ibuobuoki ibukini kaakana. Ma a aki rangi ni buokai mwaneka akanne. N te tairiki teuana ao I a bon tataro nakon Iehova ae te Atua ni bunra nanou nakoina ao n onnonia bwa e nang buokai ni kaakia. N tokina ao I a bon tokanikai!”

Te bwai ae kakawaki naba karaoana, boni katauraoam nakoni bwaai n tutuki. Tera baikanne? E na kabwarabwaraaki n te kaongora are imwina.

[Kabwarabwaraan te taamnei]

KO RIAI NI KABONGANAI BWAINNAORAKI?

A bati aika a kakabonganai bwainnaoraki ake a na buokiia aomata ni kaaka te moko n aron  te nicotine patch, ae te buratita ae kanimwaki n rabwatan te aomata, ma iai te bwainnaoraki i nanona ae kanoana te baakee, ao a a rangi ni karekemwane iai taani bitineti. Ma mwain ae ko motikia bwa ko na kabongana te bwainnaoraki anne, iangoi moa titiraki aikai:

Tera raoiroina? A mwaiti ake a kaungaa kabonganaan te bwainnaoraki aei, ae a taku bwa a karako aoraki ake ko na rotaki iai imwini kaakan te moko. Ma bon iai naba tabeman aika a aki koaua raoi ibukin oomwaakan te bwainnaoraki aei.

Tera buakakana? Iai buakakana tabeua n aron te tanoi, te rawawatannano ae teimaan, ao iangoan te kani bakabure. Uringnga naba are bwainnaoraki ake a onea mwin tangiran te moko, boni baika iai naba i nanoia te baakee are nanona bwa e na bae n rotaki iai marurungim. Ao n taraana, te aomata are e kabonganai baikanne, e na boni katikaki naba nanona nakon tangiran te moko.

Iai oneani mwina? E oti ni mwin te kakaae teuana bwa 88 te katebubua mwaitiia aomata ake a kaaki te moko, ae a taku bwa a a boni katoka naba mokoia n akea te bwainnaoraki.