BUKINA NGKAI E KAKAWAKI TE KARINERINE NI BON NAKOIM

• E kaotaki n te kakaae bwa naake a aki iaiangoiia n te aro ae raoiroi, a kai raraoma, a rawawatannano, ao e kona n reke irouia te aoraki ae kaineti ma aron te amwarake. Ao a na bae ni kabongana buaka te arekooro ao te drug.

• Aomata ake a karineia i bon irouia, a rarawa ni kabotauia ma tabemwaang, ao e a kai reke iai aia iraorao ma naake i rarikia, ao ni karekea te itoman ae korakora. N te itera are teuana, naake a aki rangi ni kaota karineaia i bon irouia a kona n titiribure, ike a kona n urui iai taian iraorao.

• Te koraki ake a karineia i bon irouia, a teimatoa ni korakora e ngae ngkana a kaaitara ma kangaanga. A aki kariaia bwaai n tutuki bwa a na katokiia mani karokoaia n tiaia. Ni kaitaraan anne, te koraki ake e karako irouia karineaia i bon irouia, a kona n iangoi kabwaka aika uarereke bwa bwaai n tutuki aika bubura. Anne are e kona ni kairiia bwa e na waekoa ni bwara nanoia.

 TE BWAI AE KO KONA NI KARAOIA

Rineiia raoraom aika bwaati ni kaungaunga. Bobotaki ma te koraki aika kaotiota te karinerine ake a rangi n tabeakina arom ao ni kakaungako.

Buokiia tabemwaang. Ngkana ko bwabwaina te akoi ao ni karaoi bwaai ibukia tabemwaang n ikotaki naba ma naake a aki kona ni kabooa mwin am akoi, ko na boni karekea te kukurei ni koaua ae reke man te anganga. Ko kona naba ni kukurei e ngae ngke a aki nora te bae ko karaoia aomata.

Buokiia natim bwa a na karikirakea aroia ni karineia i bon irouia. Te anga teuana ae a na karaoa iai anne, boni man aroia n rabakau ni kanakoraoi oin aia kangaanga n aron aia kabanea ni konaa. Anne ae a buokaki iai ataei bwa a na bwaati aroia ma te kangaanga ao ni mwakuria. Te reirei aei e karikirakea aroia ni karineia i bon irouia, ao a na kona ni buokaki iai ngkana a a ikawai riki.