Te reirei man te Baibara, iai mwaakana ae kamimi ni kona ni kanakoraoi maiuia aomata. Iangoi aia katoto naakai: Ricardo ao Andres.

RICARDO: I kaaina te kaeng, ngke ai tibwa 15 au ririki. E korakora rotakini maiuu irouia raoraou aika boou. E bon riki bwa tiau kani kabanean tebwina te ririki n te karabuuti! Kaanga e taraa n nanobaba te iango aei. Ma n au kaawa ao a tatangiraki ao ni karineaki naake a a tia ni karabuutinaki. Ao I kan riki naba n aroia.

I karaoi baike a kakaraoi kaain te kaeng, n aroni kabonganaan te drug, te wene ni bure, ao te iowawa. N te tairiki teuana ao I a ira buakon te kakatii. Irou, N nangi boni mate ma e reke birinakou n aki ikoaki. Imwina ao I a iangoa raoi aroni maiuu ao baika I uaiakin, ao I a kani karaoa te bitaki. Ma n te aro raa? N na karekea ia te ibuobuoki?

Angia au koraki a aki kukukurei. A bati aia kangaanga. Ma tiaki anne aron ana utu mwaanen tinau. I ataia ae a raoiroi ao a maiuakin ana boto n reirei te Baibara. I bon reiakina ngkoa aran te Atua ae Iehova irouia. Ngaia are e aki maan imwin te kakatii arei ao I a tataro nakon Iehova, n taboa arana ao ni butiia buokau. I rangi ni mimi bwa n te bong are imwina ao e a karebwerebwe temanna Ana Tia Kakoaua Iehova! E a riki teuanne bwa au tia reirei n te Baibara.

I waekoa n aitara ma te kangaanga ae korakora. A a tatarebooniai raoraou ngkoa ao n tuangai bwa N na iriia. E ngae ngke e aki bebete, ma I bon aki kariaia. I motinnanoia bwa e na waakinako au reirei n te Baibara, ao I kukurei bwa I boni karaoa anne! E waekoa n nakoraoi maiuu, ao I a kunea te kukurei ni koaua.

I uringnga ngke I tuanga te Atua n au tataro ae I kani kabanea ngkoa tebwina te ririki n te karabuuti bwa I aonga n riki bwa kaain te kaeng ae karineaki. Ngaia are I a butiia bwa e na kariaia bwa N na beku ibukina i nanon tao tebwina te ririki bwa te bwaiania, bwa N na buokiia aomata n aron ae I a tia naba ni buokaki. E kaekaa au tataro te Atua, bwa I a tia ni kabanea 17 te ririki ni kabwanina au tai ni beku irouna! Ao I bon tuai mani karabuutinaki.

Ma a bati raoraou ngkoa aika a maan ni karabuutinaki. Iai aika a mate. Ngkana I tanrikaaki ao I rangi ni kakaitau nakoia au koraki aika taani Kakoaua. A kukurei n tei n okoro, bwa a aonga ni maiuakina kanoan te Baibara. E a rikirake karineakia ae bati irou nakoni karineaia ngkoa irou kaain te kaeng. Ae moamoa riki, I kaitaua te Atua ibukin reiakinau te kawai ae te kabanea n raoiroi ibukin te maiu.

 ANDRES: I bungiaki ao n ikawairake n te tabo ae a kainnano kaaina ao e taabangaki iai kabonganaan te drug, te aonikai ni kuribwai, te tiritiri, ao te kakabooaki ibukin te wene ni bure. E tautoronaki tamau n tangiran te kamanging ao te cocaine. Ao a aki toki ngaia ma tinau ni kauntaeka ao n un.

I moi manging mangke I uarereke ao ni kabongana te drug. I kabanea angiin au tai i rarikini kawai ni kimoai bwaai ao ni kaboonakoi. Ngke I a ikawai riki ao e a kataia tamau ni karekea reitakira ae kaan ao n reireinai aron uouotakin te drug nakon te aba ma bwaai tabeua riki aika taburoroko i aan te tua ao ni kaboonakoi. I a rangi ni kaumwane iai ao e baitii rekena. N te taina ao a a roko bureitiman ni mwengau. A katikai ao I a kabureaki nimaua te ririki ibukin irekerekeu ma te tiritiri.

N te ingabong teuana ao e a katanoataaki bwa a kaoaki buure nakon te maroro n te Baibara ae a na kairia Ana Tia Kakoaua Iehova. I a baireia bwa N na kaea. E mataata te baere I ongora, ngaia are I a reirei n te Baibara ma taani Kakoaua. A aki tii taekini kiibu aika aki kaun, ma a boni kaotii nakoiu ana kaetieti aika rietata te Atua ibukin te aroaro ni maiu ae riai.

I a noria ae I aki kona ni bitaki i bon irou, riki ngkana I boo ma aia waaki ni kakamaaku raou ni bure ake a aki kukurei n te bae I karaoia. Ngaia are I a tataro nakon Iehova ibukin te korakora ao te wanawana, ao e buokai. I boni kakorakoraaki bwa N na taekina te Baibara nakoia buure ake tabeman n aki ongei waaki ni kakamaaku.

Ngke N nang kaotinakoaki ao I a rangi n raraoma n te aro are I a kani kamaanai riki n te karabuuti! Ngke I a otinako ao a bati buure ake a kateitei baia ni kaboo. Ao iai ake a kangai ma te tatangira: “Okira mwengam te mitinare.”

I aki kan iaiangoa te bae e na riki ni maiuu ngke arona bwa I aki kariaia te Atua bwa e na reireinai. I bon rangi ni kakaitau ngkai e tangirai te Atua ao ngkai e aki iangoia bwa I aki kona ni bitaki. a