A onimakinaki aomata aika kakaraoi tabeia. A karaoi ao a katiai naba raoi i aon taia ake a baireaki.

E ngae ngke e uarereke aia konabwai ataei aika uarereke ma a kona naba ni moanna n reireinaki bwa a na bwaati ni karaoi tabeia. E taku te boki ae te Parenting Without Borders: “Ngkana e a koro tebwi ma nimaua aia namwakaina ataei ao a nang kona ni karaoa are e tuangia aia karo. Ngkana ai tebwi ma wanua aia namwakaina a a kani karaoa ngkanne are e tuangia aia karo. Ni katei aika bati ao kaaro a moana kaungaaia natiia bwa a na ibuobuoki ngkana ai nimaua nakon itiua aia ririki, ao n roroia anne, a a kona raoi iai n ibuobuoki n te mwenga.”

Te taeka ae “te roro ake kaanga aekakin te bummaraeng,” ae te bwai ae ko karenako ma e na bon okiriko imwini karenakoana, e kabwarabwarai aroia ataei ake a a moanna n ikawai ake a kitani mwengaia ao ni kataia ni maiu i bon irouia, ma a a manga okiriia aia karo ngkana a reke n te kangaanga. E riiriki aei n tabetai ibukina bwa e bon tuai man reireinaki te roro n rikirake anne aron te kataumwane, ke ni karaoi tabena ake a kainnanoaki ibukin te maiu ni katoabong.

Ngaia are e raoiroi ae ko reireinia natim te bae a riai ni karaoia ngkana a ikawai. E taku te boki ae How to Raise an Adult: “Ko aki tangiria bwa ko nang kakaraoi naba bwaai ibukia n uaa ae e a koro tebwi ma wanua aia ririki are ko nang kariaia iai kitanakim irouia.”

Katoaia ma tabeia n te mwenga.

ANA BOTO N REIREI TE BAIBARA: “Iai te kabwaia n aeka ni mwakuri korakora ni kabane.”​—Taeka N Rabakau 14:23.

A rangi ni kani mwamwakuri ataei i rarikia aia karo. Ko kona ni kabongana raoi aroia aei n arom ni katoaia natim ma tabeia n te mwenga.

Tabeman kaaro a aki kani karaoa anne. A taku bwa a aki kani katabeia natiia ibukina bwa a bon rangi n tira aia bwai n reirei ae a riai ni kakaraoi.

Ma e nanakoraoi aia kekeiaki n te reirei ataei ake a kakaraoi tabeia ni mwengaia, bwa a reiakinaki iai butimwaean tabeia ao katiaana. Irarikina, e taku te boki ae Parenting Without Borders: “Ngkana ti aki kariaia bwa a na buokira natira man uarerekeia are a kakan ibuobuoki iai, ao a nang kona n iangoia ngkanne natira bwa e aki kakawaki buokaia tabemwaang . . . A nang kariaa naba ngkanne ae a nang kakaraoaki bwaai ibukia.”

N aron ane taekinaki anne, ngkana a kakaraoi tabeia ni mwengaia, e reke reireiaia iai ni kaineti ma aroni buokaia  tabemwaang ao n aki bangaomata. A buokaki ataei n tabeia bwa a na ataia ae a kakawaki naba n te utu, ao iai tabeia ibukin aia utu.

Buokiia natim bwa a na ota n ae iai mwini karaoan ae kairua.

ANA BOTO N REIREI TE BAIBARA: “Kakauongo n te reirei ni kairiri ao butimwaea te reirei ni kaetieti, bwa ko aonga ni wanawana n am bong aika a na roko.”​—Taeka N Rabakau 19:20.

Ngkana a karaoa ae kairua natim n aron te katoto, ngkana e rina n urua ana bwai te aomata temanna, tai karabaa. A kona naba ataei ni butimwaea mwin te bwai ae aki raoiroi ae riki, ao ngkana e riki aei, e raoiroi te kabwarabure ao tao kabooani mwin te baere uruaki.

Ngkana a ota ataei n ae a na boni kaitaraa mwin aia mwakuri ae kairua, a na buokaki iai

• ni bwabwaina te koaua ao ni kaokaotii aia kairua

• n aki bubukinia tabemwaang

• n aki kakarekea angaia

• ni kabwarai aia bure ngkana e riai