Kakorakoraa Nanom ni Kani Karaoia
Kakorakoraa Nanom ni Kani Karaoia
“Te nanomatoa ae korakora ibukini kani kaakan te moko, bon te anua teuana ae kakawaki are e nonoraki irouia taani moko ake a tokanikai ni kaakia.” —Te boki ae “Stop Smoking Now!”
NI KAUAREREKEANA, ngkana ko kani kaaka te moko, ko bon riai moa ni kakorakoraa nanom ni kani karaoa anne. N te aro raa? Te anga teuana, iangoa nakoraoin riki arom ngkana ko a kaakia.
E na iko riki iai am mwane. Kabooan teuana te bakete n tikareti n tebongina, e kona n riaon tenga n taraa te kabanemwane iai n te ririki. “I aki bae n ataia ae ngaia I a boni bakataea au mwane n te moko.”—Gyanu, mai Nepal.
E na kakukurei riki iai maium. “E a tibwa nanakoraoi riki maiuu ngke I a kaaka te moko ao e tabe n ririkirake nakoraoina.” (Regina, mai Aberika Maiaki) Ngkana a kaaka te moko aomata ao ane e nang nakoraoi riki iai aia nokangkang ma aia aroboi, e na bati riki iai korakoraia ao ane a nang taraa ni marurung.
E na rikirake riki iai marurungim. “A na waekoa n namakina rikirakeni marurungia aomata nako ake a kaaka te moko.”—The U.S. Centers for Disease Control and Prevention.
E na rikirake iai onimakinam i bon iroum. “I kaaka te moko bwa I aki tangiria bwa e na mataniwi i aou. I boni kan taua arou i bon irou.”—Henning, mai Denmark.
A na kakabwaiaaki iai am utu ao raoraom. “E rotakibuaka . . . maiuia am koraki n te moko. . . . E oti ni mwin te kakaae bwa ikeikenakin bubun te moko, boni ngaia teuana bukina are a a mate iai aomata aika nga ma nga mwaitiia ni katoa ririki, man te kaentia n te maamaa ao man aorakin te buroo.”—American Cancer Society.
Ko na kakukureia iai am tia Karikiriki. “Ngkami aika kam tangiraki, . . . ti na kaitiakira mani kamwaraan nako te rabwata.” (2 I-Korinto 7:1) “Anga rabwatami . . . ae itiaki, ao ae butimwaeaki iroun te Atua.”—I-Rom 12:1.
“I motinnanoia bwa N na kaaka te moko ngke I a ota raoi ae e aki butimwaei baika a kabaarekai rabwatara te Atua.”—Sylvia, mai Tibein.
Ma n angin te tai, e aki tau ae ti na tii kakorakorai nanora ni kani karaoia. Ti na boni bae ni kainnanoa naba buokara mairouia tabemwaang, ara utu ao raoraora. Tera ae a kona ni karaoia?