“Ngkana a bwebwerake akana buakaka n aron taian titania, ao ngkana a bane ni maiureirei taani kakaraoa ae bure, ao bukin anne, bwa a na boni kamaunanakoaki n aki toki.”​—TAIAN ARERU 92:7.

N aron ae ti reiakinna n te kaongora are mai mwaina, e a bon tabe n rikirake te buakaka. Ti aki riai ni mimi n aei, bwa e a kaman taekinaki n te Baibara n 2 Timoteo 3:​1-5 bwa “ni kabaneani boong” ao a na rangi ni buakaka aomata. Kabaneani bongin tera? Te aonnaba aei ae a mena iai aomata aika aki tangira te Atua. N te tai ae waekoa ao te Atua e nang kamaunaia naake a rawa ni bitii aroia aika bubuaka, ao a nang tiku tii aomata aika raoiroi ake naake a ongeaba iroun te Atua. “A na abana te aonnaba akana raoiroi, ao a na maeka i aona n aki toki.”​—Taian Areru 37:29.

“Te Atua are anganga te rau, [e nang] kamanatuaa Tatan.”​—I-ROM 16:20.

Ngkana a a maunanako aomata aika buakaka ni kabane n ikotaki ma Tatan ao taimonio, ao e nang buta te rau n te aonnaba aei. E beritana ae kangai ara tia Karikiriki: ‘Ai akea temanna ae e na kakamaakuko.’​—Mika 4:4.

“E a mena ana umwanrianna te Atua irouia aomata . . . Ao e na kaoa te rannimata ni kabane mai mataia, ao e nang akea riki te mate, ke te nanokawaki ke te tang ke te maraki.”​—TE KAOTIOTI 21:​3, 4.

E nang mauna te rawawata ao te aoraki ibukina bwa te Atua e nang kaoki mwin aia urubwai ni kabane Tatan, Atam, Ewa, ao boni baike a riki ibukin aki kororaoira. Ibukin anne, ao e “nang akea riki te mate.” Aomata ake a tangira te tia Karikiriki ao n ongeaba irouna, a nang maiu n aki toki. Ma a na maiu ia?

“E na kakatonga te rereua ma te aba ae mwauteretere, ao e na kimwareirei te rereua ae aoraoi ao e na onrake n te uee ae te taberon.”​—ITAIA 35:1.

Ngkana e a kamauna te buakaka te Atua ao e nang maiureirei te aonnaba. A na bati iai taabo ni kamaangang ma onnaroka ao e na bati naba iai te amwarake. (Taian Areru 72:16) E nang itiaki marawa, te nei, ao karaanga, ao a nang maiuraoi baike a maiu iai. Te taeka ae “baarekareka” e nang bon aki naba manga taekinaki. A nang maeka aomata ni mwenga ake a boni katei ao e nang bon riki bwa aia auti. Ai akea te aomata ae nang akea mwengana, e na baki, ke e na maiu ni kainnano.​—Itaia 65:​21, 22.

“A na boni mangauti” aomata ​—MWAKURI 24:15.

Ko kani manga noriia am koraki aika tangiraki ake a a tia ni mate? E nang boni manga kamaiuia te Atua ae mwaaka ke ni kautiia n te Bwaretaiti n te aonnaba. Ko na kinaia ao a na kinako. Iangoa aroni kimwareireim ao kimwareireia naakai. E aera ngkai ti kakoauaa raoi te kantaninga aei? Ibukina bwa e kaotii katoto te Baibara ae taekaia ikawai ao ataei ake a a tia ni kamaiuaki ao n ikotaki ma aia utu. Irarikin anne, e aki toki Iesu ni kauta ae mate i mataia aomata aika bati.​—Ruka 8:​49-56; Ioane 11:​11-14, 38-44.