N TE ririki ae nako, nga ma nga mwaane aika mwiokoaki bwa unimwaane ao tabonibai n te ekaretia i buakoia Ana Tia Kakoaua Iehova ni katobibia te aonnaba. Ngkana ngkoe temanna i buakoia taari aika tangiraki aikai, ko boni bae ni kimwareirei ni mwiokoam ae boou aei.

Ma tao ko bae n raraoma teutana. E taku Jason ae te unimwaane ae ataei: “Ngke I moan anganaki mwiokoau aei, I namakinna bwa e a rangi ni bati tabeu.” A namakinna Mote ma Ieremia bwa a aki tau ibukini mwiokoaia aika boou mairoun Iehova. (TeOti. 4:10; Ier. 1:6) Ngkana ko namakina naba anne, ko na kangaa n tokanikai iai ao n teimatoa n rikirake? Iangoa ana katoto te tia rimwini Kristo ae Timoteo.—Mwa. 16:1-3.

Tao e a kani koro 20 ke ai tibwa 20 tabun ana ririki Timoteo ngke e kaoaki iroun te abotoro Bauro bwa raona ni mwamwananga. N te moantai, e bae n iangoia Timoteo bwa e aki tau ibukina bwa e ataei, ao tao e tabwara nakoni mwiokoana ae boou aei. (1Tim. 4:11, 12; 2Tim. 1:1, 2, 7) Ma tebwina te ririki imwina, e a tuangia Bauro kaain te ekaretia i Biribi ni kangai: “I kantaningaia bwa ngkana nanon te Uea ae Iesu, ao N na waekoa ni kanakoa Timoteo nakoimi . . . Bwa akea riki temanna irou ae titeboo aroarona ma ngaia.”—IBir. 2:19, 20.

E kangaa n riki Timoteo bwa te unimwaane ae rianako arona? Iangoi reireiam aika onoua man ana katoto.

1. E tabeakinia raoi aomata. E tuangia Bauro taari ake i Biribi ni kangai: “E na tabeakin raoi tabeaiangami [Timoteo].” (IBir. 2:20) Eng, e tabeakinia aomata Timoteo. E tangiriia bwa a na kaania Iehova, ao e tauraoi ni kabongana korakorana ibukia.

Tai kakairi iroun te turaiua n te bwati are tabe riki ma rokona n taiani kainibwati i aon te tai nakon rikoaia bwatintia. E anga ana taeka n reirei William ae te unimwaane n te ekaretia i nanon 20 tabun te ririki, nakoia taari ake a a tibwa mwiokoaki ni kangai: “Tangiriia taari. Kaatuui iangoani baike a kainnanoi nakon arom ni bairei karaoani bwaai n te ekaretia.”

2. E moanibwaia te mwakuri n uarongorongo. E kaota Bauro kaokoron ana katoto Timoteo ma ake tabeman ni kangai: “Ake tabemwaang a tabeakin oin nanoia ao tiaki nanon Iesu Kristo.” (IBir. 2:21) E kororeta Bauro mai Rom. E noria bwa taari mwaane ikekei, a tabeakin riki oin nanoia. A aki kabanei korakoraia n ana mwakuri te Atua. Ma tiaki anne aron Timoteo! Ngkana a reke taai aika angaraoi ibukini boutokaan tataekinan te rongorongo ae raoiroi, titeboo arona ma Itaia are kangai: “Aio ngai! Kanakoai!”—Ita. 6:8.

Ko na kangaa ni kanakoraoa tabeakinan oin arom ao baika irekereke naba ma te onimaki? Te moan, moanibwai baika kakawaki riki. E kaungaunga Bauro ni kangai: “[Kakoauaa] raoi bwa baikara bwaai aika kakawaki riki.” (IBir. 1:10) Iangoi baika kakawaki iroun te Atua ao moanibwai. Te kauoua, kabebetea maium. Kaaki baika a na anaa am tai ao korakoram. E kaungaunga Bauro nakon Timoteo ni kangai: “Birinako mani baike a bwabwarui rooro n  rikirake, ao ukoukora te raoiroi, te onimaki, te tangira, ao te rau.”—2Tim. 2:22.

3. E mwakuri korakora ibukin Iehova. E kauringia Bauro kaaini Biribi ni kangai: “Kam ataia bwa e a tia ni kaota manenana Timoteo nakoira. E riki bwa kaanga te teei i rarikin tamana, n arona ni kakorakora ma ngai ibukin te rongorongo ae raoiroi.” (IBir. 2:22) E aki taningaroti Timoteo. E mwakuri korakora i rarikini Bauro, ao e a kakorakoraaki iai aia itangitangiri.

