Ko a tia ni wareki raoi kaongora man Te Taua-n-Tantani n taai aika tibwa nako? Noria ngkana ko kona ni kaekai titiraki aikai:

Tera te bure are e taekinna Iesu n te reirei ni kairiri ni Mataio 18:15-17?

E bon taekini kangaanga ake a kona ni kaetaki i marenaia naake a irekereke iai. Ma e boni kakaiaki te bure n te aro are e a kona ni kabaneaki iai te aomata ngkana e aki kaetaki. N te katoto, tao te bure anne bon te uarao, ke e kona n irekereke ma te babakanikawai.​—w16.05, i. 7.

Tera ae ko kona ni karaoia bwa e aonga ni manena riki am wareware n te Baibara?

Ko kona ni karaoi baikai: Kauka am iango ngkana ko wareware, ukeri reirei aika ko kona ni maiuakini; tabeki titiraki n aron aei ‘N na kangaa ni kamanena ni buokiia iai tabemwaang?’, ao kamanenai bwaai ni mwakuri aika katauraoaki ni karaoa am ukeuke i aon te kaongora ae ko a tibwa warekia.​—w16.05, i. 24-26.

E koaua ae e bure bwa e na nanokawaki te Kristian ngkai e kakoauaa te mangauti?

E aki katoka nanokawakin te Kristian onimakinan te mangauti. E bon nanokawaki Aberaam ni maten Tara. (KBwaai 23:2) I nanon taina, e na boni kerikaaki te nanokawaki.​—wp16.3, i. 4.

Antai ae tei ibukin te mwaane ae iai irouna nnen ana ingke te tia koroboki, ao mwaane aika onoman ma aia kai n oro, ake a taekinaki n Etekiera mwakoro 9?

Ti ota iai bwa a tei ibukin te taanga ni buaka ake i karawa ake a buoka kamaunaan Ierutarem ngkoa, ao a na ibuobuoki naba ni kamaunaan te waaki ae buakaka n Aremaketon. Ni kakoroani bukin te taetae ni burabeti aei ni boong aikai, e tei te mwaane are iai irouna nnen te ingke ibukin Iesu Kristo are e na kanikinaeia naake a na kamaiuaki.​—w16.06, i. 16-17.

Baikara kangaanga ake e kawakinaki mai iai te Baibara?

E kawakinaki man (1) te kangaanga ae mkan te bwai are e taneiai ni koroboki te aba i aona n aron te babirati ao te kunniman; (2) te kakaaitara mairouia taani kairiri n te tautaeka ao mataniwi n Aaro ake a kataia ni kamauna; ao (3) kataani bitakini kanoana.​—wp16.4, i. 4-7.

Baikara aanga ake e kona iai te Kristian ni kabebetea maiuna?

Atai baika ko kainnanoi raoi, ao tai kabanemwane ni baika ko bon aki kainnanoi. Karaoa am kataumwane ae ko boni konaa. Kanakoi baika ko aki kabonganai, ao kabwarai am taarau. Kauarerekea am tai n te mwakuri ni kareketianti, ao bairea arom ni karababaa am mwakuri ni minita.​—w16.07, i. 10.

Tera ae kaotaki n te Baibara bwa e rangi n tamaroa riki nakon te koora ke te tirewa?

N Iobi 28:12, 15, e kaotaki iai ae e tamaroa riki te wanawana mairoun te Atua nakon te koora ke te tirewa. Ngkana ko ukoukoria, kakorakorako bwa ko na teimatoa n nanorinano ao ni korakora n te onimaki.​—w16.08, i. 18-19.

E kariaiakaki te buai iroun te tari te mwaane ni boong aikai?

N aaba tabeua, e aki taraabuaka te korobuai ae taraaraoi ao e butimwaeaki, ao akea kamamaraan rongorongon te Tautaeka n Uea iai. Ma iai naba aika a motinnanoia bwa a na akea buaia. (1Kor. 8:9) Ni katei ke taabo riki tabeua, e aki riai te buai irouia Kristian aika tabonibai.​—w16.09, i. 21.

E kangaa ni kaokoro te wanawana ma te atatai ao te ataibwai?

Te aomata ae iai ana atatai e karerekei rongorongo ao koaua. Te aomata ae ataibwai e kona n ataa irekereken te koaua teuana ma teuana. Ma te aomata ae wanawana e kona ni bota te atatai ao te ataibwai ao ni kamanenai n te aro ae uaana.​—w16.10, i. 18.