A bati aomata aika rawa n taromauria te Atua ibukina bwa a bukinna n rawawataia.

A bati mataniwi n Aaro ake a angareirei n te aro ae teretere raoi ao ae aki bati n teretere, ni bukina te Atua n rawawatara. N te katoto, a taku tabeman bwa:

• Kabuanibwai aika karina bon ana katuuaa te Atua.

• A mate ataei ibukina bwa e kainnanoia riki ana anera te Atua i karawa.

• Aron te Atua n inanonano n taiani buaka, boni ngaia ae a riki iai rawawata aika bati.

Ma e kona ni kairua te bae a angareirei iai mataniwi n Aaro ibukin te Atua? Tera arora ngkana e aki butimwaei aia angareirei te Atua?

E aki karikii rawawatara te Atua.

Ngkana e karikii, e na boni kauntaba anne ma aroarona ake a kaotaki n te Baibara. N te katoto:

“Te kaetitaeka ae riai [aron te Atua] ni kabane. . . . E raoiroi ao e eti.”​—TE TUA-KAUA 32:4.

“E bon aki kona te Atua ae koaua n iangoa karaoan ae buakaka, ao Teuare Moan te Mwaaka bwa e na karaoa ae kairua!”​—IOBI 34:10.

“E aki kabwaoua te kaetitaeka ae riai Teuare Moan te Mwaaka.”​—IOBI 34:12.

E ribaa te Aro te Atua ae taekina te kewe ibukina.

A nanonaki naba n aei Aaro ake a angareirei bwa aongkoa e karikii rawawatara te Atua, ao Aaro naba ake a irekereke ma te buaka ao te iowawa.

“A taekin taetae ni burabeti aika kewe n arau [te Atua] taiani burabeti. I aki kanakoia ke n tua nakoia ke n taetae nakoia. A taetae ni burabetiia nakoimi te miitara ae kewe . . . ma te mwamwanaa te aba n oin nanoia.”​—IEREMIA 14:14.

E kabuakakaia Aaro Iesu aika mwamwanaa te aba.

“A na aki bane n rin n te Tautaeka n Uea ae bwaini karawa akana kangai nakoiu, ‘Te Uea, te Uea,’ ma e na tii rin iai ane e kakaraoa nanon Tamau are i karawa. Ane a na kangai aomata aika bati nakoiu n te bong arei, ‘Te Uea, te Uea, tiaki ti taetae ni burabeti n aram, ma ni kanakoia taimonio n aram, ao ni karaoi kakai aika bati n aram?’ Ao ngai N na kangai nakoia: ‘I bon aki kinaingkami naba teutana! Naako mairou, ngkami aika taani kakaraoa ae buakaka!’”​—MATAIO 7:21-23.