Ibukina bwa ti anganako ara boki aika aanaki n te Baibara n akea booia, a a iangoia tabeman bwa e kariaiakaki kaewean ao katokaani baikai n atureti tabeua n te intanete ke te social media. Ma karaoan aei e bon urua te Kaetieti * Ibukini Kabonganaan ara atureti n te intanete ao e a tia ni karikii kangaanga aika kakaiaki. N aron ae kamatataaki ni Kaetieti aikai, akea ae e kariaiakaki ni “kanakoi taamnei, booki, kanikina aika kabonganaaki n ara botaki, katangitang, taamneia aomata, viteo, ke kaongora riki tabeua man ara atureti n te intanete aei, nakon (te tabo n reitaki, taabo ake ko kona iai ni karekei ao ni kanakoi bwaai n te intanete, taabo ake ko kona iai ni karekei ao ni kanakoi taamnei aika maiu, ke taabo n reitaki n te intanete).” E aera bwa e kainnanoaki tiatianakin aei?

A tabuaki kaewean ao tibwaakin bwaai ni kabane aika mena n ara atureti n te intanete n akea te kariaia. A kataia taan tannako man te koaua ao taani kakaaitara ake tabeman ni kamanenai ara boki n oin aia atureti bwa a na mwamwanaiia iai Ana Tia Kakoaua Iehova ao tabeman riki. A karaoaki taabo n reitaki aikai bwa a na karikirakea te nanououa irouia taani wareware. (TaiAre. 26:4; TaeRab. 22:5) A kamanenai tabemwaang kaongora man ara boki ke ara kanikina ae te jw.org n taiani katanoata, baika a na kabooinako, ao n te mobwaao ke te tablet. Ibukina bwa e tabuaki kabonganaani baikai n akea te kariaia, ti kona ni kabongana te tua, n totokoi kabonganaani baikai n te aro ae aki riai. (TaeRab. 27:12) Ma ngkana ti bon ataia ao ni kariaia naba aomata ke bon taari bwa a na kanakoi kanoan ara taamnei n taabo riki tabeua ke ni kamanena te kanikina ae te jw.org ni kaboonakoi iai aia bwai, e a aki kona ngkanne ni boutokaira te boowi  ngkana ti katokiia taani kakaaitaraira ao waaki ni bitineti.

E kona ni karuanikai karekean ara boki man taabo riki tabeua i rarikin te jw.org. E a tia Iehova ni mwiokoa “te toro ae kakaonimaki ma ni wanawana” n tii ngaia bwa e na katauraoa te amwarake n taamnei. (Mat. 24:45) Ao te “toro” anne, e kamanena tii ana atureti n te intanete ibukini boreetian amwarake n taamnei ae www.pr418.com, tv.pr418.com, ao te wol.pr418.com. Ao tii tenua ara app ake ti kabonganai ngkai aika te JW Language^®, JW Library^®, ao JW Library Sign Language^®. Ti kona ni kakoauaa raoi bwa e aki katanoataaki iai te boobwai ao a aki naba kabarekaaki n ana waaki Tatan. Ngkana a roko amwarake n taamnei man taabo riki tabeua, ti aki ataia bwa a a tia ni bitaki ni kabwaouaaki ke ni kaangaraoaki nakon aia reirei aomata ke a tuai.—TaiAre. 18:26; 19:8.

Irarikin anne, kanakoan ara boki nakon taabo n reitaki n te intanete are a kona iai aomata ni karin aia taeka, e a angania taan tannako man te koaua ao taani kabuakaka te tabo teuana are a kona iai ni kabutaanako te nanououa ibukin ana botaki Iehova. A a tia taari tabeman ni kairaraangaki bwa a na kauntaeka i aon te intanete, ao e a kauaataoaki iai kabuakakaan aran Iehova. E bon aki kona ni karaoaki n te intanete ‘te angareirei ma te nimamannei nakoia ake a rarawa.’ (2Tim. 2:23-25; 1Tim. 6:3-5) E a tia naba n noraki bwa a karioaki taabo n reitaki ao taabo aika kakawaraki n te intanete ao a kamanena aran ara botaki, te Rabwata n Tautaeka, ao kaaina n tatabemania nako. Bon akea kaain te Rabwata n Tautaeka ae onoti nakoina ana Web page ke oin ana tabo n reitaki n te intanete.

Kairakia aomata nakon te jw.org e buoka kabutanakoan te “rongorongo ae raoiroi.” (Mat. 24:14) A teimatoa ni katamaroaaki ara bwai ake ti kakamanenai n ara mwakuri ni minita aika mena n te intanete. Ti tangiriia aomata nako bwa a na karekei kakabwaiaaia mai iai. Ngaia are n aron ae kaotaki n ara Kaetieti, ko kona ni kanakoa te boki ke n tibwaanako te kaongora ae ko noria n te jw.org nakon temanna. Ngkana ti kairiia aomata nakon ara atureti ae kakawaraki n te intanete, ti a bon tomaiia iai ma te tabo ni koaua ae rereke iai te amwarake n taamnei, ae “te toro ae kakaonimaki ma ni wanawana.”