Ni boong aikai, e aki kona ni bane te mwakuri n ana botaki te Atua. E boni karaunano te mwakuri anne ao ko kona ni kaaniaki riki iai ma taari. Ngaia are katea tiam ae ko na ‘kakorakorako n ana mwakuri te Uea ni kamwaiti’ n taai nako.—1Kor. 15:58.

4. E maiuakin reirei ake e anganaki. E korea aei Bauro nakon Timoteo: “Ko toua raoi mwin au angareirei, aroni maiu, au kantaninga, au onimaki, au taotaonakinnano, au tangira, [ao] nanomwaakau.” (2Tim. 3:10) E katauaki Timoteo nakoni mwioko aika kakawaki riki ibukina bwa e maiuakin reirei ake e anganaki.—1Kor. 4:17.

Iai raoraom ae ikawai ao ni mwaatai riki ae ko kona ni kakairi irouna? Ngkana akea, e aera bwa ko aki kakaaea? E ururing rikaaki Tom ae te unimwaane i nanon ririki aika bati ao e taku: “E mwannanoai te unimwaane temanna ae mwaatai ao e reireinai ni kataneiaai. I katoatai n tuangnga ana taeka n reirei ao I maiuakin. E waekoa n rikirake iai onimakinan au konabwai i bon irou.”

5. E teimatoa ni kataneia i bon irouna. E kaumaka Timoteo Bauro ni kangai: “Kataneiako bwa ko aonga n uaiakina tiam ae tangiran te Atua.” (1Tim. 4:7) E bae n iai ana tia reirei ni kataneiai te tia takaakaro, ma e riai naba ni kataneia i bon irouna. E kaumaka Timoteo Bauro ni kangai: “Teimatoa ni katabetabeko . . . n te wareware i mataia aomata, n te kaungaunga, ao n te angareirei. . . . Iaiangoi baikai ao kabanea nanom iai, bwa e aonga n noraki raoi rikirakem irouia aomata nako.”—1Tim. 4:13-15.

Ko riai naba ni karikirakea rabakaum. Riiki bwa te aomata ae taningamarau n reirei n te Baibara ao teimatoa n atai kaetieti aika boou n te ekaretia. Ko aki riai naba n onimakiniko i bon iroum, tao n iangoia bwa ko a mwaatai ao ko a kona ni karaoa te bwai teuana ae ko tuai ni karaoa iai am ukeuke. Kakairi iroun Timoteo n “teimatoa n tarataraa raoi arom ao aron am angareirei.”—1Tim. 4:16.

6. E onimakina taamnein Iehova. E iaiangoa Bauro ana mwakuri ni minita Timoteo ao e kauringnga ni kangai: “Ko na kawakina te bwai ae kakawaki aei ae ko mwiokoaki iai rinanon te taamnei ae raoiroi ae memena i nanora.” (2Tim. 1:14) Ngkana e na kawakina ana mwakuri ni minita Timoteo, e riai n onimakina taamnein te Atua.

E taku Donald ae te unimwaane i nanon ririki aika bati: “A riai mwaane aika iai mwiokoaia ni kawakina aia iraorao ma te Atua. A na nakonako ma ‘korakoraia ae ririkirake’ naake a karaoa anne. Ngkana a tataroa taamnein te Atua ao a karikirakea uaana, a na riki bwa bwaai n ibuobuoki ni koaua nakoia tariia.”—TaiAre. 84:7; 1Bet. 4:11.

E rangi ni kaunganano noraia taari mwaane aika bati ake a a tibwa anganaki mwiokoaia, bwa a ririkirake n aia beku ibukin Iehova n arom naba. E taku Jason are taekinaki mai moa: “N au tai ni beku bwa te unimwaane, I a tia n reiakina ae bati ao e a ririkirake irou onimakinan au konabwai. I a kukurei ngkai ni mwiokoau aei ao I iangoia bwa te mwioko ae moan te tamaroa!”

Ko na kateimatoa rikirakem n am beku ibukin Iehova? Katea tiam bwa ko na karekea reireiam mairoun Timoteo. Ao ko na riki naba bwa te bwai n ibuobuoki nakoia ana aomata te Atua.