“A nori kakimwareireini kukune aika boou, rabakaun te aonnaba, ao kaubwain te aonnaba te roro aei . . . Ma e bae n ae aei te roro ae e a karuanikaia te aonnaba ni kaineti ma [te tautaeka, kaubwaina, ao te otabwanin].”​—The Global Risks Report 2018, World Economic Forum.

E AERA NGKAI A BATI TAAN RABAKAU AIKA RARAOMAEAKIN TAAI AIKA IMWAIRA AO TE AONNABA? IANGOI KANGAANGA TABEUA AIKA TI BOO MA NGAAI.

• MWAKURI N IOWAWA RINANON TE INTANETE: E taku te nuutibeeba ae The Australian: “E oti mani kangaanga aika riiriki bwa e karuanikai te intanete. E riki bwa aia tabo taan tangakoiia ataei, taani bwainikirina te aba, taani kaunun, ao taan rinnakoi kaombiuta. Kimoaan aran temanna ao rongorongona bon te mwakuri naba n iowawa ae tawe rikirakena n te aonnaba. . . . E oti iai aroia aomata ae rangi ni buakaka ae te iowawa ae moan te karuanikai.”

• KAKAOKORONI KAUBWAIA AOMATA: E ribootinna te Oxfam International bwa iai waniman taiani kabanea ni kaubwai ae titeboo mwaitini kaubwaia ma mwaitini kaubwaia iteran te botannaomata aika maiu ni kainnano. E taku te Oxfam: “Waaki aika irekereke ma te mwane a a kabatiaa riki kaubwaia naake a kaubwai ao n anaa riki aia mwane naake a maiu ni kainnano, ae angia mai buakoia bon aine.” Iai tabeman aika raraoma n rikirakeni kakaokoroni kaubwaia aomata bwa e kona ni kauekea te mangao.

• TE ITABARARA AO TE BWAINIKIRINAKI: E ribootinna ni kangai te 2018 United Nations Refugee Agency: “Ti a nora te kabanea ni mwaiti ni mwaitiia aomata aika birinako mai abaia.” E raka i aon 68 te mirion aomata ake a riai ni kitani mwengaia ibukin te itabarara ke te bwainikirinaki. E taku te ribooti: “Ni katoa uoua te tekan ao e na bae n reke 1 te aomata ae kairoroaki bwa e na kitana abana.”

• BAIKA KONA N URUA TE OTABWANIN: E kangai The Global Risks Report 2018: “A bati aeka ni man ao aroka ae ai akea ngkai, ao e a rotaki naba marurungia aomata ni baarekan te ea ao taari.” E a rangi ni kerikaaki naba mwaitiia maan aika uarereke n aaba tabeua. Kioina ngkai a ibuobuoki maan aikai ni karikii ueen ao uaan aroka, a a kauring taan rabakau bwa e boni kona ni “mauna ara otabwanin.” A a rotaki naba taian rakai. A katautaua taan rabakau bwa tao iai iterani mwaitin rakai n te aonnaba ake a a tia ni mate 30 te ririki n nako n uaa ngkai.

Ti kona ni karaoi bitaki ibukini buokani karekean te mweraoi n te aonnaba? A iangoia tabeman bwa e kona te reirei ni karekea te bitaki. Ma te reirei raa ae kainnanoaki ibukini bitakin aia iango ao aroaroia aomata? A na rinanoaki titiraki aikai ni kaongora aika imwina.